కోహినూర్ వజ్రం కోసం...

 కోహినూర్ వజ్రం జన్మ రహస్యం ఏంటి? దాన్ని ఆంగ్లేయులు ఎలా మన నుంచి తరలించుకుపోయారు? అనే ఓ యువతి పరిశోధనే ప్రధానాంశంగా రూపొందిన  చిత్రం ‘తోకచుక్క’. సందీప్‌రావ్, కుముద నాయక్ ప్రధాన పాత్రధారులు. గోపీచంద్ కాట్రగడ్డ దర్శకుడు. రజనీ కాట్రగడ్డ నిర్మాత. శనివారం హైదరాబాద్‌లో ఏర్పాటు చేసిన విలేకరులు సమావేశంలో దర్శకుడు మాట్లాడుతూ -‘‘కాకతీయ సామ్రాజ్యానికి సంబంధించిన ఖజానాని స్వప్రయోజనాలకు కొందరు, దేశ ప్రయోజనాలకు మరికొందరు వెలికి తీయడానికి చేసే ప్రయత్నమే ఈ చిత్ర కథ. హిస్టరీ, మిస్టరీ కలగలుపుగా ఉంటుంది. రుద్రమదేవి, సమ్మక్క, సారలమ్మల గురించి కూడా ఇందులో ప్రస్తావించాం. కాకతీయులపై పీహెచ్‌డీ చేసే అమ్మాయిగా కుముద నటించింది. రెండేళ్ల పాటు చిత్రీకరణ జరిపాం. త్వరలో పాటల్ని, మే నెలలో సినిమాను విడుదల చేస్తాం’’ అని తెలిపారు. ఇంకా చిత్ర యూనిట్ సభ్యులు మాట్లాడారు.