మహమ్మారిపై టీకాస్త్రం

మంగళవారం శ్రీ 10 శ్రీ మార్చి శ్రీ 2026

అర్హులైన బాలికలందరూ తల్లిదండ్రులను వెంటబెట్టుకుని వచ్చి, వారి అంగీకారంతో టీకా వేయించుకోవాలి. ఈ అవకాశాన్ని ప్రతిఒక్క రూ సద్వినియోగం చేసుకోవాలి. దేశవ్యాప్తంగా విజయవంతంగా అమలువుతున్న ఈ కార్యక్ర మాన్ని జిల్లాలో కూడా అధికారులు పకడ్బందీ గా నిర్వహించాలి. రాబోయే మూడు నెలల్లో ఈ ప్రక్రియను పూర్తి చేయాలి.

– డాక్టర్‌ ఎన్‌.ప్రభాకరరెడ్డి, కలెక్టర్‌

సాక్షి, పార్వతీపురం మన్యం:

కేన్సర్‌.. ప్రాణాంతకమైన రోగం. మన జీవన శైలి, మారుతున్న ఆహారపు అలవాట్లు కారణంగా చాపకింద నీరులా విస్తరిస్తోంది. ముందుగా గుర్తించి చికిత్స అందిస్తే.. నివారణ సులువే! ఆలస్యమైతే ప్రాణాలనే తినేస్తుంది. పురుషుల కంటే.. మహిళలే ఎక్కువగా ఈ మహమ్మారి బారిన పడుతున్నారు.

ముందే మందేసేద్దాం..

మహిళల్లో వచ్చే భయంకరమైన గర్భాశయ కేన్సర్‌ను నివారించే లక్ష్యంతో కేంద్ర ప్రభుత్వం చేపట్టిన హెచ్‌పీవీ టీకా పంపిణీ కార్యక్రమం పార్వతీపురం మన్యం జిల్లాలో ప్రారంభమైంది. జిల్లా ఆస్పత్రిలో అధికారికంగా ఈ కార్యక్రమాన్ని కలెక్టర్‌ ఎన్‌. ప్రభాకరరెడ్డి సోమవారం ప్రారంభించారు. జిల్లా వ్యాప్తంగా 15 మండలాల పరిధిలో 14 ఏళ్లు నిండిన సుమారు 10 వేల మంది బాలికలు/యువతులను ఈ టీకా కోసం గుర్తించారు. బహిరంగ మార్కెట్‌లో ఒక్కో డోస్‌ ధర రూ.4 వేలు పైనే. కేంద్ర ప్రభుత్వం ఈ టీకాలను పూర్తిగా ఉచితంగా అందిస్తోంది. గర్భాశయ కేన్సర్‌ వంటి తీవ్రమైన ఆరోగ్య సమస్యల నుంచి మహిళలకు దీర్ఘకాలిక రక్షణ కల్పించేందుకు ఈ టీకా ఎంతో దోహదపడుతుందని వైద్యులు అంటున్నారు.