గోవాలో సిరియా పౌరుడి అరెస్ట్

పణజి: గోవాలో అక్రమంగా నివసిస్తున్న సిరియా దేశస్తుడిని పోలీసులు సోమవారం రాత్రి అరెస్ట్ చేశారు. వీసా గడువు తీరినా అతడు స్వదేశానికి వెళ్లకపోవడంతో అతడిని అదుపులోకి తీసుకున్నారు. సిరియా పౌరుడి అరెస్ట్ ను ఐజీ సునీల్ గార్గ్ ధ్రువీకరించారు. అతడిని ఇంటెలిజెన్స్ అధికారులు ప్రశ్నిస్తున్నారని చెప్పారు.

'కాసినో ప్రాంతంలో గతరాత్రి అతడిని అరెస్ట్ చేశాం. వీసా గడువు ముగిసిన తర్వాత కూడా ఇండియాలోనే ఉండడం అనుమానాలకు తావిస్తోంది. అక్రమంగా ఉన్నందుకు అతడిపై కేసు నమోదు చేశాం' అని గార్గ్ తెలిపారు. అయితే అతడిని తీవ్రవాదులతో సంబంధాలు ఉన్నాయో, లేవో ఇప్పుడే చెప్పలేమని అన్నారు. సిరియా పౌరుడు అరెస్ట్ ను ముఖ్యమంత్రి లక్ష్మీకాంత్ పర్సేకర్ కూడా ధ్రువీకరించారు. దర్యాప్తు సాగుతోందని చెప్పారు.