మాటల్లో ‘భూమ్‌’.. నమ్మితే ఢాం..!

Nov 17 2025 8:26 AM | Updated on Nov 17 2025 8:26 AM

30 ఏళ్ల క్రితం వేసిన వాటికీ ఇప్పటికీ అనుమతులు శూన్యం అనుమతి ఉన్న ప్లాట్లు కొనాలని ఏపీ సీఆర్‌డీఏ ప్రకటన కమీషన్ల కోసం కొనుగోలుదారులను మోసగిస్తున్న దళారులు ఓ పక్క వ్యాపారం పడిపోయినా అధిక ధరలకు విక్రయాలు విలువ లేని ప్లాట్లనూ సామాన్యులకు అంటగడుతూ మోసం ప్లాట్లు తీసుకున్నాక తీవ్రంగా నష్టపోతున్న కొనుగోలుదారులు అనుమతులు లేని ప్లాట్లు కొంటే ఇబ్బందులేనని సీఆర్‌డీఏ హెచ్చరిక

తాడికొండ: నిబంధనలు పాటించకుండా అరకొర వసతులతో వెంచర్లు వేసిన నిర్వాహకులు అమ్ముకొని సొమ్ము చేసుకొని వెళ్లిపోతున్నారు. దళారులు కమీషన్ల రూపంలో అందిన కాడికి లాగేస్తున్నారు. ఇప్పుడు అనుమతి ఉన్న ప్లాట్లను మాత్రమే కొనాలంటూ ఏపీ సీఆర్‌డీఏ ప్రకటన జారీ చేసి వెంచర్లను తొలగించి, ఆయా ప్రాంతాల్లో బోర్డులు పెట్టేస్తోంది. కమీషన్‌ల కోసం కొనుగోలుదారులను మోసం చేస్తున్న బ్రోకర్లు మాత్రం నిజం బయటకు రాకుండా అవే ప్లాట్లను అమాయకులకు అంటగడుతూ వారి జీవితాలతో ఆటలాడుకుంటున్నారు. ఓ పక్క రియల్‌ భూమ్‌ పడిపోయినా గజానికి అధిక ధరలు చెప్పి అంటగడుతూ నిలువునా ముంచేస్తున్నారు. ప్రస్తుతం కొనుగోలుదారుల పరిస్థితి అగమ్య గోచరంగా మారింది. కొనుగోలుకు వచ్చిన వారికి అనుమతుల గురించి తెలియజేయకుండా ఆకాశంలో చుక్కలు చూపిస్తూ అదిగో రాజధాని.. ఇదిగో ప్రతిష్టాత్మక వర్సిటీకి కూతవేటు దూరం, ఇటువైపు అంతర్జాతీయ విమానాశ్రయం వస్తుంది.. అటు వైపు ఔటర్‌ రింగ్‌ రోడ్డు వేస్తారు, ఇక్కడ హైవే... అక్కడ పెద్ద రైల్వే స్టేషన్‌ అంటూ అంటగట్టేస్తున్నారు. ప్లాట్లు కొనుగోలు చేసిన తరువాత అసలు నిజం వెలుగు చూస్తోంది. కొనుగోలుదారులు తాము పూర్తిగా మోసపోయామని తెలుసుకొని ఆవేదన చెందుతున్నారు.

ముఖ్యంగా ఈ ప్రాంతాల్లో...

రాజధాని సమీప మండలాలైన తాడికొండ, కంతేరు, అమరావతి, పెదకూరపాడు తదితర ప్రాంతాల్లో ఈ తంతు కొనసాగుతోంది. రాజధానికి కూతవేటు దూరంలో ఉన్న కంతేరు, కొప్పురావూరు, పొన్నెకల్లు, పాములపాడు, రావెల, నిడుముక్కల, లాం, పెదపరిమి పలు గ్రామాల్లో ఇబ్బడి ముబ్బడిగా రియల్‌ ఎస్టేట్‌ వెంచర్లు ఉన్నాయి. ఇక్కడ 30 ఏళ్ల కిందట వేసిన వెంచర్లకు సైతం ఎలాంటి అనుమతులు రాలేదు. తాడికొండ అడ్డరోడ్డు సెంటర్‌లో ఓ రియల్‌ ఎస్టేట్‌ వ్యాపారి కోర్టులో ఉన్న భూమిలో తనకు కనీసం పాసు పుస్తకం కూడా రాకుండానే ఏకంగా పెద్ద కల్యాణ మండపం, షాపింగ్‌ కాంప్లెక్స్‌, రెస్ట్‌ రూమ్‌లు, వేదిక, గార్డెన్‌ వంటివి నిర్మించేశాడు. అద్దెలకు ఇచ్చుకుంటున్నా అధికారులు అటు చూడటం లేదు. కొందరు అప్పుడప్పుడూ సదరు వ్యాపారిని కలుస్తుండటం గమనార్హం.

అధికారుల నిర్లక్ష్యం

అనుమతులు లేని ప్లాట్లు కొనుగోలు చేస్తే నష్టం తప్పదంటున్న అధికారులు వాటిని కట్టడి చేసేందుకు తీసుకుంటున్న చర్యలు నామమాత్రంగా కనిపిస్తున్నాయి. అనుమతులు లేకుండా కొనుగోలు చేసిన పాట్లకు గజానికి ప్రభుత్వ ధర ప్రకారం ఎల్‌ఆర్‌ఎస్‌ చెల్లిస్తేనే కనీస వసతులు కల్పిస్తామని సీఆర్‌డీఏ నిబంధన విధించడంపై కొనుగోలుదారులు ఆవేదన చెందుతున్నారు.