‘అందుకే రహస్యంగా షూటింగ్ చేశాం’

Rajdoot Movie Hero Meghamsh Srihari Interview - Sakshi

శ్రీహరి చిన్నకొడుకు మేఘాంశ్ హీరోగా పరిచయమవుతున్న చిత్రం ‘రాజ్ దూత్’. అర్జున్, కార్తీక్ అనే ఇద్దరు దర్శకుల సంయుక్త దర్శకత్వంలో తెరకెక్కిన ఈ చిత్రాన్ని సత్తిబాబు నిర్మిస్తున్నారు. మేఘాంశ్ సరసన నక్షత్ర హీరోయిన్‌గా నటిస్తున్న ఈ సినిమా ఈ నెల 12న విడుదల కానుంది. ఈ సందర్భంగా హీరో మేఘాంశ్ మీడియాతో మాట్లాడారు..

హీరోగా మీ మొదటి సినిమా రాజ్‌దూత్‌ రిలీజ్ అవుతుంది ఎలా ఫీల్ అవుతున్నారు?
హీరోగా ఇది నా మొదటి సినిమా, ఈ నెల 12న విడుదల కానుంది. ఈ సినిమా కోసం చాలా కష్టపడ్డాం. మండుటెండల్లో చిత్రీకరణ చేశాం. నిర్మాత కూడా ఈ చిత్ర నిర్మాణం కొరకు చాలా కష్టపడ్డారు.

చిత్రాన్ని చాలా రహస్యంగా చిత్రీకరించారు ఎందుకు?
కేవలం ఒత్తిడి తగ్గించడానికే సినిమా షూటింగ్ ఎటువంటి ప్రచారం లేకుండా రహస్యంగా చిత్రీకరించడం జరిగింది.

సినిమాపై ప్యాషన్ తోనే హీరో అయ్యారా?
చిత్ర పరిశ్రమకు చెందిన కుటుంబంలో పుట్టి పెరిగినవాడిగా, సినిమాపై ఫ్యాషన్ ఉంది. అలాగే నాన్న కూడా ఓ సందర్భంలో చిన్నవాడిని యాక్టర్‌ని, పెద్దవాడిని డైరెక్టర్‌ని చేస్తాను అన్నారు. దానితో ఆయన కోరిక మేరకు కూడా హీరో అయ్యాను.

సినిమాకు రాజ్‌దూత్‌ అని బైక్‌ పేరు ఎందుకు పెట్టారు?
చాలా మంది అడుగుతున్న ప్రశ్నఇది. ఈ మూవీలో హీరో తనకిష్టమైన రాజ్ దూత్ బైక్ కోసం, రాయల్ ఎన్ ఫీల్డ్ బైక్ పై అన్వేషిస్తూ ఉంటాడు.

రాజ్ దూత్ రోడ్ జర్నీలో సాగే థ్రిల్లర్ మూవీనా?
సినిమాలో కొంత భాగం రోడ్ జర్నీలో సాగుతుంది, ఐతే ఇది థ్రిల్లర్ మూవీ కాదు, రెండు మూడు, విభిన్న జోనర్స్‌లో సాగే ఓ వైవిధ్యమైన కమర్షియల్ చిత్రం అని చెప్పవచ్చు.

మీరు హీరో అవుతున్నారంటే మీ అమ్మ గారు ఎలా స్పందించారు?
అమ్మ చాలా సంతోషించారు, అలాగే సినిమా ఎలా వస్తుందో అని కొంచెం కంగారుకూడా పడ్డారు. ఐతే నేను సినిమాను అమ్మకు చూపించాను, ఆమెకు చాలా బాగా నచ్చింది.

మీ నాన్న గారి నటనలో మీకు నచ్చిన కోణం ఏమిటి?
ఆయన నటనలో ప్రతి కోణం నాకు నచ్చుతుంది. ఎమోషనల్ అయినా, యాంగ్రీ సన్నివేశాలలోనైనా ఆయన నటన చాలా బాగుంటుంది.

నటనలో శిక్షణ తీసుకున్నారా?
సినిమాకి ముందు కొన్ని రోజులు శిక్షణ తీసుకున్నాను. అలాగే స్కూల్ ఏజ్ నుండి థియేటర్ డ్రామాలలో నటించిన అనుభవం కూడా ఉంది.


కెమెరా ముందు మొదటి అనుభవం ఎలా అనిపించింది?
మొదట్లో కొంత కంగారుపడ్డాను, తరువాత మెల్లగా అలవాటు పడ్డాను.

ఇండస్ట్రీ నుండి మీకు అందిన సపోర్ట్ గురించి చెబుతారా?
ఇండస్ట్రీ మాపై చాలా అభిమానం, ప్రేమా చూపించింది. సాయి ధరమ్ తేజ్ అన్న, అలాగే మంచు మనోజ్ అన్న కాల్ చేసి మరి అభినందించారు.

నాన్నగారి సినిమాలలో మీకు నచ్చిన చిత్రం?
చాలా ఉన్నాయి. భద్రాచలం, ఢీ, నువ్వొస్తానంటే నేనొద్దంటానా! సినిమాలంటే చాలా ఇష్టం.

ఈ మూవీ డైరెక్టర్స్ గురించి చెప్పండి?
అర్జున్, కార్తీక్ డైరెక్టర్ సుధీర్ వర్మ దగ్గర పనిచేశారు. వీళ్లద్దరి మధ్య వర్క్ కో ఆర్డినేషన్ బాగుంటుంది. వీళ్ళ మధ్య విబేధాలు వచ్చి సినిమా ఎక్కడ ఆగిపోతుందో అని భయం వేసింది. అలా ఏం కాకుండా (నవ్వుతూ) ఇద్దరు చిత్రాన్ని పూర్తి చేశారు.

మూవీలో జర్నీ ప్రధానంగా సాగుతుందా?
ఈ చిత్రంలో కామెడీ, ఎమోషన్స్, లవ్ అన్ని ఎలిమెంట్స్ ఉన్నాయి. జర్నీ కేవలం చిత్రంలో ఒక భాగం మాత్రమే.

Read latest Movies News and Telugu News | Follow us on FaceBook, Twitter


Advertisement
Advertisement

*మీరు వ్యక్తం చేసే అభిప్రాయాలను ఎడిటోరియల్ టీమ్ పరిశీలిస్తుంది, *అసంబద్ధమైన, వ్యక్తిగతమైన, కించపరిచే రీతిలో ఉన్న కామెంట్స్ ప్రచురించలేం, *ఫేక్ ఐడీలతో పంపించే కామెంట్స్ తిరస్కరించబడతాయి, *వాస్తవమైన ఈమెయిల్ ఐడీలతో అభిప్రాయాలను వ్యక్తీకరించాలని మనవి

Back to Top