సన్నీలియోన్.. పొట్టిగా, లావుగా ఉండేదట!

సన్నీలియోన్.. పొట్టిగా, లావుగా ఉండేదట!

'నువ్వు లావుగా.. పొట్టిగా ఉన్నావు, మోడలింగ్‌కు పనికిరావు' ఈ కామెంట్ ఎవరి గురించి వచ్చిందో తెలుసా.. బాలీవుడ్‌లో హీరోయిన్‌గా దాదాపు స్థిరపడిపోయిన సన్నీ లియోన్ గురించట! న్యూయార్క్ ఫ్యాషన్ వీక్‌లో ర్యాంప్ మీద నడిచిన మొట్టమొదటి బాలీవుడ్ నటిగా సన్నీలియోన్ పేరు సంపాదించింది. ఐశ్వర్యారాయ్ లాంటివాళ్లకు సైతం దక్కని అవకాశం సన్నీకి దక్కిందంటే చిన్నవిషయం కాదు. అలాంటి సన్నీ మొదట్లో, అంటే సుమారు 18 ఏళ్ల వయసు ఉన్నప్పుడు మోడలింగ్ కోసం ప్రయత్నిస్తే, ఆమెకు ఎదురైన సమాధానం అది. చిన్నప్పటి నుంచి తనకు మోడల్ అవ్వాలనే ఉండేదని, దాంతో 18 ఏళ్లు రాగానే తాను ప్రయత్నాలు మొదలుపెట్టానని సన్నీ లియోన్ చెప్పింది.

కానీ అప్పట్లో తనకు అన్నీ తిరస్కారాలే ఎదురయ్యాయని తెలిపింది. అలాంటి పొట్టి, లావు అమ్మాయి ఇప్పుడు న్యూయార్క్ ఫ్యాషన్ వీక్ ర్యాంప్‌ మీద నడిచిందని ఆమె ఆనందంగా వివరించింది. ర్యాంప్ మీద నడుస్తుంటే జారిపడిపోతానేమోనని భయం వేసిందని, అయితే అదృష్టం కొద్దీ అలాంటివేమీ జరగలేదని చెప్పింది. ఇదే ర్యాంపు మీద యాసిడ్ దాడి బాధితురాలు రేష్మా ఖురేషీ కూడా నడిచిన విషయం తెలిసిందే. రేష్మాను కలిసి ఆమెతో మాట్లాడానని, ఆమె అచ్చం ఒక బొమ్మలా ఉందని.. ఆమె ధైర్యం, పట్టుదల చూసి తాను చాలా ఆనందించానని తెలిపింది.