TV
నీరుగారిన..ఉత్సవం
● గండికోట ఉత్సవాల్లో ఆకట్టుకోని ప్రోగ్రాంలు
● ఉసూరుమంటూ వెనుదిరుగుతున్న
పర్యాటకులు
● వెలవెలబోతున్న స్టాల్స్
● ఉత్సవాలతో గండికోటకు
నెరవేరని ప్రయోజనం
జమ్మలమడుగు/జమ్మలమడుగురూరల్ : గండికోట ఉత్సవాలు వెలవెలబోతున్నాయి. గండికోట వైభవాన్ని.. కీర్తిని నలుదిశలా వ్యాప్తి చెందేలా ఉత్సవాలను నిర్వహిస్తున్నామన్న అధికారులు ఆదిశగా అడుగులు వేయలేదు. కోట వైభవం మాటేమో గానీ ఉత్సవాలతో కొంచైమెనా ప్రయోజనం జరగకపోగా.. చుట్టూ పారిశుధ్య లేమితో.. నిరుపయోగంగా మారిన తాగునీటి నిర్వహణ కేంద్రాలతో కోట పేరును గంగలో కలిపేస్తున్నారు.
తొలి రోజు పర్యాటకుల తాకిడి విపరీతంగా ఉన్నా దానికి తగ్గట్టుగా ప్రోగ్రాంలు సక్రమంగా నిర్వహించడంలో అధికారుల వైఫల్యం స్పష్టంగా కనిపించింది. గత ఉత్సవాల్లో స్థానికంగా జమ్మలమడుగు పట్టణంలో భారీగా ర్యాలీ నిర్వహించడంతోపాటు అన్ని పాఠశాలల, కాలేజీల, అధికారులను భాగస్వాములను చేశారు. దీంతో స్థానికులు సైతం గండికోట ఉత్సవాలు జరుగుతున్నాయని పోదాం పదా అంటూ తరలివచ్చేవారు.
స్థానికులకు ప్రాధాన్యత ఎక్కడ...!
గండికోట ఉత్సవాలలో స్థానిక ప్రభుత్వ, ప్రైవేట్పాఠశాల విద్యార్థులతో కల్చరల్ యాక్టివిటిస్ నిర్వహించేవారు. ఈ ఏడాది భాగస్వామ్యం కాదుకదా వారికి కనీస పిలుపే లేకుండా పోయింది. సోమవారం జరిగిన కార్యక్రమాలు సైతం వెలవెలబోయాయి. పట్టుమని పదిమంది కూడా కూర్చిలో కూర్చొలేని పరిస్థితి ఉంది. గండికోట ఉత్సవాల్లో భాగంగా చేనేతవృత్తుల, వ్యవసాయానికి సంబంధించిన స్టాల్స్లు కొనుగోలు దారులు లేక వెలవెలబోయాయి. చేనేత వృత్తుల ప్రదర్శన తిలకించటానికి వచ్చిన వారికందరికి నిరాశే ఎదురైంది. ఎటువంటి కొత్తదనం వస్త్రాలు లేకపోవడంతోపాటు ముతక వస్త్రాలు స్టాల్స్ పెట్టడంతో ఎవరూ అటువైపు కన్నెత్తి చూడటంలేదు.
తాగునీటికి ఇబ్బందులు...
గండికోట ఉత్సవాలను చూడటానికి వచ్చిన పర్యాటకులకు కనీసం మంచినీటి సౌకర్యం కూడా అధికారు లు కల్పించలేదు. అలాగే మరుగుదొడ్లు వసతులు లేక పర్యాటకులు తీవ్ర ఇబ్బందులు పడుతున్నారు.
నీరుగారిన..ఉత్సవం
