Womens archery team

‘పారా’ ఆసియా క్రీడల్లో భారత బృందం పతకాల వేట కొనసాగుతూనే ఉంది. పోటీల నాలుగో రోజు గురువారం భారత్‌ 7 స్వర్ణాలు, 5 రజతాలు, 13 కాంస్య పతకాలు సాధించింది. ఇందులో ఆర్చర్‌ శీతల్‌ దేవి రెండు పసిడి పతకాల ప్రదర్శన హైలైట్‌గా నిలిచింది. ఆంధ్రప్రదేశ్‌ స్విమ్మర్‌ రవి కార్తీక్‌ పోటీల్లో మూడో పతకంతో మెరవగా, ఆంధ్రప్రదేశ్‌కే చెందిన వలసనైని రవన్ని కూడా తన రెండో పతకాన్ని అందుకుంది. ప్రస్తుతం ఓవరాల్‌గా భారత్‌ 21 స్వర్ణాలు, 26 రజతాలు, 41 కాంస్యాలతో కలిపి 88 పతకాలతో నాలుగో స్థానానికి ఎగబాకింది. నగోయా: మహిళల ఆర్చరీ కాంపౌండ్‌ డబుల్స్‌లో రజతంతో సంతృప్తి చెందిన శీతల్‌ దేవి ఈసారి ఒకే రోజు రెండు స్వర్ణాలతో సత్తా చాటింది. వ్యక్తిగత, మిక్స్‌డ్‌ ఈవెంట్‌లలో ఆమె పసిడి పతకాలు గెలుచుకుంది. కాంపౌండ్‌ వ్యక్తిగత ఫైనల్లో శీతల్‌ 142–139 స్కోరుతో నూర్‌ అలీమ్‌ (సింగపూర్‌)పై విజయం సాధించింది. మిక్స్‌డ్‌ ఫైనల్లో శీతల్‌–తోమన్‌ కుమార్‌ ద్వయం 151–148 తేడాతో ఇండోనేసియా జోడీ అయుడియా ఫెరేలీ–కెన్‌ స్వాగుమిలన్‌ను ఓడించింది. పారా అథ్లెటిక్స్‌లో భారత్‌ ఖాతాలో గురువారం కూడా 5 స్వర్ణాలు చేరాయి. పురుషుల 400 మీటర్ల టి27 పరుగులో దిలీప్‌ గవిట్‌ పసిడి సాధించాడు. అతను రేస్‌ను 48.27 సెకన్లలో పూర్తి చేశాడు. కకేరు ఇషిదా (జపాన్‌; 49.58 సెకన్లు), మారూఫాన్‌ (ఉజ్బెకిస్తాన్‌; 50.03 సెకన్లు) రజత, కాంస్యాలు గెలిచారు. పురుషుల లాంగ్‌జంప్‌ టి44/టి62/టి64 ఈవెంట్‌లో సొలైరాజ్‌ ధర్మరాజ్‌ (7.15 మీటర్లు) స్వర్ణం గెలుచుకున్నాడు. ఎడీ బెర్నార్డ్‌ (మలేసియా; 6.34 మీటర్లు) రజతం, యుమా టమాకి (జపాన్‌; 6.34 మీటర్లు) కాంస్యం సాధించారు. మహిళల డిస్కస్‌త్రో ఎఫ్‌54 లో సువర్ణ రాజ్‌ స్వర్ణం అందుకుంది. డిస్క్‌ను ఆమె 15.66 మీటర్ల దూరం విసిరింది. షహాలా (ఇరాన్‌; 15.45 మీటర్లు), తి గుయెన్‌ (వియత్నాం; 14.65 మీటర్లు) రజత, కాంస్యాలు అందుకున్నారు. మహిళల 400 మీటర్ల టి47 పరుగులో అంజనాబెన్‌ బంబాడియా స్వర్ణం సొంతం చేసుకుంది. ఆమె ఈ ఈవెంట్‌ను 59.97 సెకన్లలో పూర్తి చేయగా, భారత్‌కే చెందిన జయంతి బెహరా (1 నిమిషం 00.65 సెకన్లు) రజతం సాధించింది. ససిరవన్‌ (థాయ్‌లాండ్‌; 1 నిమిషం 02.58 సెకన్లు) కాంస్యం అందుకుంది. పురుషుల హైజంప్‌ టి63 ఈవెంట్‌లో మూడు పతకాలూ భారత్‌ ఖాతాలోనే చేరడం విశేషం. శైలేష్‌ కుమార్‌ 1.89 మీటర్ల ఎత్తుకు ఎగిరి స్వర్ణం సాధించగా...వరుణ్‌ భాటి (1.84 మీటర్లు), రాహుల్‌ (1.81 మీటర్లు) రజత, కాంస్యాలు దక్కించుకున్నారు. భారత రజత పతక విజేతలు: ఆర్చరీ: స్వాతి చౌధరీ (మహిళల డబ్ల్యూ1 ఈవెంట్‌); అథ్లెటిక్స్‌: తేజల్‌బెన్‌ (మహిళల 400 మీ. టి12); స్విమ్మింగ్‌: కపిల్‌కుమార్‌ (పురుషుల 400 మీ. ఫ్రీస్టయిల్‌ ఎస్‌10). భారత కాంస్య పతక విజేతలు: బ్యాడ్మింటన్‌: సూర్యకాంత్‌–నవీన్‌ శివకుమార్‌ (పురుషుల డబుల్స్‌ ఎస్‌ఎల్‌3–ఎస్‌యూ5); సంజన కుమారి (మహిళల సింగిల్స్‌ ఎస్‌ఎల్‌3); మనీషా రాందాస్‌–ప్రమోద్‌ భగత్‌ (మిక్స్‌డ్‌ డబుల్స్‌ ఎస్‌ఎల్‌3–ఎస్‌యూ5); అభిజీత్‌ సఖూజా, సుహాస్‌ లలినకేరే (పురుషుల సింగిల్స్‌ ఎస్‌ఎల్‌4); మనీషా రాందాస్‌ (మహిళల సింగిల్స్‌ ఎస్‌యూ5); కృష్ణ నగార్‌–నిత్యశ్రీ సుమతి (మిక్స్‌డ్‌ డబుల్స్‌ ఎస్‌హెచ్‌6). స్విమ్మింగ్‌: తేజస్‌ నందకుమార్‌ (పురుషుల 100 మీ. బ్యాక్‌స్ట్రోక్‌ ఎస్‌7); స్వాతిక్‌ పాటిల్‌ (పురుషుల 100 మీ. బ్రెస్ట్‌స్ట్రోక్‌ ఎస్‌బీ9). టేబుల్‌ టెన్నిస్‌: శుభమ్‌ వాధ్వా–భవీనా పటేల్‌ (మిక్స్‌డ్‌ డబుల్స్‌–క్లాస్‌ ఎక్స్‌డీ7).రవి కార్తీక్, రవన్నిలకు కాంస్యాలు ఆంధ్రప్రదేశ్‌ స్విమ్మర్‌ బుడిగిన రవి కార్తీక్‌ ఆసియా క్రీడల్లో 2 రజతాల తర్వాత కాంస్యాన్ని తన ఖాతాలో వేసుకున్నాడు. పురుషుల 200 మీటర్ల వ్యక్తిగత మెడ్లీ ఎస్‌ఎం13 ఈవెంట్‌ను 2 నిమిషాల 28.36 సెకన్లలో ముగించి అతను రెండో స్థానంలో నిలిచాడు. రవన్ని ఈ క్రీడల్లో రెండో కాంస్యాన్ని అందుకుంది. మహిళల 400 మీటర్ల టి11 పరుగును 1 నిమిషం 03.64 సెకన్లలో పూర్తి చేసి ఆమె మూడో స్థానం సాధించింది.

మహిళల ఆర్చరీ రికర్వ్‌ వ్యక్తిగత విభాగంలో భారత ప్లేయర్‌ కుంకుమ్‌ మొహొద్‌ కొత్త చరిత్ర సృష్టించింది. ఆసియా క్రీడల్లో మహిళల రికర్వ్‌ ఈవెంట్‌ లో స్వర్ణం సాధించిన తొలి భారతీయ ఆర్చర్‌గా రికార్డు నెలకొల్పింది. ఫైనల్లో ‘షూటాఫ్‌’ ద్వారా ఆమె విజయాన్ని సొంతం చేసుకుంది. ఓవరాల్‌గా 6–5 స్కోరుతో యెజిన్‌ ఓ (దక్షిణ కొరియా)ను కుంకుమ్‌ ఓడించింది. ఐదు సెట్‌ల తర్వాత ఇద్దరు ఆర్చర్లు 5–5తో సమంగా నిలిచారు. దాంతో విజేతను నిర్ణయించేందుకు ‘షూటాఫ్‌’ అవసరమైంది. ఈసారి భారత ఆర్చర్‌ సరిగ్గా 10 పాయింట్లు స్కోర్‌ చేయగా, కొరియా ఆర్చర్‌ 8 పాయింట్లకే పరిమితమై ఓటమిపాలైంది. అంతకుముందు కుంకుమ్‌ క్వార్టర్‌ ఫైనల్లో 6–4తో ప్రస్తుత ప్రపంచ చాంపియన్‌ కాంగ్‌ చెయంగ్‌ (దక్షిణ కొరియా)పై, సెమీఫైనల్లో 2025 ప్రపంచ చాంపియన్‌షిప్‌ రజత పతక విజేత జూ జింగీ (చైనా)పై విజయం సాధించింది. ఈ ప్రదర్శనతో కుంకుమ్‌ 2028 లాస్‌ ఏంజెలిస్‌ ఒలింపిక్స్‌లో భారత్‌కు నేరుగా బెర్త్‌ను అందించింది.పురుషుల రికర్వ్‌ విభాగంలో భారత ఆటగాడు నీరజ్‌ చౌహాన్‌కు కాంస్య పతకం లభించింది. మూడో స్థానం కోసం జరిగిన పోరులో అతను మరో భారత ఆర్చర్, ఆంధ్రప్రదేశ్‌కు చెందిన ధీరజ్‌ బొమ్మదేవరను 6–4తో ఓడించడం విశేషం.‘పసిడి కుంకుమ్‌’17 ఏళ్ల కుంకుమ్‌ స్వస్థలం మహారాష్ట్రలోని అమరావతి. చదువులో బాగా చురుకైన అమ్మాయి. ప్రతీసారి కనీసం 90 శాతం మార్కులు సాధిస్తూ వచ్చే ఆమెకు గణితం బాగా ఇష్టమైన సబ్జెక్ట్‌. కానీ ఇప్పుడు ఆమె దృష్టిలో అంకెలు అంటే లక్ష్యాన్ని చేరుకున్న తర్వాత లెక్కించే స్కోరింగ్‌ పాయింట్లే! 2018లో తల్లి రూపాలి ప్రోత్సాహంతో తన 9 ఏళ్ల వయసులో ఆమె ఆర్చరీని మొదలు పెట్టి ఆపై ఒక్కో మెట్టే ఎక్కుతూ వచ్చింది. కోచ్‌ ప్రఫుల్‌ డాంగే చిన్నప్పుడు ఆమెలో ప్రతిభను గుర్తించి ప్రోత్సహిస్తూ అన్ని రకాలుగా ఆటలో మేటిగా తీర్చిదిద్దాడు. ఇప్పటి వరకు కూడా ఆమె అక్కడే శిక్షణ కొనసాగిస్తోంది. 2020లో జాతీయ సబ్‌ జూనియర్‌ చాంపియన్‌షిప్‌లో రాణించడంతో కుంకుమ్‌ అసలు ప్రయాణం మొదలైంది. ఆ తర్వాత 365 రోజులూ ఆమెకు ప్రాక్టీస్‌ చేయడంలోనే ఆనందం లభించేది. దసరా, దీపావళిలాంటి పండగలను కూడా ఏ రోజూ పట్టించుకోలేదు. కొన్నాళ్ల క్రితమే కోచ్‌ ఆమెను సోషల్‌ మీడియాకు దూరంగా ఉండమని చెప్పడంతో వెంటనే తన ఫోన్‌లోంచి యూట్యూబ్‌ను కూడా తొలగించి పూర్తిగా ఆర్చరీపైనే దృష్టి పెట్టింది. స్వీట్‌ షాప్‌లలో ఉపయోగించే బాక్స్‌లను ఇంట్లోనే తయారు చేసి సప్లై చేయడం ఆమె తండ్రి అనిల్‌ జీవనాధారం.సహజంగానే క్రీడల కోసం ఎక్కువ మొత్తం కేటాయించే అవకాశం లేదు కాబట్టి ఇతర ప్రయత్నాలతోనే ఆమె కూతురుకు అండగా నిలిచాడు. ఇప్పుడు చిన్న వయసులోనే తన ఆటతో అరుదైన ఘనతలు సాధిస్తున్న కుంకుమ్‌ తండ్రి కళ్లల్లో ఆనందాన్ని నింపింది. ఆర్చరీని మొదలు పెట్టిన ఎనిమిదేళ్లలో ఆమె ఇప్పుడు భారత్‌ తరఫున అత్యుత్తమ ఆర్చర్లలో ఒకరిగా గుర్తింపు తెచ్చుకుంటోంది. ఈ ఏడాది ప్రపంచకప్‌లో 2 స్వర్ణాలు సాధించడంతో ఆమెకు ప్రత్యేక గుర్తింపు లభించింది. ఇప్పుడు ఆసియా క్రీడలనుంచి 3 పతకాలతో వెనుదిరుగుతున్న కుంకుమ్‌ ఒలింపిక్స్‌ పతకాన్నే లక్ష్యంగా పెట్టుకుంది. ‘ఆసియా క్రీడల్లో స్వర్ణం సాధించాలనే లక్ష్యంతోనే ఇక్కడికి వచ్చాను. గత నెల రోజులుగా దీని కోసం చాలా కష్టపడ్డా. ఇప్పుడు దానిని అందుకోగలిగా. నాపై నాకు నమ్మకముంది. ఇతర సహచరులంతా కూడా నన్ను బాగా ప్రోత్సహించారు. ఒలింపిక్స్‌పైనే నా గురి’ అని ఆమె వ్యాఖ్యానించింది.

ఏషియన్‌ గేమ్స్ 2026లో భారత్‌కు మరో స్వర్ణ పతకం లభించింది. మహిళల టీమ్ కాంపౌండ్ ఆర్చరీలో చికితా రావు తానిపర్తి, ప్రితిక ప్రదీప్, జ్యోతి సురేఖ వెన్నంతో కూడిన భారత త్రయం, ఫైనల్లో చైనాను 238-234 తేడాతో ఓడించి స్వర్ణం సాధించింది. ఈ విభాగంలో భారత్‌ ఛాంపియన్‌గా నిలవడం ఇది వరుసగా రెండోసారి.స్వర్ణం గెలిచిన భారత జట్టులో ఇద్దరు తెలుగువారు కావడం విశేషం. జ్యోతి సురేఖ స్వస్థలం విజయవాడ (ఆంధ్రప్రదేశ్‌) కాగా.. చికితా రావు తానిపర్తిది పెద్దపల్లి జిల్లా (తెలంగాణ). మరో అమ్మాయి ప్రితికది మహారాష్ట్ర.తాజా పతకంతో భారత్‌ ఖాతాలో ఏడో స్వర్ణ పతకం చేరినట్లైంది. ఇప్పటివరకు 7 స్వర్ణాలు, 21 రజతాలు, 25 కాంస్యాలు సాధించిన భారత్‌ పతకాల పట్టికలో టాప్-10లోకి (9వ స్థానం) దూసుకొచ్చింది. ఇదీ చదవండి: నీరూ బంగారు ‘ట్రాప్‌’

అంటాల్యా (తుర్కియే): ప్రపంచకప్‌ ఆర్చరీ స్టేజ్‌–3 టోర్నమెంట్‌ క్వాలిఫయింగ్‌ రౌండ్‌లో భారత క్రీడాకారులు రాణించారు. మహిళల కాంపౌండ్‌ విభాగంలో మధుర ధమాంగావ్‌కర్‌ (మహారాష్ట్ర), తనిపర్తి చికిత (తెలంగాణ), వెన్నం జ్యోతి సురేఖ (ఆంధ్రప్రదేశ్‌)లతో కూడిన భారత జట్టు నేరుగా క్వార్టర్‌ ఫైనల్‌ బెర్త్‌ను ఖరారు చేసుకుంది. కజకిస్తాన్, బ్రిటన్‌ జట్ల మధ్య జరిగే మ్యాచ్‌ విజేతతో క్వార్టర్‌ ఫైనల్లో భారత్‌ తలపడుతుంది. క్వాలిఫయింగ్‌లో భారత జట్టు ఓవరాల్‌గా 1777 పాయింట్లు స్కోరు చేసి మూడో స్థానంలో నిలిచింది. మధుర 600 పాయింట్లతో నాలుగో స్థానంలో, చికిత 592 పాయింట్లతో 11వ స్థానంలో, జ్యోతి సురేఖ 585 పాయింట్లతో 19వ స్థానంలో నిలిచారు. పురుషుల రికర్వ్‌ క్వాలిఫయింగ్‌ రౌండ్‌లో ఆంధ్రప్రదేశ్‌ ప్లేయర్‌ బొమ్మదేవర ధీరజ్‌ 572 పాయింట్లు స్కోరు చేసి 13వ స్థానాన్ని దక్కించుకున్నాడు. భారత్‌కే చెందిన అతాను దాస్‌ 570 పాయింట్లతో 17వ స్థానంలో, పార్థ్‌ సాలుంఖే 565 పాయింట్లతో 26వ స్థానంలో నిలిచారు. ఓవరాల్‌గా భారత్‌ 1707 పాయింట్లతో ఐదో స్థానంలో నిలిచి రెండో రౌండ్‌కు అర్హత పొందింది.

పారిస్‌: టోక్యో ఒలింపిక్స్‌కు ముందు పాల్గొంటున్న చివరి టోర్నమెంట్‌లో భారత మహిళా మేటి ఆర్చర్‌ దీపిక కుమారి అదరగొట్టింది. ఆదివారం ముగిసిన ప్రపంచకప్‌ స్టేజ్‌–3 టోర్నమెంట్‌లో దీపిక ఏకంగా మూడు స్వర్ణ పతకాలు సొంతం చేసుకొని సంచలనం సృష్టించింది. ఐదు గంటల వ్యవధిలో దీపిక నాలుగు మ్యాచ్‌లు ఆడి అన్నింటా విజయం సాధించింది. ముందుగా తన భాగస్వాములు అంకిత భకత్, కోమలిక బరిలతో కలిసి మహిళల రికర్వ్‌ టీమ్‌ విభాగంలో పసిడి పతకం దక్కించుకున్న 27 ఏళ్ల దీపిక మిక్స్‌డ్‌ విభాగంలో తన భర్త అతాను దాస్‌తో కలిసి విజేతగా నిలిచింది. అనంతరం వ్యక్తిగత రికర్వ్‌ విభాగంలోనూ దీపిక అద్భుతంగా రాణించి స్వర్ణ పతకాన్ని కైవసం చేసుకుంది.  తద్వారా ఒకే ప్రపంచకప్‌ టోర్నీలో మూడు స్వర్ణాలు సాధించిన తొలి భారత ప్లేయర్‌గా గుర్తింపు పొందింది. అనా వాజ్‌క్వెజ్, ఐదా రోమన్, వలెన్సియాలతో కూడిన మెక్సికో మహిళల జట్టుతో జరిగిన రికర్వ్‌ టీమ్‌ ఫైనల్లో భారత బృందం 5–1తో నెగ్గింది. ఏప్రిల్‌లో గ్వాటెమాలా సిటీలో జరిగిన ప్రపంచకప్‌ స్టేజ్‌–1 టోర్నీలోనూ దీపిక, అంకిత, కోమలిక బృందం స్వర్ణ పతకాన్ని గెల్చుకోవడం విశేషం.రికర్వ్‌ మిక్స్‌డ్‌ ఫైనల్లో దీపిక కుమారి–అతాను దాస్‌ జంట 5–3తో గ్యాబీ ష్కాలెసర్‌–ఎస్జెఫ్‌ వాన్‌ డెన్‌ బెర్గ్‌ (నెదర్లాండ్స్‌) జోడీని ఓడించింది.  మహిళల రికర్వ్‌ వ్యక్తిగత ఫైనల్లో దీపిక 6–0తో ఎలెనా ఒసిపోవా (రష్యా)పై గెలిచి విజేతగా నిలిచింది. దీపిక వరుసగా మూడు సెట్‌లు (29–26; 29–28; 28–27) గెలిచి ప్రత్యర్థికి తేరుకునే అవకాశమే ఇవ్వలేదు. సెమీఫైనల్లో దీపిక 6–2తో అనా వాజ్‌క్వెజ్‌ (మెక్సికో)ను ఓడించింది. మూడు స్వర్ణాలు గెలిచినందుకు చాలా ఆనందంగా ఉంది. మున్ముందూ ఇదే తరహాలో నా ప్రదర్శన ఉండాలి. ప్రపంచకప్‌ టోర్నీలకు దూరంగా ఉన్న కొరియా, చైనా, జపాన్, చైనీస్‌ తైపీ క్రీడాకారిణుల నుంచి టోక్యో ఒలింపిక్స్‌లో తీవ్రమైన పోటీ ఉంటుంది. నా ఆటలోని లోపాలను సరిదిద్దుకుంటూ టోక్యోలో అత్యుత్తమ ప్రదర్శన ఇచ్చేందుకు కృషి చేస్తా.           – దీపిక కుమారి భార్యభర్తలు అతాను, దీపిక స్వర్ణ చుంబనం


 రియో డీ జనీరో: మరికొద్ది రోజుల్లో ఆరంభం కానున్న రియో ఒలింపిక్స్లో భాగంగా భారత మహిళా ఆర్చరీ జట్టు బ్రెజిల్లో అడుగుపెట్టింది. ఇంకా ఒలింపిక్స్ ప్రారంభానికి నాలుగు వారాలు సమయం ఉన్నా భారత్ నుంచి మహిళా ఆర్చరీ జట్టు ముందుగా రియోకు చేరుకుని ప్రాక్టీస్ లో నిమగ్నమైంది. దీనిలో భాగంగా ప్రస్తుతం కోచ్ల పర్యవేక్షణలో శిక్షణా శిబిరంలో పాల్గొంటున్న మహిళా ఆర్చర్లు యోగా సాధన చేస్తున్నారు.
  
 ఈసారి రియో ఒలింపిక్స్‌కు భారత్ నుంచి నలుగురు ఆర్చర్లు మాత్రమే అర్హత సాధించిన సంగతి తెలిసిందే. మహిళ ఆర్చర్లలో బొంబేలా దేవి, దీపికా కుమారి, లక్ష్మీరాణి తమ అదృష్టాన్ని పరీక్షించుకోనుండగా, పురుషుల కేటగిరీలో అతాను దాసు సత్తా చాటేందుకు సిద్ధమవుతున్నాడు.
 
 మహిళా ఆర్చరీ త్రయం టీమ్ ఈవెంట్‌లో కూడా బరిలోకి దిగుతోంది. ఈ ఏడాది మంచి ఫామ్‌లో ఉన్న మాజీ నంబర్ వన్ దీపికా కుమారి వ్యక్తిగత విభాగంలో పతకం సాధించే అవకాశాలు కనబడుతున్నాయి. గతేడాది కోపెన్‌హగన్‌లో జరిగిన ప్రపంచ చాంపియన్‌షిప్‌లో రజతం సాధించిన దీపికా.. 2010 ఢిల్లీ కామన్వెల్త్ గేమ్స్‌లో రెండు స్వర్ణాలు చేజిక్కించుకుంది. మరోవైపు దీపికా వరల్డ్ ర్యాంకింగ్స్ లో ఐదో స్థానంలో ఉండటం కూడా ఆమె పతకంపై ఆశలను పెంచుతోంది.


 - ఫైనల్లో భారత మహిళల ఆర్చరీ జట్టు    
 - రియో ఒలింపిక్స్‌కూ అర్హత    
 - పురుషుల జట్టుకు నిరాశ    
 - ప్రపంచ చాంపియన్‌షిప్
 కొపెన్‌హగెన్ (డెన్మార్క్): అంచనాలకు మించి రాణించిన భారత మహిళల జట్టు ప్రపంచ ఆర్చరీ చాంపియన్‌షిప్‌లో రికర్వ్ టీమ్ విభాగంలో ఫైనల్లోకి దూసుకెళ్లింది. మంగళవారం జరిగిన నాకౌట్ పోటీల్లో భారత్ అజేయంగా నిలిచింది. దీపిక కుమారి, లక్ష్మీరాణి మాఝీ, రిమిల్ బురిలీలతో కూడిన భారత మహిళల జట్టు తొలి రౌండ్‌లో 5-3తో జర్మనీపై విజయం సాధించింది. ఈ గెలుపుతో టీమిండియా క్వార్టర్ ఫైనల్‌కు చేరుకోవడంతోపాటు వచ్చే ఏడాది జరిగే రియో ఒలింపిక్స్‌కు అర్హత సాధించింది. అనంతరం క్వార్టర్ ఫైనల్లో భారత్ 6-2తో కొలంబియాను... సెమీఫైనల్లో 5-4తో జపాన్‌ను బోల్తా కొట్టించి ఫైనల్లోకి అడుగుపెట్టింది.
 
 జపాన్‌తో పోరులో నిర్ణీత రౌండ్‌ల తర్వాత స్కోరు 4-4తో సమం కావడంతో టైబ్రేక్‌ను నిర్వహించగా... భారత్ 30-27తో విజయాన్ని దక్కించుకుంది. 82 ఏళ్ల చరిత్ర కలిగిన ఈ ప్రతిష్టాత్మక ఈవెంట్‌లో భారత మహిళల జట్టు ఫైనల్‌కు చేరుకోవడం ఇది రెండోసారి మాత్రమే. 2011లో జరిగిన పోటీల్లో తొలిసారి ఫైనల్ చేరిన భారత్ ఆతిథ్య ఇటలీ చేతిలో ఓడిపోయి రన్నరప్‌తో సంతృప్తి పడింది. ఈసారి ఫైనల్లో రష్యాతో భారత్ అమీతుమీ తేల్చుకుంటుంది. మరో సెమీఫైనల్లో రష్యా 5-4తో డిఫెండింగ్ చాంపియన్ దక్షిణ కొరియాపై సంచలన విజయం సాధించింది. ఇక ఒలింపిక్స్‌కు అర్హత పొందడం భారత మహిళల జట్టుకిది వరుసగా నాలుగోసారి. 2004 ఏథెన్స్, 2008 బీజింగ్ ఒలింపిక్స్‌లో క్వార్టర్ ఫైనల్లో నిష్ర్కమించిన భారత జట్లు... 2012 లండన్ ఒలింపిక్స్‌లో మాత్రం తొలి రౌండ్‌లోనే వెనుదిరిగాయి.
  
 మరోవైపు రాహుల్ బెనర్జీ, జయంత తాలుక్‌దార్, మంగళ్‌సింగ్ చంపియాలతో కూడిన భారత రికర్వ్ పురుషుల జట్టు 4-5తో రెండో సీడ్ ఇటలీ చేతిలో ఓడిపోయి రియో ఒలింపిక్స్‌కు అర్హత పొందలేకపోయింది. కాంపౌండ్ టీమ్ విభాగంలోనూ భారత జట్లకు నిరాశ ఎదురైంది. తెలుగు అమ్మాయి జ్యోతి సురేఖ, పూర్వాషా షిండే, లిల్లీ చానులతో కూడిన భారత మహిళల జట్టు తొలి రౌండ్‌లో దక్షిణాఫ్రికా చేతిలో ఓడిపోయింది. నిర్ణీత రౌండ్‌ల తర్వాత రెండు జట్లు 223-223 స్కోరుతో సమంగా నిలిచాయి. దాంతో విజేతను నిర్ణయించడానికి టైబ్రేక్‌ను నిర్వహించగా భారత్ 27-29తో ఓడిపోయింది. అభిషేక్ వర్మ, రజత్ చౌహాన్, కన్వల్‌ప్రీత్ సింగ్‌లతో కూడిన భారత పురుషుల కాంపౌండ్ జట్టు క్వార్టర్ ఫైనల్ అడ్డంకిని దాటలేకపోయింది. 224-232తో ఆతిథ్య డెన్మార్క్ జట్టు చేతిలో ఓటమి పాలైంది. తొలి రౌండ్‌లో భారత్ 226-223తో రష్యాను ఓడించింది. బుధవారం వ్యక్తిగత విభాగాల్లో పోటీలు జరుగుతాయి.