సొగ్గాడే చిన్ని నాయనా సినిమాతో అందరి దృష్టిని ఆకర్షించిన దర్శకుడు కళ్యాణ్ కృష్ణ తన రెండో సినిమాను కూడా అన్నపూర్ణ స్టూడియోస్ బ్యానర్లోనే చేసేందుకు రెడీ అవుతున్నాడు. ఇప్పటికే ఈ మేరకు అక్కినేని నాగార్జున ప్రకటన కూడా విడుదల చేశారు. నాగాచైతన్య హీరోగా తెరకెక్కుతున్న సినిమాను కళ్యాణ్ కృష్ణ డైరెక్ట్ చేయనున్నాడు. ఇప్పటికే కథా కథనాలు కూడా రెడీ అయిన ఈ సినిమా త్వరలోనే సెట్స్ మీదకు వెళ్లనుంది.
 
 ముందుగా ఈ సినిమాకు నిన్నే పెళ్లాడతా అనే టైటిల్ను పెట్టాలని భావించినా.. ప్రస్తుతానికి ఆ ఆలోచనను విరమించుకున్నారట. తాజాగా ఈ సినిమా టైటిల్కు సంబందించి మరో ఇంట్రస్టింగ్ న్యూస్ టాలీవుడ్ సర్కిల్స్లో వినిపిస్తోంది. తన తొలి సినిమా తరహాలోనే ఈ సినిమాకు కూడా రొమాంటిక్ టైటిల్ను ఫిక్స్ చేశాడట దర్శకుడు కళ్యాణ్. నాగచైతన్య సరసన రకుల్ ప్రీత్ సింగ్ హీరోయిన్గా నటిస్తున్న ఈ సినిమాకు 'ఒకసారి ఇటు చూడు' అనే టైటిల్ ను ఫిక్స్ చేశారట. త్వరలోనే టైటిల్తో పాటు ఇతర వివరాలను అధికారికంగా ప్రకటించనున్నారు.