విచిత్రమైన షరతు!

ఇండస్ట్రీకి ‘నో డేటింగ్‌’ కండిషన్‌ తో ఎంట్రీ ఇచ్చిన నిధి అగర్వాల్‌. ఇప్పుడు టాప్‌ హీరోలతో సినిమాలు చేస్తూ, అభిమానులు గుడి కట్టేంత ఫేమ్‌ సంపాదించుకుంది. ప్రస్తుతం మరిన్ని క్రేజీ ప్రాజెక్ట్స్‌తో బిజీగా ఉంది.

• నిధి నిజానికి హైదరాబాద్‌లోనే 1992 ఆగస్టు 17న పుట్టింది. చిన్నతనం కూడా అక్కడే గడిచింది. తర్వాత బెంగళూరులో చదువుకుంది. అందుకే హిందీతో పాటు తెలుగు, కన్నడ భాషల్లో సునాయాసంగా మాట్లాడగలుగుతుంది.

• తన తొలి సినిమా ‘మైఖేల్‌ మున్నా’ కోసం, ఏ హీరోయిన్‌  ఒప్పుకోని షరతును అంగీకరించింది. సినిమాలో నటిస్తున్నంతవరకూ ఎవరితోనూ డేటింగ్‌ చేయరాదని ఒప్పందంలో క్లాజ్‌ పెట్టారు. ‘‘అప్పట్లో కెరీర్‌ కావాలి, డబ్బులు అవసరం. కాబట్టి సరేనన్నాను’’ అని నవ్వుతూ చెబుతుంది నిధి.

• తెలుగులో ‘ఇస్మార్ట్‌ శంకర్‌’ హిట్‌ అయింది. కాని తమిళంలో శింబు, ఉదయనిధి స్టాలిన్, జయం రవిలతో చేసిన సినిమాలు అంతగా ఆడలేదు. ప్రస్తుతం పవన్‌ కల్యాణ్‌తో ‘హరిహర వీరమల్లు’, ప్రభాస్‌తో ‘రాజాసాబ్‌’ సినిమాలపై చాలా ఆశలు పెట్టుకుంది.

• పూజా హెగ్డే తర్వాత, నాగ చైతన్య, అఖిల్‌– అన్నదమ్ములు ఇద్దరితోనూ నటించే అవకాశం దక్కించుకున్న హీరోయిన్‌ నిధి.

• ఫిబ్రవరి 14, వాలెంటైన్‌ ్స డే రోజున తమిళనాడులో అభిమానులు ఆమె విగ్రహానికి పాలతో అభిషేకం చేసి, గుడి కట్టినట్టు వార్తలు, ఫొటోలు వెలుగులోకి రావడం చూసి, షాక్‌ అయిందట!

• హైదరాబాద్‌లోని బషీర్‌బాగ్‌లో నిధి అమ్మమ్మ వాళ్ల ఇల్లు ఉంది. ‘హైదరాబాద్‌ మించిన ఫన్‌ ప్లేస్‌ ప్రపంచంలో లేదనిపిస్తుంది’ అని అంటుంది నిధి. అంతేకాదు, నగరంలో దాదాపు 15 వేల మంది బంధువులు ఉన్నారట!

• బెంగళూరులో చదువుకునేటప్పటి నుంచే హీరోయిన్‌ కావాలనే కోరిక. కాని, ఇండస్ట్రీలో పరిచయాలు లేకపోవడంతో ఫేస్‌బుక్‌లో అందమైన ఫోటోలు పెడుతూ, ఎవరైనా దర్శకుడు కాంటాక్ట్‌ చేస్తాడేమో అని ఎదురు చూసేది. ఆ ఆశే ఆమెను మోడలింగ్, అందాల పోటీల వైపు తీసుకెళ్లింది. తర్వాత హీరోయిన్‌ గా మారింది.

• కాలేజీలో ఓ అబ్బాయి ‘నీవు చాలా అందంగా ఉన్నావు’ అన్నాడు. వెంటనే చేతిలో ఉన్న యాపిల్‌ అతని మీదకు విసిరి, ‘నన్ను అంత మాట అంటావా!’ అంటూ అరిచిందట! ఇప్పుడు అభిమానులు పొగుడుతున్నప్పుడు ఆ సంఘటన గుర్తొచ్చి నవ్వుకుంటుందట!