ఈ నెల 27న టీజర్‌తో, వచ్చే నెల (అక్టోబర్‌) 17న ట్రైలర్‌తో, నవంబర్‌ 17న సినిమాతో వస్తున్నాడీ ‘ఖాకి’. ఈ సెవెన్‌ సెంటిమెంట్‌ ఏంటో మరి!? మధ్యలో పాటలతోనూ ఓసారి వస్తాడు. అదెప్పుడనేది త్వరలో తెలుస్తుంది. కార్తీ, రకుల్‌ జంటగా నటించిన తమిళ సినిమా ‘ధీరన్‌ అదిగారమ్‌ ఒండ్రు’. హెచ్‌. వినోద్‌ దర్శకుడు. ఈ చిత్రాన్ని తెలుగు ప్రేక్షకుల ముందుకు ‘ఖాకి’గా తీసుకొస్తున్నారు ‘ఆదిత్యా మ్యూజిక్‌’ అధినేత ఉమేశ్‌ గుప్తా. ద పవర్‌ ఆఫ్‌ పోలీస్‌... అనేది ఉపశీర్షిక. ఉమేశ్‌ గుప్తా మాట్లాడుతూ– ‘‘2005లో జరిగిన వాస్తవ ఘటనల ఆధారంగా రూపొందిన చిత్రమిది. పవర్‌ఫుల్‌ పోలీస్‌గా కార్తీ నటన, ఆయన ఫిజిక్‌ సిన్మాకి హైలైట్స్‌గా నిలుస్తాయి. కథ వినగానే ఎట్టి పరిస్థితుల్లోనూ తెలుగు ప్రేక్షకులకు ఈ సినిమా చూపించాలని రైట్స్‌ తీసుకున్నాం. జిబ్రాన్‌ మంచి పాటలతో పాటు రీ–రికార్డింగ్‌ను అద్భుతంగా చేస్తున్నారు’’ అన్నారు. ఈ చిత్రానికి కెమెరా: సత్యన్‌ సూరన్, సంగీతం: జిబ్రాన్, నిర్మాతలు: ఉమేశ్‌ గుప్తా, సుభాష్‌ గుప్తా.


 పరెషానురా.. పరెషానురా.. అవును. రకుల్‌ప్రీత్‌సింగ్‌ను చూస్తే కుర్రకారుకు పరేషానే. అంత అందంగా ఉంటారు. ప్రస్తుతం తెలుగులో అగ్రనాయికల్లో ఒకరుగా దూసుకెళుతున్నారామె. గతంలో తమిళంలో రెండు, మూడు సినిమాలు చేసిన ఈ బ్యూటీ ఈ ఏడాది అక్కడ కూడా స్టార్‌ హీరోయిన్ల లిస్ట్‌లో చేరే అవకాశం ఉంది. మహేశ్‌బాబు హీరోగా తెలుగు, తమిళ భాషల్లో రూపొందుతున్న సినిమాలో నటిస్తున్నారామె.
 ఇది కాకుండా తమిళంలో కార్తీ సరసన ‘ధీరన్‌ అధికారం ఒండ్రు’ అనే సినిమాలో నటిస్తున్నారు. తాజాగా ఆయన అన్న సూర్య సరసన సినిమా చేసే బంపర్‌ ఆఫర్‌ దక్కించుకున్నారని చెన్నై కోడంబాక్కమ్‌ సమాచారం. ఇటీవల ‘సింగం 3’ హిట్‌తో మాంచి ఊపు మీదున్న సూర్య ప్రస్తుతం విఘ్నేష్‌ శివన్‌ దర్శకత్వంలో హిందీ చిత్రం ‘స్పెషల్‌ ఛెబ్బీస్‌’ రీమేక్‌ ‘తానా సేంద కూట్టమ్‌’లో నటిస్తున్నారు. ఆ చిత్రం తర్వాత సెల్వరాఘవన్‌ దర్శకత్వంలో ఓ సినిమా చేయనున్నారు. ఇందులోనే సూర్యకు జోడీగా రకుల్‌ను ఎంచుకున్నారట.


 ధీరన్  అధికారం ఒండ్రు చిత్రం గుజరాత్‌లో చిత్రీకరణకు సిద్ధం అవుతోంది.యువ స్టార్‌ హీరో కార్తీ నటిస్తున్న తాజా చిత్రం ధీరన్  అధికారం ఒండ్రు. ఈయన కాష్మోరా తరువాత ప్రఖ్యాత దర్శకుడు మణిరత్నం దర్శకత్వంలో కాట్రువెలియిడై చిత్రాన్ని పూర్తి చేశారు. ఇది మణిరత్నం స్టయిల్‌లో విభిన్న ప్రేమ కథా చిత్రంగా తెరకెక్కుతోంది. రోజా చిత్రం తరువాత అధిక భాగం చిత్రీకరణను కాశ్మీర్, ఊటీ, నిలగిరి ప్రాంతాల్లో జరుపుకున్న చిత్రం కాట్రువెలియిడై.
 ముంబై బ్యూటీ అధితి హైదరి నాయకిగా నటిస్తున్న ఇందులో శ్రద్ధాశ్రీనాథ్, ఆర్‌జే.బాలాజీ ముఖ్య పాత్రలు పోషిస్తున్నారు. ఏఆర్‌.రెహ్మాన్  సంగీతాన్ని అందిస్తున్న ఈ చిత్రాన్ని మెడ్రాస్‌ టాకీస్‌ సంస్థ నిర్మిస్తోంది. కాట్రువెలియిడై ప్రస్తుతం నిర్మాణాంతర కార్యక్రమాలు జరుపుకుంటోంది. కార్తీ తన తాజా చిత్రం ధీరన్  అధికారం ఒండ్రు చిత్రంపై దృష్టి సారించారు. చతురంగవేట్టై చిత్రం ఫేమ్‌ వినోద్‌ దర్శకత్వం వహిస్తున్న ఇందులో రకుల్‌ప్రీతిసింగ్‌ నాయకిగా నటిస్తున్నారు. కార్తీ, రకుల్‌ తొలిసారిగా కలిసి నటిస్తున్న చిత్రం ఇదే. అదే విధంగా చాలా గ్యాప్‌ తరువాత రకుల్‌ కోలీవుడ్‌కు రీఎంట్రీ అవుతున్నారు.
 చిరుతై చిత్రం తరువాత కార్తీ పోలీస్‌ అధికారిగా అంతకంటే పవర్‌ఫుల్‌ పాత్రలో ధీరన్  అధికారం ఒండ్రు చిత్రంలో కనిపించనున్నారట. ఇప్పటికే చెన్నైలో పది రోజులు షూటింగ్‌ జరుపుకున్న ఈ చిత్రం తదుపరి షెడ్యూల్‌ను గుజరాత్‌లో జరుపుకోవడానికి సిద్ధమవుతున్నారు. గుజరాత్‌కు పది కిలోమీటర్ల దూరంలోని కొండప్రదేశంలో 41 రోజుల పాటు ఏకధాటిగా షూటింగ్‌ నిర్వహించడానికి చిత్ర యూనిట్‌ సిద్ధమవుతున్నట్లు సమాచారం.ఈ చిత్రానికి జిబ్రాన్  సంగీత బాణీలు కడుతున్నారు.