బాలీవుడ్‌ బ్యూటీలు ప్రియాంకా చోప్రా, అనుష్కా శర్మ కేవలం నటనపైనే దృష్టి పెట్టడం లేదు. నిర్మాతలుగానూ రాణిస్తున్నారు. ఇప్పుడీ జాబితాలో సీనియర్‌ నటి మాధురీ దీక్షిత్‌ కూడా చేరారు. ఆర్‌.ఎన్‌.ఎం. మూవింగ్‌ పిక్చర్స్‌ బ్యానర్‌ని ఆరంభించారు. స్వప్ననీల్‌ జయకర్‌ దర్శకత్వంలో త్వరలో ఓ మరాఠీ చిత్రాన్ని ఆమె నిర్మించనున్నారు. ‘‘సినిమా నిర్మాణ రంగంలో అడుగుపెట్టడం చాలా ఆనందంగా ఉంది. యోగేశ్‌ వినాయక్‌ జోషి ఈ సినిమాకి మంచి కథ అందించారు. మంచి టీమ్‌తో ఈ సినిమా నిర్మించబోతున్నాం. త్వరలోనే చిత్రీకరణ మొదలుపెట్టనున్నాం. ఇప్పటివరకూ చేసిన సినిమాల ద్వారా మంచి నటి అనిపించుకున్నా. ఈ సినిమాతో మంచి నిర్మాత అని కూడా అనిపించు కుంటా’’ అని మాధురి అన్నారు.