‘డ్రెస్‌ని ఖరీదుతో చూడకూడదు. ఆ డ్రెస్‌ కలర్, ఫిటింగ్‌ మనకు ఎంత బాగా నప్పాయి... అనేవి చెక్‌ చేసుకొని తీసుకోవాలి’ అంటున్నారు హైదరాబాద్‌లోని భరత్‌నగర్‌ వాసి రాధ పర్వతరెడ్డి. తక్కువ బడ్జెట్‌లో డ్రెస్‌ డిజైనింగ్‌ని స్పెషల్‌గా, కంఫర్ట్‌గా, క్రియేటివ్‌గా ఎలా ప్లాన్‌న్‌ చేసుకుంటున్నారో వివరిస్తున్నారు.‘‘ఎంత సింపుల్‌గా రెడీ అయితే అంత గ్రేస్‌ఫుల్‌గా కనిపిస్తాం. అందుకే నా వార్డ్‌ రోబ్‌లో ప్లెయిన్‌ శారీస్‌కు ఎక్కువ చోటు ఉంటుంది. ప్లెయిన్‌ సిల్క్‌ శారీస్‌ జాబితా ఎక్కువే ఉంటుంది. వాటిలోనూ లైట్‌ కలర్స్‌వే తీసుకుంటాను. వీటికి కాంట్రాస్ట్‌ కలర్‌లో ఉన్న కాటన్‌ ప్రింటెడ్‌ బ్లౌజ్‌తో మ్యాచ్‌ చేస్తాను. పొడవుగా ఉన్నవారికి ఈ కాంబినేషన్‌ చీరలు బాగుంటాయి. గెట్‌ టు గెదర్‌ పార్టీలకు ఈ స్టైల్‌ బాగా నప్పుతుంది. బడ్జెట్‌ ఫ్రెండ్లీగా ప్లాన్‌ చేసుకునే సదుపాయం ఉంది. యూ ట్యూబర్‌ని కాబట్టి స్పెషల్‌ లుక్స్‌ కోసం ట్రై చేస్తుంటాను. ఈ కాంబినేషన్‌కి హెయిర్‌ పట్ల శ్రద్ధ తీసుకోవాలి. నా జుట్టు పొడవుగా ఉంటుంది. శారీ కట్టుకుంటే మాత్రం జుట్టుకి ఒక చిన్న క్లిప్‌ పెట్టుకొని, మిగతా హెయిర్‌ అంతా లీవ్‌ చేస్తుంటాను. జుట్టు బాగుంటే డ్రెస్సింగ్‌ కూడా బాగుంటుంది కాబట్టి, హెయిర్‌ కేర్‌ విషయంలో చాలా జాగ్రత్తలు తీసుకుంటాను. చందేరీ స్పెషల్‌దుపట్టా పెద్దగా ఉండే చుడీదార్స్‌ అంటే ఇష్టం. వీటిలోనూ లైట్‌ కలర్స్‌కే పప్రాధాన్యత. రెడీ టు వేర్‌ ఉండే డ్రెస్సులు ఈ జాబితాలో ఉంటాయి. పండగల సమయాల్లో అయితే చందేరీ శారీస్‌ ఎంచుకుంటాను. చందేరీ చీరల రంగులు బాగుంటాయి. చూడటానికి ప్రత్యేకంగానూ ఉంటాయి. ఏ సంప్రదాయ వేడుకల్లోనైనా ఈ చీరలు బాగుంటాయి. బ్లౌజ్‌కి కొంచెం డిజైన్‌ ఉన్నా ఆకర్షణీయంగా కనిపిస్తుంది. నేను వీటికి కూడా ప్రింటెడ్‌ బ్లౌజ్‌లనే మ్యాచ్‌ చేసుకుంటాను. చందేరీ చీరల్లో బ్రైట్‌ రెడ్, గ్రీన్‌ కలర్స్‌ ఎంచుకుంటాను. పెళ్లి వేడుకల్లో పట్టు చీరలు, లెహంగాలు ఎంచుకుంటాను. లెహంగాకు మ్యాచ్‌ చేయడానికి కొంచెం స్టైల్స్‌లో మార్పుకు క్రాప్‌టాప్స్, మ్యాచింగ్‌ దుపట్టాలు సెలెక్ట్‌ చేసుకుంటాను.ప్రింటెడ్‌ బ్లౌజులుబ్లౌజ్‌ డిజైన్స్‌ కోసం ఎక్కువ ఖర్చు పెట్టడం అనే విషయానికి చాలా దూరంగా ఉంటాను. ప్రింటెడ్‌ కాటన్‌ మెటీరియల్స్‌ చాలా రకాల డిజైన్లలో మార్కెట్లో లభిస్తున్నాయి. వీటితో శారీ లుక్‌ స్పెషల్‌ అనిపించేలా డిజైన్‌ చేయిస్తాను. షార్ట్‌ స్లీవ్స్, స్ట్రాప్స్‌ .. యంగ్‌ లుక్‌ని మరింత ఎలివేట్‌ చేస్తాయి.సౌకర్యమే ఫస్ట్‌... టూర్స్‌కి వెళ్లినప్పుడు సౌకర్యానికే పప్రాధాన్యత. గంటల సమయాన్ని ప్రయాణంలోనే గడపాలి. అందుకని జీన్స్‌కు బదులు జెగ్గింగ్స్, టీ షర్ట్స్, నైట్‌ డ్రెస్‌లకే ఓటు వేస్తాను. ఎక్కువ లైట్‌ కలర్స్‌కి పప్రాముఖ్యం ఇచ్చినా నాకు ఇష్టమైన కలర్‌ మాత్రం బ్లాక్‌. లైట్‌–బ్లాక్‌ కలర్‌ కాంబినేషన్‌ డ్రెస్సులు నా వద్ద చాలానే ఉన్నాయి’’ అంటూ తన డ్రెస్‌ సెలక్షన్, కలెక్షన్‌ గురించి వివరించారు రాధ. (చదవండి: బాత్‌రూంలో ఎక్కువసేపు గడుపుతున్నారా..? స్ట్రాంగ్‌గా హెచ్చరిస్తున్న నిపుణులు)

లండన్‌: బ్రిటన్‌ పార్లమెంట్‌ ఎన్నికల్లో కన్జర్వేటివ్‌ పార్టీ ఓడిపోయింది. ఆ పార్టీ నేత రిషి సునాక్‌ ప్రధానమంత్రి పదవికి రాజీనామా చేశారు. లండన్‌లోని తన అధికారిక నివాసమైన 10 డౌనింగ్‌ స్ట్రీట్‌ గుమ్మం ఎదుట మీడియాతో మాట్లాడారు. ప్రధానిగా చివరి మాటలు చెప్పేసి వెళ్లిపోయారు. ఆయన భార్య అక్షతా మూర్తి వ్యవహారమే ఇప్పుడు చర్చనీయాంశంగా మారింది. ఆమెను విమర్శిస్తూ సోషల్‌ మీడియాలో చాలామంది పోస్టులు పెడుతున్నారు. జోకులు సైతం విసురుతున్నారు. ఆమె ధరించిన డ్రెస్సు ధరపై కూడా చర్చ జరుగుతోంది. రిషి సునాక్‌ మీడియాతో మాట్లాడుతున్న సమయంలో అక్షతా మూర్తి ఆయన వెనుకే గొడుగు పట్టుకొని నిల్చున్నారు. నీలం, తెలుపు, ఎరుపు రంగులతో కూడిన నిలువు, అడ్డం చారల డ్రెస్సును ధరించారు. ఈ డ్రెస్సు చాలామందికి నచ్చలేదు. ఆ సందర్భానికి అలాంటి వ్రస్తాలు నప్పలేదని అంటున్నారు. చూడడానికి ఎబ్బెట్టుగా ఉందని చెబుతున్నారు. డెస్సుపై క్యూఆర్‌ కోడ్‌ మాదిరిగా ఆ చారలేంటి అని ప్రశ్నిస్తున్నారు. అంతేకాదు అక్షతా మూర్తి డెస్సు ఖరీదు 395 పౌండ్లు(రూ.42,000). రిషి సునాక్‌ వెనుక ఆమె అలా గొడుగు పట్టుకొని నిల్చోవడం అస్సలు బాగా లేదని నెటిజన్లు విమర్శిస్తున్నారు. అక్షతా మూర్తి ప్రముఖ సాఫ్ట్‌వేర్‌ సంస్థ ఇన్ఫోసిస్‌ సహ వ్యవస్థాపకుడు నారాయణ మూర్తి, భారత రాజ్యసభ సభ్యురాలు సుధామూర్తి దంపతుల కుమార్తె అనే సంగతి తెలిసిందే.

సాక్షి, న్యూఢిల్లీ: శరీరాన్ని పూర్తిగా కప్పి ఉంచే పీపీఈ కిట్లు ధరించి... కరోనా రోగులకు సేవలందిస్తున్న డాక్టర్లు, నర్సులను చూస్తున్నాం. ఒళ్లంతా చెమటతో తడిసిపోతుంటే.. గంటల తరబడి విధులు నిర్వర్తించడం చాలాకష్టంతో కూడుకున్న పని. అలాంటి యోధుల కోసం చల్లని పీపీఈ కిట్లు వచ్చేశాయ్‌.. కోవ్‌–టెక్‌ వెంటిలేషన్‌ వ్యవస్థ అమరికతో ఉన్న ఈ కిట్లు ధరిస్తే ఫ్యాన్‌ కింద కూర్చొన్నట్లు ఉంటుందంటున్నారు ఆవిష్కర్త, ముంబైలోని కేజే సోమయ్య కళాశాలలో రెండో సంవత్సరం ఇంజనీరింగ్‌ చదువుతున్న నిహాల్‌సింగ్‌ వీటిని రూపొందించారు. వైద్యురాలైన తల్లి పడుతున్న కష్టం చూసి ఆమెకీ ఇబ్బందిని ఎలాగైనా తప్పించాలని తపనపడ్డాడు నిహాల్‌. అదే ఈ కూల్‌కిట్‌ ఆవిష్కరణకు దారితీసింది. ‘‘కరోనా యుద్ధవీరులైన ఆరోగ్య కార్యకర్తలు.. కోవ్‌–టెక్‌ సౌకర్యంతో ఉన్న పీపీఈ కిట్‌ ధరించడం వల్ల ఎంతో సౌలభ్యంగా ఉంటుంది. కోవ్‌–టెక్‌ వెంటిలేషన్‌ వ్యవస్థ పీపీఈ సూట్‌ను పూర్తి విభిన్నంగా మార్చుతుంది. పీపీఈ సూట్‌ ధరించిన వారికి ఎంతో సౌకర్యంగా, సౌలభ్యంగా, ఫ్యాన్‌ కింద కూర్చుకున్నట్టుగా హాయిగా ఉంటుంది’ అని నిహాల్‌ తెలిపాడు.   సాధారణ పీపీఈ కిట్లతో కూడా దీన్ని ధరించొచ్చు. వివిధ రకాల ఫంగస్‌ ఇన్ఫెక్షన్ల నుంచి రక్షణ కోసం కోవ్‌–టెక్‌లో వెంటిలేషన్‌ వ్యవస్థలో అత్యున్నత స్థాయి నాణ్యతా ప్రమాణాలతో కూడిన విడిభాగాలను ఉపయోగించామని నిహాల్‌ చెప్పారు. ప్రొటోటైప్‌ నమూనా రూపకల్పన, ఉత్పాదన తయారీ కోసం నేషనల్‌ ఇనిషియేటివ్‌ ఫర్‌ డెవలప్‌మెంట్‌ అండ్‌ హార్నెసింగ్‌ ఇన్నొవేషన్స్‌ (నిధి) సంస్థ నుంచి రూ. 10,00,000 నిహాల్‌కు అందడంతో ఈ ఆవిష్కరణ సాధ్యమైంది. కోవ్‌–టెక్‌ వెంటిలేషన్‌ వ్యవస్థ కోసం నిహాల్‌  ‘వాట్‌ టెక్నొవేషన్స్‌’ అనే స్టార్టప్‌ కంపెనీని స్థాపించారు. ఇప్పటికే 40 దాకా యూనిట్లను దేశవ్యాప్తంగా డాక్టర్లకు, ఎన్‌జీవోలకు అందించారు. మరో 100 యూనిట్లు తయారవుతున్నాయి. జూన్‌లో ఉత్పత్తిని పెంచి వాణిజ్యపరంగా మార్కెట్లోకి వెళ్లాలని నిహాల్‌ భావిస్తున్నాడు. కోవ్‌– టెక్‌ ధర రూ.5,499 మాత్రమే. భారీస్థాయిలో ఉత్పత్తి చేపట్టినపుడు దీన్ని ఇంకా తగ్గించాలని చూస్తున్నారు. ఇలాంటివే ఇతర పరికరాలు ఒక్కొక్కటి లక్షల రూపాయల దాకా ఉన్నాయి.       ఎలా పనిచేస్తుంది.. నడుముకు తగిలించుకునే బెల్ట్‌కు గుండ్రటి ఓ పరికరం ఉంటుంది. ఇందులో ఫ్యాన్‌ ఉంటుం ది. ఈ ఫ్యాన్‌ నుంచి పీపీఈ కిట్‌కు గాలిని తీసుకెళ్లే ట్యూబ్‌లు అనుసంధానమై ఉంటాయి. అత్యంత భద్రమైన ఫిల్టర్ల ద్వారా గాలి లోపలికి వెళుతుంది. కరోనా వైరస్‌తో పాటు ఎలాంటి ఇన్‌ఫెక్షన్లనైనా ఈ ఫిల్టర్లు వడకడతాయి. అలా స్వచ్ఛమైన గాలి ఈ ఫ్యాన్‌ ద్వారా పీపీఈ కిట్ల లోపలికి వెళుతుంది. ఫలితంగా దాన్ని ధరించిన వారికి నిరంతరం స్వచ్ఛమైన గాలి అందుతుంది. పీపీఈ కిట్‌ లోపల ఈ గాలి కలియతిరుగుతుంది కాబట్టి ఉక్కపోత ఉండదు. అలాగే ఈ మొత్తం వ్యవస్థను ఎయిర్‌ సీల్‌గా రూపొందించారు. అంటే వడపోసిన గాలి తప్పితే... మరెక్కడి నుంచి కూడా కలుషిత గాలి లోపలికి పోకుండా జాగ్రత్తలు తీసుకున్నారు. అలా ఇది పూర్తిగా సేఫ్‌ అన్నమాట. దీనికి అమర్చి ఉండే లిథియం అయాన్‌ బ్యాటరీతో ఇది పనిచేస్తుంది. బ్యాటరీ 6 నుంచి 8 గంటలు వస్తుంది. పీపీఈ కిట్‌ వేసుకొని... కోవ్‌– టెక్‌ను ఆన్‌చేస్తే కేవలం 100 సెకన్లలో తాజా చల్లగాలి సూట్‌ ధరించిన వారికి అందుతుంది. ఉక్కపోత, చెమట, ఊపిరి అందని భావన... ఇలాంటి అసౌకర్యాలన్నీ దూరమవుతాయి. తల్లి ఇబ్బంది చూడలేకే.. పుణేలోని ఆదర్శ క్లినిక్‌ వైద్యురాలు, తల్లి డాక్టర్‌ పూనం కౌర్‌ ఇబ్బంది చూడలేకే ఈ ఆవిష్కరణ చేసినట్లు నిహాల్‌ తెలిపారు. పీపీఈ సూట్లు ధరించినపుడు ఉక్కపోత, చెమటతో తడిసిపోతూ తానేకాక, తనతోపాటు పనిచేసే వారు కూడా పడే బాధలు ఇంటికి వచ్చిన సమయంలో అమ్మ చెప్పేవారు. వారికి ఎలా సహాయపడగలను అని ఆలోచించా. ఆ ఆలోచన నుంచే కోవ్‌– టెక్‌ రూపొందింది’’ అని నిహాల్‌ తెలిపారు. ఈ ఆవిష్కరణ తనని ఇంక్యుబేషన్‌ డిజైన్‌ లేబొరేటరీ నిర్వహించిన పోటీల్లో పాల్గొనేలా చేసిందన్నారు. 

డ్రెస్‌ చాలా బాగుంది.. ఎవరు డిజైన్‌ చేశారో! డ్రెస్‌ స్టైల్‌ కూడా అదుర్స్‌! ఇలాంటి మాటలే మాట్లాడుకున్నారు. రీసెంట్‌గా హైదరాబాద్‌లో జరిగిన ఫిల్మ్‌ఫేర్‌ ఫంక్షన్‌లో నటి అమలాపాల్‌ని చూసి. ఇంతకీ ఆ డ్రెస్‌ను డిజైన్‌ చేసింది ఎవరో చెప్పలేదు కదూ. అమలాపాల్‌నే డిజైన్‌ చేసుకున్నారు. పైన ఉన్న ఫొటోలో అమలాపాల్‌ ఉన్నది ఆ డ్రెస్‌లోనే. ‘‘ప్రతి మహిళలో రెడ్‌ షేడ్‌ ఉంటుంది. నేను నా రెడ్‌ను ధరించాను. నా డ్రెస్‌ డిజైనర్‌ పేరు చెప్పమని నన్ను చాలా మంది అడిగారు. అది నేనే అని చెప్పడానికి గర్వంగా ఉంది. టాలెంటెడ్‌ టైలర్‌ స్ట్రిచ్చింగ్‌ చేశారు’’ అన్నారు అమలాపాల్‌. నిజానికి ఫుల్‌ లెంగ్త్‌ డ్రెస్‌ చూస్తే ఈ బ్యూటీ ఎంతమంచి డిజైనరో అర్థమవుతుంది. భవిష్యత్తులో మరిన్ని వెరైటీ డ్రెస్సులు డిజైన్‌ చేసుకుంటారేమో.


 ‘అమ్మాయిలకు చదువుతోపాటు కర్రసాములో మెళకువలు నేర్పించండి. ఉద్యోగం చేయడానికి చదువు ఎంత ఉపయోగపడుతుందో గాని, తమను తాము రక్షించుకోవడానికి కర్రసాము నూటికినూరుపాళ్లు సహకరిస్తుంది’ అంటున్నారు అరుణ్‌జ్యోతి.ఎస్.లోఖండే! నల్గొండ వాసి అయిన అరుణ్‌జ్యోతి స్కూల్, కాలేజీలకు వెళ్లే విద్యార్థినులకు కర్రసాములో ఉచిత శిక్షణనిస్తున్నారు. అందుకోసం నాలుగేళ్లుగా తనూ సాధన చేస్తున్నారు. మహిళలకు ఉచిత యోగా శిక్షణ, పేపర్ క్రాఫ్ట్స్, మట్టితో విగ్రహాలు... ఇలా తన వంతుగా మహిళాభ్యుదయానికి కృషి చేస్తున్న నలభయ్యేఏళ్ల అరుణ్‌జ్యోతి ‘సమాజానికి నా వంతుగా ఏమిస్తున్నాను అనే ఆలోచనే నన్ను ఇలాంటివాటి వైపు నిరంతరం నడిపిస్తోంది’ అంటున్నారు.
  
  అభిరుచులే ఆసరాగా...
 
  ‘నాకు చిన్ననాటి నుంచి పర్యావరణం మీద ఉన్న ఇష్టంతో పేపర్ రీ సైక్లింగ్, వెజిటబుల్ అండ్ ఫ్రూట్ కార్వింగ్, మట్టి విగ్రహాల తయారీ చేసేదాన్ని. యోగా, డ్రెస్ డిజైనింగ్, డ్యాన్స్‌ల్లోనూ ప్రవేశం ఉంది. ఇప్పుడు ఎం.ఎ. చేస్తున్నాను. ఏ పని నేర్చుకున్నా అది నాతోనే ఆగిపోకూడదు. నలుగురికి పరిచయం చేయాలి అనుకుంటాను. మాకు లేడీస్ కార్నర్ షాప్ ఉంది. ఆ ఆదాయమే మా కుటుంబ పోషణ. మాకు ఓ బాబు. ఇంటర్మీడియెట్ చదువుతున్నాడు. ఇల్లు, షాప్ చూసుకుంటూనే సమయాన్ని కుదుర్చుకుని నా అభిరుచులకు పదునుపెట్టుకుంటూ, నా చుట్టూ ఉన్నవారికి శిక్షణ ఇస్తూ ఉంటాను. వీటికి మావారు సతీష్ ప్రోత్సాహం ఎంతగానో ఉంది.
  
  కర్ర పడితే... బడితె పూజే...
 
  అమ్మాయిలపై జరుగుతున్న అకృత్యాలను, దారుణాలను విన్నప్పుడల్లా ఏదో తెలియని బాధ. అలాంటి ఆవేదనేదో పురిగొల్పి... నాలుగేళ్ల క్రితం కర్రసాము నేర్చుకున్నాను. ఆ తర్వాత మా చుట్టుపక్కల అమ్మాయిలకు ఈ విద్య నేర్పిస్తే బాగుంటుందనుకున్నా. కర్రసాము మన రాష్ట్రానికే ప్రత్యేకమైన ప్రాచీన కళ. రాను రాను ఇది మరుగునపడిపోతోంది. కర్ర తిప్పడం వచ్చిన వారికి రోడ్డు మీద ఏదైనా ప్రతికూల సంఘటన ఎదురైతే ఎంత చిన్న కర్రతో అయినా తమను తాము రక్షించుకోవచ్చు. ఎదుటివారిని కూడా రక్షించవచ్చు. కర్రసాము వల్ల శారీరక, మానసిక ఆరోగ్యంలోనూ సమతౌల్యత ఏర్పడుతుంది. నా వంతుగా పదిమంది అమ్మాయిలకైనా ఆత్మరక్షణకు పనికొచ్చే విద్యను నేర్పాలని, మాల్‌బౌలి శిశుమందిర్‌లో వారాంతంలో కర్రసాము శిక్ష ణా తరగతులు తీసుకుంటున్నా. నా దగ్గర శిక్షణ తీసుకునే అమ్మాయిలంతా నిరుపేద కుటుంబాలకు చెందినవారే!
  
  ఇల్లిల్లూ తిరుగుతూ...
 
  మొదట్లో రోజూ ఉదయం పూట కర్రసాములో శిక్షణ ఇచ్చేదాన్ని. అమ్మాయిలు కూడా బాగా ఆసక్తి చూపేవారు. చిన్నవయసు కావడంతో వాళ్ల ఏకాగ్రత అమోఘంగా ఉంటుంది. కాని అమ్మాయిల తల్లిదండ్రులు చదువుపట్ల చూపించినంత శ్రద్ధ, కర్రసాము పై చూపించడం లేదు. దీంతో రెండు మూడు రోజులు వచ్చి, మానేసేవారు. అమ్మాయిలను సాధన కోసం రప్పించడం చాలా కష్టమవుతుంది. అలాగని వదిలేయకుండా ప్రతి ఒక్కరి ఇంటికి వెళ్లి ఈ విద్య గురించి, ప్రాముఖ్యత గురించి ఇప్పటికీ చెబుతున్నాను. స్టేజ్ పైన అమ్మాయిలతో కర్రసాము ప్రోగ్రామ్స్ ఇప్పించడానికైతే పెద్దయజ్ఞమే చేయాల్సి వస్తోంది.
 
 అమ్మాయిల తల్లిదండ్రుల్లో కొందరు ‘ఆడపిల్లలకు ఇదంతా ఎందుకు? అన్నట్టు కొంత చిరాగ్గా మాట్లాడుతుంటారు. బాధనిపిస్తుంది. కాని వదిలే యను. వెంటబడి మరీ ప్రోగ్రామ్‌లు ఇప్పిస్తారు. అది చూసి తర్వాత వారే సంతోషించి, మెచ్చుకుంటారు. ఇప్పటికీ చూసినవాళ్లందరూ కర్రసాము విద్యను మెచ్చుకుంటారు. కరాటేకంటే మంచి విద్య అంటారు. మా పిల్లలు కూడా నేర్చుకుంటే బాగుండు అంటారు. కాని సాధనకు పంపించడానికి వెనుకంజ వేస్తున్నారు. ఇప్పటివరకు 30 మంది అమ్మాయిలు ఈ కళను నేర్చుకున్నారు. ఇప్పుడు మరో పదిహేను మంది శిక్షణ తీసుకుంటున్నారు.
  
  అమ్మాయిలు అన్ని రంగాల్లో తమ ప్రతిభను చాటుతున్నారు. కాని తమను తాము రక్షించుకోవడంలో మాత్రం ఇంకా వెనకబడే ఉంటున్నారు. అమ్మాయిల తల్లిదండ్రులను నేను కోరేదొక్కటే...  తమకు తామే రక్షణగా ఉండేలా కూతుళ్లను తీర్చిదిద్దండి.’
  
  - నిర్మలారెడ్డి