సాక్షి ప్రతినిధి, న్యూఢిల్లీ: పార్లమెంటు శీతాకాల సమావేశాలను ప్రభుత్వం జాప్యం చేస్తుండటంపై ప్రతిపక్షాల విమర్శలు పెరుగుతున్న నేపథ్యంలో వచ్చే నెల 15 నుంచి సమావేశాలు ప్రారంభం కావొచ్చనే సంకేతాలు వెలువడుతున్నాయి. వచ్చే ఏడాది జనవరి 5 వరకు శీతాకాల సమావేశాలు కొనసాగుతాయని విశ్వసనీయవర్గాల సమాచారం. అయితే ప్రభుత్వం దీనిపై ఎలాంటి ప్రకటనా విడుదల చేయలేదు. బ్యాంకుల్లో అప్పులకు సంబంధించిన దివాలా చట్టంపై ప్రభుత్వం ఆర్డినెన్స్‌ తెస్తోంది. దానిపై రాష్ట్రపతి సంతకం చేయగానే ప్రభుత్వం సమావేశాల తేదీలను లాంఛనంగా ప్రకటించనుంది. బుధవారం మంత్రివర్గ సమావేశానికి ముందు ప్రధాని మోదీ, హోం మంత్రి రాజ్‌నాథ్‌ సింగ్, ఆర్థిక మంత్రి జైట్లీ తదితరులు భేటీ అయ్యి ఈ నిర్ణయాలు తీసుకున్నారు. నిబంధనల ప్రకారం సమావేశాలు ప్రారంభమవడానికి 15 రోజుల ముందే తేదీలు ప్రకటించాల్సి ఉన్నందున నెలాఖరుకల్లా అధికారికంగా తేదీలు వెల్లడయ్యే అవకాశం ఉంది. జనవరి తొలి వారం వరకు శీతాకాల సమావేశాలు కొనసాగినా, అదే నెల చివరి వారంలోనే బడ్జెట్‌ సమావేశాలు కూడా ప్రారంభమవుతాయనీ, ఫిబ్రవరి 1నే బడ్జెట్‌ను ప్రవేశపెడతారని విశ్వసనీయ వర్గాలు తెలిపాయి. 


 సాక్షి, హైదరాబాద్‌: నవంబర్‌ నెలాఖరు కల్లా తెలంగాణ బిల్లు పార్లమెంట్‌లో తప్పక ఆమోదం పొందగలదని టీఆర్‌ఎస్‌ పార్టీ అధ్యక్షుడు కె.చంద్రశేఖర్‌రావు భరోసాతో ఉన్నారు. మంగళవారం పార్టీ నేతలు కే కేశవరావు, వినోద్‌కుమార్‌, ఈటెల రాజేందర్‌, కడియం శ్రీహరి సహా పలువురు నేతలు కేసీఆర్‌తో సమావేశమయ్యారు. ఈ సందర్భంగా కేసీఆర్‌ పార్టీ నేతల వద్ద తెలంగాణ బిల్లు విషయం ప్రస్తావించారు.
 
  నవంబర్‌ 17వ తేదీ నుంచి పార్లమెంట్‌ శీతాకాల సమావేశాలు ప్రారంభం కావచ్చని, సమావేశాలు ప్రారంభమైన వారం రోజుల్లోపే కాంగ్రెస్‌ పార్టీ తెలంగాణ బిల్లు సభలో ప్రవేశపెట్టే అవకాశం ఉందని ఆయన వారితో చెప్పారు. తెలంగాణ రాష్ట్ర ఏర్పాటుకు సంబంధించిన బిల్లు ప్రక్రియ ఆగిపోయినట్లు పైకి కనిపిస్తున్నా.. ఇందుకు సంబంధించిన ప్రక్రియ కేంద్రంలో వేగంగానే సాగుతోందని కేసీఆర్‌ చెప్పారు. బిల్లుకు సంబంధించిన మొత్తం పనులు చాపకింద నీరులా పూర్తవుతున్నాయన్నారు.
 
  బుధవారం నాటి కేంద్ర మంత్రి వర్గ సమావేశంలో తెలంగాణ బిల్లు ప్రస్తావనకు వచ్చే అవకాశం లేదని, ఏదో ప్రత్యేక అంశంపై చర్చిం చేందుకు ఆ భేటీ జరుగుతోందన్నారు. బుధవారం తరువాత ఏ రోజు కేంద్ర మంత్రివర్గం సమావేశం జరిగినా తెలంగాణ బిల్లు ప్రస్తావనకు వస్తుందన్నారు. ఏది ఏమైనా అక్టోబర్‌ నెలలో ఈ బిల్లు ప్రక్రియకు సంబంధించిన పనులన్నీ పూర్తవుతాయని తెలిపారు. మరోపక్క రాష్ట్రంలో రాష్టప్రతి పాలన వచ్చే అవకాశాలే ఎక్కువగా ఉన్నాయని కేసీఆర్‌ పార్టీ నేతలతో వ్యాఖ్యానించారు. తెలంగాణ బిల్లు పార్లమెంట్‌లో ఆమోదం పొందిన వెంటనే రెండు రాష్ట్రాలు ఏర్పడినప్పటికీ... ఉద్యోగులు, నీళ్ల వాటా, ఆదాయపంపిణీ వంటి అంశాలు రాష్ట్ర విభజన తరువాతే మొదలవుతాయని, ఆ ప్రక్రియ పూర్తవడానికి దాదాపు ఐదు నెలల సమయం పట్టే అవకాశం ఉందని కేసీఆర్‌ పార్టీ నేతలకు వివరించారు.