entertainment

బెంగళూరులో లైవ్ కాన్సర్ట్‌లు, మ్యూజిక్ ఈవెంట్లకు వెళ్లే అభిమానులకు ఇకపై మరింత మెరుగైన అనుభవం అందనుంది. ఎందుకంటే.. ప్రముఖ టెలికాం సంస్థ ఎయిర్‌టెల్, ఎంటర్‌టైన్‌మెంట్ ప్లాట్‌ఫామ్ డిస్ట్రిక్ట్ కలిసి కీలక భాగస్వామ్యాన్ని ప్రకటించాయి. ఇందులో భాగంగా బెంగళూరులో 16 ఎకరాల విస్తీర్ణంలో ఉన్న ఓపెన్ ఎయిర్ కాన్సర్ట్ వేదికకు ఇకపై ‘ఎయిర్‌టెల్ ఎరీనా’ (Airtel Arena) అని పేరు పెట్టనున్నారు.అయితే.. ఇది కేవలం పేరు మార్పు మాత్రమే కాదు.. ఈ వేదికలో డిజిటల్ సదుపాయాలను కూడా భారీగా మెరుగుపరచాలని రెండు సంస్థలు నిర్ణయించాయి. సాధారణంగా పెద్ద కాన్సర్ట్‌లు జరిగినప్పుడు వేలాది మంది ఒకేసారి మొబైల్ ఫోన్లు ఉపయోగిస్తుంటారు. దీంతో నెట్‌వర్క్ సమస్యలు తలెత్తడం, ఇంటర్నెట్ నెమ్మదించడం, ఫొటోలు, వీడియోలు అప్‌లోడ్ చేయలేకపోవడం వంటి ఇబ్బందులు ఎదురవుతుంటాయి.ఈ సమస్యలకు చెక్ పెట్టేందుకు ఎయిర్‌టెల్ ప్రత్యేకమైన హై కెపాసిటీ డిజిటల్ ఇన్‌ఫ్రాస్ట్రక్చర్‌ను ఏర్పాటు చేయనుంది. దీనివల్ల భారీ ఈవెంట్ల సమయంలో కూడా అభిమానులకు వేగవంతమైన ఇంటర్నెట్, మెరుగైన నెట్‌వర్క్ కనెక్టివిటీ అందించడమే లక్ష్యం. మరోవైపు డిస్ట్రిక్ట్ సంస్థ ఈ వేదికలో జరిగే ఈవెంట్లు, కళాకారులు, అభిమానులు, నిర్వాహకులకు సంబంధించిన అనుభవాలను పర్యవేక్షించనుంది.ఇప్పటికే ఈ కాన్సర్ట్ వేదికలో మొబైల్ ద్వారా ముందుగానే ఫుడ్ ఆర్డర్ చేసుకునే సదుపాయం, క్యాష్‌లెస్ టాప్‌అప్ వంటి డిజిటల్ సేవలు అందుబాటులో ఉన్నాయి. ఇప్పుడు కొత్తగా ఏర్పాటు చేయనున్న సదుపాయాలతో ఈ సేవలను మరింత మెరుగుపరచనున్నారు. రాబోయే ఈవెంట్ సీజన్ ప్రారంభానికి ముందే ఈ మార్పులను అందుబాటులోకి తీసుకురావాలని సంస్థలు భావిస్తున్నాయి.

ఇప్పటివరకు మనం ఇళ్లు, భూములు, బంగారం, వాహనాల కొనుగోళ్లు, అమ్మకాల గురించి విన్నాం, చూశాం. కానీ ‘ఫేస్‌వాల్యూ’అనే మాటను నిజం చేస్తూ... మనుషులు తమ ముఖాలను కూడా అమ్ముకునే రోజులు వచ్చేశాయని మీకు తెలుసా? వినడానికి వింతగా ఉన్నా, చైనా వినోద రంగంలో ఇప్పుడిదే లేటెస్ట్‌ ట్రెండ్‌! చైనాలో ప్రస్తుతం ఆర్టిఫిషియల్‌ ఇంటెలిజెన్స్‌ రూపొందించే షార్ట్‌ డ్రామాల పరిశ్రమ ఊహించని వేగంగా విస్తరిస్తోంది. రోజుకు వందలాది కొత్త వీడియోలు విడుదలవుతున్నాయి. అయితే, పరిమిత బడ్జెట్‌ కారణంగా ఒకే నటుడి ముఖం వేర్వేరు పాత్రల్లో, భిన్నమైన రూపాల్లో కనిపిస్తూ ఉండటంతో ప్రేక్షకులు విసుగెత్తిపోతున్నారు. ఒక వీడియోలో ప్రేమకథలో హీరోగా కనిపించిన వ్యక్తి... మరో వీడియోలో హంతకుడిగా, ఇంకో దాంట్లో డాక్టర్‌గా దర్శనమిస్తుండటంతో సోషల్‌ మీడియాలో మీమ్స్‌ వెల్లువెత్తుతున్నాయి. మరోవైపు కొత్త నటీనటులను ఎంపిక చేసి, షూటింగ్‌లు చేయడం నిర్మాతలకు భారీ ఖర్చుతో కూడుకున్న వ్యవహారంగా మారింది. ఈ సమస్యకు చెక్‌ పెట్టేందుకు కొందరు నిర్మాతలు ఫేస్‌ బయ్యింగ్‌ అనే క్రేజీ ఐడియాను తెరపైకి తెచ్చారు. అందంగా ఉండి, ఎలాగైనా స్క్రీన్‌పై కనిపించాలనే కోరిక ఉన్న సామాన్యులను ఆహ్వానించి వారి ముఖాలను త్రీడీ స్కాన్‌ చేస్తున్నారు. ఆ తర్వాత సదరు వ్యక్తులతో ఒప్పందం కుదుర్చుకుని, కొంత డబ్బు ఇచ్చి వారి డిజిటల్‌ రూపాన్ని భద్రపరుచుకుంటారు. ఈ డిజిటల్‌ ఫేస్‌లను ఏఐ సాయంతో తమ డ్రామాలు, సిరీస్‌లలో వాడుకుంటారు. దీనివల్ల సదరు వ్యక్తులు ప్రత్యక్షంగా షూటింగ్‌కు రావాల్సిన అవసరమే ఉండదు. అయితే, ఒక్కసారి ఆ ఒప్పందంపై సంతకం చేస్తే... తమ ముఖాలపై ఆ అమ్మకందారులకు ఎలాంటి హక్కులు ఉండవు. అయినా ఫర్వాలేదంటూ కేవలం 500 యువాన్లు (సుమారు రూ. 6 వేలు) ఆశపడి చాలామంది తమ ముఖ హక్కులను నిర్మాతలకు రాసిచ్చేస్తున్నారట. డిజిటల్‌ అస్తిత్వానికే ప్రమాదమా? ప్రస్తుతం ప్రపంచవ్యాప్తంగా హాట్‌ టాపిక్‌గా మారిన ఈ ట్రెండ్‌పై సాంకేతిక నిపుణులు తీవ్ర ఆందోళన వ్యక్తం చేస్తున్నారు. ఒక్కసారి మన డిజిటల్‌ ఫేస్‌ డేటా ఇతరుల చేతుల్లోకి వెళ్తే, దాన్ని ఎక్కడ, ఎలా ఉపయోగిస్తారనే దానిపై మనకు ఎలాంటి నియంత్రణ ఉండదు. భవిష్యత్తులో ఈ డేటాను సైబర్‌ నేరాలు, డీప్‌ఫేక్‌ వీడియోలు, నకిలీ ప్రకటనలకు ఉపయోగించే ప్రమాదం ఉందని హెచ్చరిస్తున్నారు. కొద్దిపాటి డబ్బు కోసం మన డిజిటల్‌ గుర్తింపునే శాశ్వతంగా అమ్మేసుకోవడం... నిజంగా లాభమా? లేక కొరివితో తలగోక్కున్నట్టా? అన్న ప్రశ్న ఇప్పుడు చర్చనీయాంశంగా మారింది.-సాక్షి, సెంట్రల్‌ డెస్క్‌

రిలయన్స్ జియో తన మొబైల్ వినియోగదారుల కోసం మరో సంచలన ప్యాక్‌ను మార్కెట్లోకి తీసుకువచ్చింది. అందుబాటు ధరలో అపరిమిత వినోదాన్ని అందించడమే లక్ష్యంగా ‘జియోటీవీ ప్రో ప్యాక్’ను ప్రవేశపెట్టింది. కేవలం రూ.55 ధరతో లభించే ఈ రీఛార్జ్ ప్లాన్ ద్వారా వినియోగదారులు సరికొత్త వినోదాన్ని ఆస్వాదించవచ్చని చెప్పింది.30 రోజుల వాలిడిటీ.. 1,000కు పైగా ఛానళ్లు!ఈ ప్యాక్ ద్వారా వినియోగదారులు ‘జియోటీవీ’ మొబైల్ యాప్‌లో 30 రోజుల పాటు ఏకంగా 1,000కు పైగా లైవ్ టీవీ ఛానళ్లను వీక్షించవచ్చు. ఇందులో వినియోగదారులు సాధారణ ఛానళ్లతో పాటు 150కు పైగా ప్రీమియం ఛానళ్లను కూడా అదనపు ఖర్చు లేకుండా చూడవచ్చు. సామాన్య వినియోగదారులను దృష్టిలో ఉంచుకుని జియో ఈ ప్లాన్‌ను డిజైన్ చేసినట్లు చెప్పింది. 16కు పైగా భాషల్లో జనరల్ ఎంటర్‌టైన్‌మెంట్, సినిమాలు, వార్తలు, పిల్లల కార్యక్రమాలు, లైఫ్‌స్టైల్, ప్రాంతీయ కార్యక్రమాలకు చెందిన విస్తృతమైన కంటెంట్ ఈ ప్యాక్‌లో లభిస్తుంది.ప్రముఖ నెట్‌వర్క్‌ల ప్రీమియం కంటెంట్జియోటీవీ ప్రో ప్యాక్‌లో జియోస్టార్, సోనీ ఎంటర్‌టైన్‌మెంట్, సన్ టీవీ నెట్‌వర్క్, వార్నర్ బ్రదర్స్ డిస్కవరీ, స్టార్‌ప్లస్ హెచ్‌డీ, కలర్స్ హెచ్‌డీ, సోనీ ఎంటర్‌టైన్‌మెంట్ టెలివిజన్ హెచ్‌డీ, సోనీ ఎస్‌ఏబీ హెచ్‌డీ, డిస్కవరీ, అనిమల్ ప్లానెట్.. వంటి ఛానళ్లు అందుబాటులో ఉన్నాయి.అయితే, క్రీడాభిమానులు ఒక విషయాన్ని గుర్తుంచుకోవాలి. జియోస్టార్, సోనీ నెట్‌వర్క్‌లకు చెందిన స్పోర్ట్స్ ఛానళ్లు మాత్రం ఈ రూ.55 ప్యాక్‌లో భాగం కావు.యాక్టివేషన్ సులభం.. ఎలా పొందాలంటే?మొదట మీ మొబైల్ నంబర్‌కు రూ.55 జియోటీవీ ప్రో ప్యాక్‌తో రీఛార్జ్ చేసుకోవాలి. అనంతరం జియోటీవీ యాప్ ఓపెన్ చేసి జియో మొబైల్ నంబర్‌తో లాగిన్ అవ్వాలి. లాగిన్ అయిన వెంటనే లైవ్ టీవీ సేవలు నిరంతరాయంగా ప్రారంభమవుతాయి.నిబంధనలు.. ఫీచర్లుఈ రూ.55 ప్యాక్ కేవలం వినోద సేవలకు మాత్రమే పరిమితం. ఇందులో ఉచిత వాయిస్ కాల్స్ లేదా ఎస్‌ఎంఎస్ ప్రయోజనాలు ఉండవు. ఈ సేవను వినియోగించుకోవాలంటే కస్టమర్ మొబైల్‌లో ఏదైనా ఒక యాక్టివ్ జియో ప్రీపెయిడ్ లేదా పోస్ట్‌పెయిడ్ ప్లాన్ రన్ అవుతూ ఉండాలి. జియోటీవీ యాప్ ద్వారా కేవలం ఒకే ఒక్క మొబైల్‌లో ఈ సేవలను వీక్షించవచ్చు. ప్రస్తుతం ఈ రూ.55 జియోటీవీ ప్రో ప్యాక్ మైజియో యాప్, జియో అధికారిక వెబ్‌సైట్‌తో పాటు దేశవ్యాప్తంగా ఉన్న అన్ని ఆన్‌లైన్, ఆఫ్‌లైన్ జియో రీఛార్జ్ కేంద్రాల్లో వినియోగదారులకు అందుబాటులో ఉంది.ఇదీ చదవండి: చల్లబడిన బంగారం ధర.. తులం ఎంతంటే..