అక్షరా హాసన్ సెలైంట్‌గా తమిళంలో బిజీ అయిపోతోంది. ‘షమితాబ్’ చిత్రం ద్వారా హిందీ తెరకు నాయికగా పరిచయమైన అక్షర ఆ తర్వాత అక్కడ వేరే సినిమాలు కమిట్ కాలేదు. ఈ మధ్యే తమిళంలో అజిత్ హీరోగా రూపొందుతున్న చిత్రంలో ఓ కథానాయికగా నటించడానికి అంగీకరించింది. ఇందులో కాజల్ అగర్వాల్ ఓ నాయిక. తాజాగా విశాల్ హీరోగా రూపొందుతోన్న ‘తుప్పరివాలన్’ అనే చిత్రంలో నటించడానికి అంగీకరించింది. తుప్పరివాలన్ అంటే డిటెక్టివ్ అని అర్థం.
 
 ఇందులో  కథానాయికగా రకుల్ ప్రీత్‌సింగ్ నటిస్తోంది. రకుల్ కంటే కాజల్ సీనియర్. రకుల్ వచ్చి నాలుగైదేళ్లవుతోంది. ఈ ఇద్దరితో పోల్చితే అక్షర జూనియర్. మరి.. ఇద్దరు సీనియర్ నాయికలున్న సినిమాలో ఓ నాయికగా నటించడమంటే అక్షరకు సవాలే. అయినా.. లోక నాయకుడు కమల్‌హాసన్ కూతురు కదా... సీనియర్స్‌కి ధీటుగా అక్షర నటిస్తుందని ఊహించవచ్చు.
  


 సాధారణంగా యువతీయువకులు ప్రేమించుకోవడం ఆ తరువాత ఏదో కారణంగా విడిపోవడం ఇప్పుడు విరివిగా జరుగుతున్న విషయమే. అదేవిధంగా ప్రేమికులను విడదీయడానికి వారి తల్లిదండ్రులు ప్రయత్నిస్తుంటారు. ఇక సినిమా రంగంలో ఇలాంటి సంఘటనలు తరచూ జరుగుతుంటాయి. నటుడు కమలహాసన్ మొదటి భార్య, సీనియర్ నటి సారికకు తన కూతురు ప్రేమకు విలన్‌గా మారక తప్పలేదు.ఈమె పెద్ద కూతురు, నేటి టాప్ హీరోయిన్ శ్రుతిహాసన్ అసలు పెళ్లితో పనేంటి అన్నట్లుగా మాట్లాడుతుంటే, రెండో కూతురు, వర్ధమాన నటి అక్షరహాసన్ ప్రేమలో మునిగితేలుతుండడం గమనార్హం.
  
   షమితాబ్ అనే ఒకేఒక్క హిందీ చిత్రంతో తెరపైకి వచ్చిన అక్షరహాసన్ అంతకు ముందు తెర వెనుక సహాయదర్శకురాలిగా కొన్ని రోజులు పని చేశారు.అయితే అప్పటి నుంచే అక్షరహాసన్ సీనియర్ నటి రతి కొడుకు తనుజ్ ప్రేమలో పడ్డారు. వీరిద్దరి డేటింగ్ విషయం మీడియాలో హల్‌చల్ చేసింది. తనుజ్ నటించిన లవ్ యూ సానియో చిత్రం విజయ తీరం చేరలేదు. అటు అక్షరహాసన్ నటించిన షమితాబ్ ఆశించిన విజయం సాధించలేదు.
  
  దీంతో వీరిద్దరూ ప్రేమలో మునిగి నటనపై దృష్టిసారించడం లేదన్న విషయాన్ని వారి తల్లులకు సన్నిహితులు ఉప్పందించడంతో నటి సారిక, రతి ఇద్దరూ తమ వారసుల్ని పిలిచి కొంత కాలం మీ ప్రేమకు బ్రేక్ అప్ చెప్పి నటనపై ఏకాగ్రత చూపండి అని హితవు పలికారట. దీంతో అక్షరహాసన్, తనుజ్  తమ ప్రేమను బ్రేక్‌అప్ చెసుకున్నారని సినీ వర్గాల సమాచారం.


 పట్టుమని పాతికేళ్లు లేవు.. కానీ, ‘బాహ్య సౌందర్యం కన్నా అంతః సౌందర్యమే గొప్పది’ అని చెప్పగలిగేంత మానసిక పరిణతి అక్షరా హాసన్‌కి ఉంది. ఈ యువ నటి నాన్న కమలహాసన్ దేశమంతటా పేరున్న ‘తిరుగులేని’ నటుడు. అమ్మ సారిక ‘అందాల అభినేత్రి’. ఇక.. అక్క శ్రుతీహాసన్ తల్లితండ్రులకు తగ్గ కుమార్తె అనిపించుకుంటూ, ముందుకు సాగుతున్నారు. సరిగ్గా వారందరి బాటలోనే ముందుకెళ్ళడంలో ఇప్పుడు అక్షరా హాసన్ వంతు వచ్చింది. అందం విషయంలో ఈ అమ్మాయి అదుర్స్.  మరి.. అభినయం సంగతేంటి? అనుకున్నవాళ్లకు తొలి చిత్రం ‘షమితాబ్’ ద్వారా సమాధానం ఇచ్చింది అక్షర.  తెరంగేట్రం చేసిన తొలి చిత్రంలోనే తానేమీ అమ్మానాన్నలకూ, అక్కకూ తీసిపోనని నిరూపించుకుంది.  ఈ బ్యూటీతో ‘సాక్షి’ జరిపిన ప్రత్యేక ’చిట్ చాట్’...
  
  
 మొత్తానికి మీ అమ్మా, నాన్న, అక్కలా మీరు కూడా ఆర్టిస్ట్ అయిపోయారు. వాస్తవానికి మీరు డెరైక్టర్ కావాలనుకున్నారు కదా?
 
 అవును... అది నిజమే. సహాయ దర్శకురాలిగా కూడా చేయడం మొదలుపెట్టాను. అలా చేస్తున్న సమయంలోనే నాకో నాటకంలో నటించే అవకాశం వచ్చింది. అప్పుడు నేను పెద్దగా ఆసక్తి కనబరచలేదు. ‘ఓసారి ప్రయత్నిస్తే ఏమవుతుంది?’ అని ఆ డెరైక్టర్ అంటే, ‘సరే’ అన్నాను. అందులో నటించేకొద్దీ నాకు నటన మీద ఆసక్తి ఏర్పడింది. మంచి అవకాశాలొస్తే చేయాలనుకున్నాను.
 
 హిందీ రంగంలో మీకు చాలామంది దర్శకులతో పరిచయం ఉండే ఉంటుంది కాబట్టి, ఎవరి దగ్గరైనా అవకాశాలు అడిగారా?
 
 లేదు. నా తొలి నాటకం ప్రదర్శన అయిన ఆరేడు నెలలకు ఓ ఫంక్షన్‌కి వెళ్లాను. అక్కడకు బాల్కీ సార్ కూడా వచ్చారు. అప్పుడాయన ‘నీతో ఐదు నిమిషాలు మాట్లాడాలి’ అన్నారు. ఆశ్చర్యంగా చూశాను. ‘నేనో కథ రాసుకున్నాను. అందులో ఉన్న పాత్రకు నువ్వయితే బాగుంటుంది’ అన్నారు. ఆయన అలా అంటారని నేనూహించలేదు. సహాయ  దర్శకురాలిగా చేర్చుకుంటారేమో అనుకున్నాను. కానీ, ఒక క్యారెక్టర్ చేయమన్నారు. అప్పటికే నేను ఆర్టిస్ట్‌గా కొనసాగాలను కుంటున్నా కాబట్టి, ఓకే చెప్పేశాను. కథ వినగానే, ‘సార్.. మీరు మనసు మార్చుకోకూడదు. ఈ అవకాశం నాకే ఇవ్వాలి’ అన్నాను.
 
 అమితాబ్ బచ్చన్ వంటి బిగ్ స్టార్‌తో నటించాలన్నప్పుడు భయం వేయలేదా?
  
 ఈ సినిమా షూటింగ్ ప్రారంభించక ముందు అమితాబ్ సార్‌ను ఓ షూటింగ్ లొకేషన్లో కలిశాను. ఆయనకు ముందు నమస్తే పెట్టాలా? పాదాలకు నమస్కరించాలా? అని తికమకపడిపోయాను. తీరా ఆయన దగ్గరికెళ్లగానే, ఆప్యాయంగా షేక్ హ్యాండ్ ఇచ్చి, కూర్చోమన్నారు. చాలా బాగా మాట్లాడారు. దాంతో కొంచెం భయం పోయింది. ‘షమితాబ్’ లొకేషన్లో నా నటనను ఆయన మెచ్చుకుంటే, ఏడుపొచ్చేసింది. నా జీవితంలో నేనెప్పుడూ గురికానంత ఉద్వేగానికి గురయ్యాను.
 
 మీ మాతృభాష తమిళం కన్నా హిందీ, ఇంగ్లిష్ బాగా మాట్లాడుతున్నారే?!
 
 నేను తమిళం పట్టి పట్టి మాట్లాడుతున్నట్లనిపిస్తోంది కదూ! 2009 నుంచి ముంబయ్‌లో ఉంటున్నాను. అక్కడ తమిళం మాట్లాడేవాళ్లను వేళ్ల మీద లెక్కపెట్టొచ్చు. హిందీ, ఇంగ్లిష్ మాట్లాడడం వల్ల తమిళ భాషతో సాన్నిహిత్యం పోయింది.
    
 మీ చెన్నయ్ జీవితం గురించి చెబుతారా?
 
 ఎంతైనా.... చెన్నై నా హోమ్ టౌన్ కదా.. అక్కడి జీవితాన్ని మర్చిపోలేను. మెరీనా బీచ్, గోల్డెన్ బీచ్‌లలో చేసిన అల్లరి ఇంకా జ్ఞాపకం ఉంది. అక్కడి ఇడ్లీ, సాంబార్ రుచి గురించి చెప్పనక్కర్లేదు. ముంబయ్‌లో వడ పావ్‌లూ, భేల్‌పురీలు బాగానే ఉన్నా.. చిన్నప్పట్నుంచీ అలవాటుపడిన ప్రాణం కదా... అందుకని అప్పుడప్పుడూ మనసు ఇడ్లీ, సాంబార్ వైపు లాగుతుంటుంది (నవ్వుతూ).
      
 ఇంతకీ, మీరు ఎంతవరకూ చదువుకున్నారు?
 
 ప్లస్ 1తో సరిపెట్టేశాను. ఇంటర్ సెకండ్ ఇయర్ చేద్దామని ప్రయత్నించాను కానీ, నా వల్ల కాలేదు. దాంతో వదిలేశాను.
  
 అదేంటీ... చదువు మీద ఆసక్తి ఉండేది కాదా?
 
  అదేంటో కానీ, ఆట పాటల మీద ఉన్న శ్రద్ధ చదువు మీద ఉండేది కాదు. నేను మంచి డ్యాన్సర్‌ని. అది నేర్చుకోవడంలో ఉన్నంత ఆసక్తి చదువులో లేకపోవడంతో మార్కులు తక్కువ వచ్చేవి.
 
  ఏదో ఒక డిగ్రీ ఉండాలంటారు! మరి, అమ్మానాన్న ఏమీ అనలేదా?
 
 ఎంత ప్రయత్నించినా నాకు ఏకాగ్రత కుదరడం లేదని వాళ్ళూ అర్థం చేసుకున్నారు. దాంతో నన్ను ఒత్తిడి చేయలేదు. కానీ, ఖాళీగా మాత్రం ఉండొద్దన్నారు. నిజమే కదా! అసలేమీ చేయకుండా జీవితం మొత్తం ఎలా ఉండగలుగుతాం? అందుకే, డెరైక్షన్ డిపార్ట్‌మెంట్‌లో చేరాను.
 
 ముంబయ్‌లో శ్రుతి విడిగా ఇల్లు తీసుకుని, ఒంటరిగా ఉంటున్నారు! మీరు?
 
 నేను అమ్మతో కలిసి ఉంటున్నాను. ఒంటరిగా ఉండేంత పరిణతి నాకు లేదు. పెద్దవాళ్ల గెడైన్స్ ఉండాల్సిందే!
      
 కమలహాసన్ అందగాడు. సారిక, శ్రుతీహాసన్ అందగత్తెలు. మీరూ అంతే! అసలు బాహ్య సౌందర్యానికి మీరెంతవరకు ప్రాధాన్యం ఇస్తారు?
  
 అస్సలు ఇవ్వను. నేను అందంగా ఉన్నానంటే అది నా గొప్పతనం కాదు. నన్ను ఇంత అందంగా పుట్టించిన ఆ దేవుడిది. అందుకే మన చేతుల్లో లేని బాహ్యసౌందర్యం కన్నా మానసికంగా అందంగా ఉండాలి.
      
 మీ అంతః సౌందర్యం గురించి చెప్పడానికి చిన్న ఉదాహరణ?
  
 చిన్నప్పుడు రోడ్డు మీద ఎవరైనా ఆకలేస్తోంది అని అడిగితే, నా బ్యాగులో ఎంత డబ్బుంటే అంత ఇచ్చేసేదాన్ని. అఫ్‌కోర్స్ వేలకు వేలు ఉండేవి కాదనుకోండి. ప్యాకెట్ మనీ ఉండేది. క్యాంటీన్‌లో శ్నాక్స్ కొనుక్కోవడం కోసం ఉంచుకునేదాన్ని. ఆ డబ్బు ఇస్తున్నప్పుడు... ‘ఇంటికెళ్లగానే మనకు కోరుకున్న తిండి ఉంటుంది. ఇప్పుడీ క్యాంటీన్‌లో తినకపోతే ఏం’ అనుకునేదాన్ని. ఇప్పటికీ అదే మనస్తత్వం ఉంది.
      
 ఈ గుణం మీ తల్లితండ్రుల్లో ఎవరి నుంచి వచ్చింది?
 
 ఇద్దరికీ సేవాగుణం ఉంది. అదే నాకూ వచ్చింది.
    
 నాన్నగారికి దేవుడంటే నమ్మకం లేదు. శ్రుతీహాసన్ నమ్ముతారు. మీరు...?
 
 ఏదో శక్తి ఉందని నమ్ముతాను. కానీ, విగ్రహారాధన మీద నమ్మకం లేదు. అక్క మాత్రం విగ్రహ పూజ చేస్తుంది. అలాగని, నా ఇష్టాన్ని వ్యతిరేకించదు. మా ఇంట్లో ఉండే బ్యూటీయే అది. ఒకరి మనోభావాలను మరొకరం గౌరవించుకుంటాం.
    
 ఒకవేళ మీ కుటుంబ సభ్యులందరూ కలిసి సినిమా చేసే అవకాశం వస్తే...?
 
 ఇప్పుడైతే నేను వెనక్కి తగ్గుతాను. నాన్నగారు మంచి నటుడు. అమ్మ కూడా అంతే. అక్క కూడా సూపర్. నేను చేసింది ఒక్క సినిమానే. మరో ఆరేడు సినిమాలు చేసిన తర్వాత అయితే ఒప్పుకుంటా.
 
 ఇక... మీ ప్రయాణం ఎటువైపు? నటనా.. దర్శకత్వమా?
 
 నటిగా కొనసాగాలనుంది. మంచి చిత్రాలను ఎన్నుకునే పని మీద ఉన్నా. అయితే, దర్శకత్వం వదిలే ప్రసక్తే లేదు. కచ్చితంగా అదీ చేస్తా!


 బాలీవుడ్ మెగాస్టార్ అమితాబ్‌బచ్చన్ రోజురోజుకూ అభిమానులకు మరింత దగ్గరవుతున్నాడు. ఎంత స్టార్‌డమ్ సంపాదించినా... ఎంతటి వారితోనైనా కలసిపోయే స్వభావి అమితాబ్. చిన్నా... పెద్దా అన్న తేడా లేకుండా ఏ హీరో సినిమాలో అయినా చేసేస్తున్న బిగ్ బీ తనకసలు ఇగోనే లేదంటున్నాడు.
 
 తమిళ కుర్ర హీరో ధనుష్‌తో కలసి నటించిన ‘షమితాబ్’ రిలీజ్‌కు సిద్ధంగా ఉంది. ఈ సందర్భంగా తన గురించీ కాస్త చెప్పుకున్నాడు మెగాస్టార్. ‘ఇతర నటుల గురించి నాకు తెలియదు. నావరకైతే... ఇగో అన్న పదమే లేదు. ఇప్పటికీ అదేంటో నాకు తెలియదు. అలాగే స్వప్రయోజనాలకు కూడా నా లైఫ్‌లో ఇంపార్టెన్స్ లేదు’ అని చెప్పాడీ షమితాబ్!


  డెబ్భై ఏళ్ల ఇళయరాజా తాజాగా వెయ్యో చిత్రానికి సంగీతం అందించి, సినీ సంగీత చరిత్రలో ఒక కొత్త అధ్యాయానికి తెర తీశారు. సంగీతాభిమాని అయిన దర్శకుడు ఆర్. బల్కికి గతంలో ‘చీనీ కవ్‌’, ‘పా’, తాజాగా ‘షమితాబ్’ చిత్రాలకు సంగీతమిచ్చారు ఇళయరాజా. ‘‘బల్కి నాకు వీరాభిమాని. నా పాటలన్నీ ఆయనకు బాగా తెలుసు. అయితే, అచ్చంగా నా పాత హిట్ పాటల లాంటివే కావాలని అడగడం మాత్రం నచ్చదు’’ అని నవ్వేశారు ఇళయరాజా.
  
  తనను తాను రిపీట్ చేసుకోవడం కూడా ఇష్టపడని ఇళయరాజా, అమితాబ్ నటిస్తున్న ‘షమితాబ్’కు పూర్తిగా కొత్త బాణీలే అందించారు. ‘‘అమితాబ్ చాలా అద్భుతమైన వ్యక్తి. మంచి గాయకుడు కూడా. గతంలో ఆయన పాడినవి బల్కి నాకు వినిపించారు. శ్రుతి మీద మంచి పట్టున్న అమితాబ్ కోసం  ‘షమితాబ్’లో పాట చేసి, ఆయన శ్రుతికి తగ్గట్లుగా మార్చి, పాడించా. ఆయన చాలా బాగా పాడారు’’ అని రాజా చెప్పుకొచ్చారు. కమలహాసన్ సంగతి చెప్పుకొస్తూ, ‘‘ఆయన చాలా మంచి గాయకుడు.
  
   అతనిది బ్రహ్మాండమైన గొంతు. సంగీతంలోనూ, నటనలోనూ ఆయన గ్రహణశక్తి కూడా అద్భుతం. అప్పటి దాకా జోకులు వేస్తూ ఉండే కమల్, దర్శకుడు యాక్షన్ చెప్పగానే పూర్తిగా ఆ పాత్రలోకి మారిపోయి అపూర్వంగా నటిస్తాడు’’ అని ఇళయరాజా తన అనుభవాన్ని వివరించారు. మరి, రజనీకాంత్ మాటేమిటంటే, ‘‘రజనీ మంచి దర్శకుడు. అద్భుతమైన స్క్రీన్‌ప్లే రచయిత. ఆ మాటే ఆయనతో అంటూ, మీ సినిమాలకు మీరే ఎందుకు రాయకూడదంటే, ఆ పని భిన్నమైనది స్వామీ అంటూ నవ్వేశాడు’’ అని ఈ సంగీత జ్ఞాని గుర్తుచేసుకున్నారు.