హెచ్‌ఐవీ సోకుతుందనే భయంతోనే..

పీజీ వైద్యురాలి ఆత్మహత్య

గుంటూరు మెడికల్‌: హెచ్‌ఐవీ పాజిటివ్‌ రోగికి ఆపరేషన్‌ చేస్తున్న సమయంలో సూది గుచ్చుకోవటంతో తనకు కూడా హెచ్‌ఐవీ సోకుందనే భయంతోనే డాక్టర్‌ రాచమళ్ల విజయలక్ష్మి(24) ఆత్మహత్యకు పాల్పడినట్లు పోలీసులు భావిస్తున్నారు. గుంటూరు వైద్య కళాశాల జనరల్‌ సర్జరీ పీజీ ద్వితీయ సంవత్సరం విద్యార్థిని విజయలక్ష్మి గురువారం సాయంత్రం కన్నావారితోట ఐదోలైన్‌లోని నివాసంలో అనుమానస్పద స్థితిలో మృతి చెందిన విషయం తెలిసిందే. శుక్రవారం పోస్టుమార్టం చేసిన అనంతరం మతదేహాన్ని కుటుంబ సభ్యులకు అప్పగించారు.

గుంటూరు ప్రభుత్వ సమగ్ర ఆస్పత్రిలో మూడు వారాల క్రితం హెచ్‌ఐవీ సోకిన రోగికి ఆపరేషన్‌ చేస్తున్న సమయంలో సూది గుచ్చుకోవటంతో తనకు కూడా హెచ్‌ఐవీ సోకుతుందనే భయంతో విజయలక్ష్మి మానసిక ఒత్తిడికి గురైనట్లు తోటి వైద్యులు తెలిపారు. తక్షణమే హెచ్‌ఐవీ నిరోధక మందులు వాడటం ప్రారంభించినా రెండు రోజులుగా విరోచనాలు అవుతుండటంతో ఆమె ఆత్మహత్య చేసుకుని ఉంటుందని భావిస్తున్నారు.