breaking news
BWF World Superseries Finals
-
వయసు ఒక అంకె మాత్రమే!
న్యూఢిల్లీ: అత్యున్నత స్థాయిలో పోటీ పడేందుకు వయసు అడ్డంకి కానే కాదని భారత స్టార్ షట్లర్ పీవీ సింధు పేర్కొంది. డిసెంబర్లో జరగనున్న సీజన్ ముగింపు బీడబ్ల్యూఎఫ్ వరల్డ్ టూర్ ఫైనల్స్కు అర్హత సాధించిన సింధు... 31 ఏళ్ల వయసు కొత్త 21లా అనిపిస్తోందని వెల్లడించింది. బీడబ్ల్యూఎప్ ర్యాంకింగ్స్ ఆధారంగా ఎనిమిది మంది అత్యుత్తమ ప్లేయర్లు ఈ టోర్నీకి అర్హత సాధించారు. తాజాగా హైలో ఓపెన్ సూపర్–500 టైటిల్ గెలిచిన సింధు... గత నెలలో ఫ్రెంచ్ ఓపెన్లో రన్నరప్గా నిలిచింది. జూలైలో జపాన్ ఓపెన్లో సైతం సింధు విజేతగా నిలిచింది. ప్రధాన టోర్నీల కోసం తన సన్నద్ధత... అథ్లెట్ల మానసిక, శారీరక స్థితి... గాయాల నుంచి తిరిగి కోలుకునే తీరు... ఆటల్లో అధునాతన సాంకేతికత ప్రభావం... ఇలా పలు అంశాలపై తన మనసులో భావాలను పంచుకుంది. ఆ వివరాలు ఆమె మాటల్లోనే... » ప్రపంచ ర్యాంకింగ్స్లో టాప్–6లోకి వచ్చినందుకు ఆనందంగా ఉంది. కోర్టులో మీ ఆట బాగుంటే అన్నీ వాటంతట అవే మీ వద్దకు వస్తాయి. విజయాలు సాధిస్తూ పోతే ర్యాంకింగ్ కూడా మెరుగవుతుంది. షట్లర్గా మంచి ప్రదర్శన కనబరుస్తూ టోర్నమెంట్లు గెలవడంపైనే దృష్టి పెడతా. ర్యాంకింగ్ గురించి ఆలోచించాల్సిన అవసరమే లేదు. విజయాలు వస్తున్న కొద్ది అది మెరుగవుతూ ఉంటుంది. » బ్యాడ్మింటన్లో ఎప్పటికప్పుడు మార్పులు వస్తూ ఉన్నాయి. కోర్టులో ఓపిక చాలా ముఖ్యం. వచ్చే ఏడాది నుంచి 15 పాయింట్ల విధానం రాబోతుంది. కాబట్టి పరిస్థితులు మారతాయి. దానికి అనుగుణంగా మనం సిద్ధం కావాలి. గతంలోని ‘గోల్డెన్ జనరేషన్’ ప్లేయర్లతో పాటు, ప్రస్తుత తరం యువ క్రీడాకారిణులతో పోటీ పడే అవకాశం నాకు దక్కడం సంతోషం. » వయసు ఒక అంకె మాత్రమే. మీ శరీరాన్ని మీరు ఎలా అర్థం చేసుకుంటున్నారనేది ముఖ్యం. చాలా మంది ప్లేయర్లు 30 ఏళ్లు దాటాక కూడా మెరుగైన ప్రదర్శన కనబరుస్తున్నారు. ఈ వయసులో కూడా ఎంతో మంది ప్రపంచ ర్యాంకింగ్స్లో అగ్రస్థానం సాధించారు. నేను ఆ దిశగానే అడుగులు వేస్తున్నా. ఆటలో మరింత పదును పెంచే ప్రయత్నాలు నిరంతరం చేస్తున్నా. » విశ్రాంతి లేకుండా వరుస టోర్నమెంట్లు ఆడుతున్నా. అందుకే వరల్డ్ టూర్ ఫైనల్స్కు ముందు జరగనున్న కొరియా ఓపెన్, జపాన్ ఓపెన్ టోర్నమెంట్ల నుంచి దూరంగా ఉండాలని నిర్ణయించుకున్నా. ఎందుకంటే సాధన ఎంత ముఖ్యమో... తగినంత విశ్రాంతి కూడా అంతే అవసరం. ప్రపంచ టూర్ ఫైనల్స్లో తాజాగా బరిలోకి దిగేందుకే ఈ నిర్ణయం తీసుకున్నా. » సుదీర్ఘ కాలంగా బ్యాడ్మింటన్ ఆడుతున్నా. దీంతో నాకు ఎంతో అనుబంధం ఉంది. ఆటను ఆస్వాదించడం ముఖ్యం. మక్కువ ఉన్నంతవరకు అంతా సహజంగా సాగిపోతుంది. ఫిట్నెస్ కాపాడుకోవడం... కోర్టులో సరైన నిర్ణయాలు తీసుకోవడం చాలా ముఖ్యం. నేనేం 20 ఏళ్ల వయసులో లేను. కాబట్టి వరుస టోర్నమెంట్లు ఆడటం సాధ్యం కాదు. అయితే బరిలోకి దిగిన ఏ టోర్నమెంట్లో అయినా 100 శాతం కృషి చేయాలి. దానికి శారీరకంగా, మానసికంగా అత్యుత్తమ స్థితిలో ఉండాలి. వర్క్లోడ్ మేనేజ్మెంట్ను దృష్టిలో పెట్టుకొని టోర్నీల ఎంపిక చేసుకుంటున్నా దీనికి నా సిబ్బంది ఎంతో సహకరిస్తున్నారు. ‘షాట్ క్లాక్’పై అసంతృప్తి బీడబ్ల్యూఎఫ్ ప్రవేశపెట్టిన 25 సెకన్ల ‘షాట్ క్లాక్’ నిబంధనపై ఇంకా పూర్తి స్పష్టత రాలేదు. ఈ నిబంధనపై క్రీడాకారుల నుంచి వస్తున్న అభ్యంతరాలను... అథ్లెట్ల కమిషన్ చైర్ పర్సన్గా బీడబ్ల్యూఎఫ్ దృష్టికి తీసుకెళ్లా. త్వరలోనే దీనిపై పూర్తిస్థాయి సమీక్ష జరగనుంది. ర్యాలీ ముగిసిన తర్వాత సర్వ్ చేయడానికి ఆటగాళ్లకు 25 సెకన్ల సమయం ఉంటుంది. ఆరంభంలో ఇటు ఆటగాళ్లతో పాటు అటు అంపైర్లు కూడా దీనివల్ల ఇబ్బంది పడ్డారు.రిసీవర్ సిద్ధంగా ఉండి సర్వర్ లేకపోవడం... సర్వర్ సిద్ధంగా ఉండి రిసీవర్ రెడీగా లేకపోవడం ఇలా చాలా జరిగాయి. అయితే నిధానంగా అందరూ దీనికి అలవాటు పడుతున్నారు. అయితే సుదీర్ఘ ర్యాలీ ఆడిన తర్వాత ప్లేయర్లు అలసిపోతారనే విషయాన్ని అర్థం చేసుకోవాలి. వాళ్లు కూడా మనుషులే కదా. అంత త్వరగా కోలుకోవడం కష్టం. అయితే నిబంధనలకు అనుగుణంగా ముందుగానే సిద్ధంగా ఉండాలని అథ్లెట్లకు కూడా తెలుసు... వారి్నంగ్లు వస్తాయన్న భయంతో అందరూ క్రమంగా సర్దుకుంటున్నారు.8 సీజన్ ముగింపు టోర్నీ వరల్డ్ టూర్ ఫైనల్స్కు సింధు అర్హత సాధించడం ఇది ఎనిమిదోసారి. 2016లో సెమీఫైనల్లో ఓడిన సింధు... 2017లో రన్నరప్గా నిలిచింది. 2018లో టైటిల్ సాధించింది. 2019లో, 2020లో రౌండ్ రాబిన్ లీగ్ దశలో వెనుదిరిగిన సింధు 2021లో రన్నరప్గా నిలిచింది. 2022లో అర్హత సాధించినా గాయం కారణంగా చివరి నిమిషంలో టోర్నీ నుంచి వైదొలిగింది. మూడేళ్ల తర్వాత సింధు మళ్లీ ఈ ప్రతిష్టాత్మక టోర్నీ బెర్త్ను దక్కించుకుంది.విరాట్ కోహ్లి సలహాలతో...బ్యాడ్మింటన్ ప్లేయర్లతోనే కాకుండా ఇతర క్రీడాకారులతో తరచూ మాట్లాడుతుండటం ఎంతో స్ఫూర్తినిస్తుంది. నా కెరీర్లో ఇబ్బందులు ఎదుర్కొంటున్న సమయంలో టీమిండియా మాజీ కెపె్టన్ విరాట్ కోహ్లితో మాట్లాడాను. ఆయన అద్భుత వ్యక్తి. విరాట్ సలహాలు, ప్రోత్సాహం నాకు ఎంతో ధైర్యాన్నిచ్చాయి. ఒత్తిడిని పక్కనపెట్టి ఆటను ఎలా ఆస్వాదించాలో ఆయన చెప్పిన మాటలు నాకు ఎంతో ఉపయోగపడ్డాయి. అలాగే భారత స్టార్ జావెలిన్ త్రోయర్, ఒలింపిక్, ప్రపంచ చాంపియన్ నీరజ్ చోప్రా నుంచి కూడా స్ఫూర్తి పొందా.‘టెంపుల్ డివైజ్’తో ఉపయోగం...అథ్లెట్లు గాయాల బారిన పడకుండా ఉండటం చాలా ముఖ్యం. ఒకవేళ పొరపాటున గాయపడితే రికవరీనే అత్యంత ముఖ్యమైంది. విశ్రాంతి, నిద్ర, హృదయ స్పందనల రేటు, ఏకాగ్రత వంటి వివరాలను ఎప్పటికప్పుడు గమనించుకోవడం ద్వారా అథ్లెట్లు తమ శరీర తీరును బాగా అర్థం చేసుకోవచ్చు. తాజాగా భారత వన్డే, టెస్టు క్రికెట్ జట్టు కెప్టెన్ శుబ్మన్ గిల్ వినియోగించిన ‘టెంపుల్ డివైజ్’ను గతంలో నేను కూడా వినియోగించా. దీని ద్వారా మన నిద్ర, రికవరీ ఎలా ఉంది శరీర అలసటకు సంబంధించిన పూర్తి వివరాలు తెలుస్తాయి. ప్రతీ అథ్లెట్కు దీనిపై అవగాహన అవసరం. గిల్ చాలా కాలంగా క్రికెట్ ఆడుతున్నాడు. అతడికి ఇవన్నీ బాగా తెలుసు. నాకైతే ఈ పరికరం బాగా ఉపయోగపడుతోంది. అయితే అథ్లెట్లందరి శరీర తీరు ఒకలా ఉండదు. ఎవరికి వారు ప్రత్యేకం.అనుభవం అన్నీ నేర్పుతుంది ఫిట్నెస్ కాపాడుకోవడం, తదుపరి టోర్నమెంట్ కోసం సిద్ధం కావడం చాలా ముఖ్యం. నా వయసు తక్కువేం కాదు. కానీ 31 ఏళ్ల అంటే నాకు కొత్త 21లా ఉంది. ప్రస్తుతానికి నా దృష్టి అంతా వరల్డ్ టూర్ ఫైనల్స్పైనే ఉంది. తాజా టోర్నీల్లో విజయాలను బాగా ఆస్వాదిస్తున్నా. ఎందుకంటే గెలవడం ఎంత కష్టమో నాకు బాగా తెలుసు. కోర్టులో ఎక్కడ తప్పుచేశాం... ఆ సమయంలో మన లోపల ఏం నడుస్తోంది అనే అంశాలపై ఇప్పుడు స్పష్టమైన అవగాహన ఏర్పడింది. 21 ఏళ్ల వయసులో ఏదైనా జరిగినప్పుడు... ఎందుకలా జరుగుతుందో తెలియక విసుగు, అసహనం కలిగేవి. కానీ ఇప్పుడు అలా కాదు. వయసుతో వచ్చిన పరిపక్వత వల్ల ఆటలో ఏం జరుగుతోందో నాకు సులువుగా తెలుస్తోంది. అందుకే ఇప్పుడు గెలవడం మరింత సంతృప్తిగా అనిపిస్తోంది. అయితే టోర్నమెంట్లు గెలిచినప్పుడు కలిగే అనుభూతిలో మాత్రం ఎలాంటి మార్పులేదు. -
BWF World Tour Finals : మళ్లీ ఓడిన ప్రణయ్
బ్యాంకాక్: ప్రపంచ బ్యాడ్మింటన్ సమాఖ్య (బీడబ్ల్యూఎఫ్) వరల్డ్ టూర్ ఫైనల్స్లో హెచ్.ఎస్. ప్రణయ్ ఆటకు గ్రూప్ దశలోనే తెరపడింది. వరుసగా రెండో మ్యాచ్లోనూ ఓడిపోవడంతో 30 ఏళ్ల భారత స్టార్కు సెమీస్ చేరే అవకాశం చేజారింది. ఇక గ్రూప్ ‘ఎ’లో ఆఖరి మ్యాచ్ ఆడి రావడమే మిగిలింది. గురువారం జరిగిన మ్యాచ్లో ప్రణయ్ 21–23, 21–17, 19–21తో చైనాకు చెందిన లు గ్వాంగ్ జు చేతిలో పరాజయం పాలయ్యాడు. 84 నిమిషాల పాటు జరిగిన సమరంలో భారత ఆటగాడు చైనీస్ ప్రత్యరి్థతో హోరాహోరీగా తలపడ్డాడు. గ్రూపులో మిగిలిపోయిన నామమాత్రమైన ఆఖరి మ్యాచ్లో ప్రపంచ 12వ ర్యాంకర్ ప్రణయ్... ఒలింపిక్ చాంపియన్, నంబర్వన్ విక్టర్ అక్సెల్సన్ (డెన్మార్క్)తో తలపడతాడు. శుక్రవారం ఈ మ్యాచ్ జరుగుతుంది. -
శభాష్ సింధు
గ్వాంగ్జౌ (చైనా): ప్రత్యర్థితో గట్టి పోటీ ఎదురైనా... అలసట తన కదలికలపై ప్రభావం చూపిస్తున్నా... ఎక్కడా తగ్గకుండా ఆడిన పీవీ సింధు అనుకున్న ఫలితాన్ని సాధించింది. తన అద్భుతమైన ఆటతో 2018కు మరో గొప్ప ముగింపు ఇచ్చేందుకు సిద్ధమైంది. ప్రపంచ బ్యాడ్మింటన్ సమాఖ్య (బీడబ్ల్యూఎఫ్) వరల్డ్ టూర్ ఫైనల్స్ టోర్నీ ఫైనల్లోకి ఆమె దూసుకెళ్లింది. శనివారం ఇక్కడ జరిగిన సెమీస్లో సింధు వరుస గేమ్లలో 21–16, 25–23 స్కోరుతో ఇంతనోన్ రచనోక్ (థాయ్లాండ్)పై విజయం సాధించి తుది పోరుకు సిద్ధమైంది. 54 నిమిషాలపాటు ఈ మ్యాచ్ హోరాహోరీగా సాగింది. ఒక్కో పాయింట్ కోసం ఇద్దరూ తీవ్రంగా పోరాడారు. ఫలితంగా సుదీర్ఘ ర్యాలీలు సాగాయి. తొలి గేమ్ ఆరంభంలో ఇరువురు నువ్వా-నేనా అన్నట్లు తలపడ్డారు. ఈ క్రమంలోనే చెరొక పాయింట్ను సాధిస్తూ 2-2, 4-4, 7-7 గా నిలుస్తూ వచ్చారు. ఆ సమయంలో సింధు విజృంభించింది. స్కోరును మూడు పాయింట్ల తేడాకు తీసుకుపోయింది. దాంతో సింధు 10-7 తో ఆధిక్యంలో నిలిచింది. అదే ఊపును కడవరకూ కొనసాగించిన సింధు మొదటి గేమ్ను సొంతం చేసుకుంది. ఆపై రెండో గేమ్లో రచనోక్ నుంచి తీవ్ర ప్రతిఘటన ఎదురైంది. తొలుత 6-3 తేడాతో పైచేయి సాధించిన సింధు.. ఆ తర్వాత వరుస పాయింట్లు కోల్పోతూ వచ్చింది. దాంతో ఇరువురి మధ్య రెండు పాయింట్లు, పాయింట్ మాత్రమే ఆధిక్యం కొనసాగింది. అయితే ఎక్కడా అలసిపోని సింధు చెక్కుచెదరని ఆత్మవిశ్వాసంతో పోరాడి గేమ్తో పాటు మ్యాచ్ను సొంతం చేసుకుంది. చివర్లో సింధు రిటర్న్ షాట్లకు కచ్చితమైన జవాబు ఇవ్వలేని రచనోక్ మ్యాచ్ను కోల్పోయింది. -
సింధు శుభారంభం
దుబాయ్ నుంచి సాక్షి క్రీడా ప్రతినిధి: బ్యాడ్మింటన్ సీజన్ ముగింపు టోర్నమెంట్ వరల్డ్ సూపర్ సిరీస్ ఫైనల్స్లో తొలి రోజు భారత స్టార్ క్రీడాకారులకు మిశ్రమ ఫలితాలు ఎదురయ్యాయి. మహిళల సింగిల్స్లో పీవీ సింధు శుభారంభం చేయగా... పురుషుల సింగిల్స్లో కిడాంబి శ్రీకాంత్ పరాజయాన్ని చవిచూశాడు. ప్రపంచ తొమ్మిదో ర్యాంకర్ హీ బింగ్జియావో (చైనా)తో జరిగిన గ్రూప్ ‘ఎ’ లీగ్ మ్యాచ్లో సింధు 21–11, 16–21, 21–18తో గెలిచింది. 64 నిమిషాలపాటు జరిగిన ఈ మ్యాచ్లో సింధు తొలి గేమ్లో పూర్తి ఆధిపత్యం చలాయించింది. పదునైన స్మాష్లు సంధిస్తూ ప్రత్యర్థిని ఉక్కిరిబిక్కిరి చేసింది. అయితే రెండో గేమ్లో బింగ్జియావో తేరుకుంది. పలుమార్లు స్కోరు సమమైనా కీలకదశలో ఈ చైనా ప్లేయర్ పాయింట్లు గెలిచి రెండో గేమ్ను దక్కించుకుంది. నిర్ణాయక మూడో గేమ్లో సింధు ఒకదశలో 2–4తో వెనుకబడినా వెంటనే కోలుకొని 5–5తో స్కోరును సమం చేసింది. అదే జోరులో 11–7తో ఆధిక్యంలోకి వెళ్లింది. చివరిదాకా ఈ ఆధిక్యాన్ని కాపాడుకొని సింధు మ్యాచ్ను సొంతం చేసుకుంది. మరోవైపు ప్రపంచ నంబర్వన్, ప్రపంచ చాంపియన్ విక్టర్ అక్సెల్సన్ (డెన్మార్క్)తో జరిగిన గ్రూప్ ‘బి’ మ్యాచ్లో శ్రీకాంత్ 13–21, 17–21తో ఓడిపోయాడు. ఈ ఏడాది నాలుగు సూపర్ సిరీస్ టైటిల్స్ సాధించి జోరు మీదున్న శ్రీకాంత్ తొలి గేమ్లో 8–4తో ముందంజ వేసినా ఆ తర్వాత తడబడ్డాడు. అక్సెల్సన్ జోరు పెంచి స్కోరును సమం చేయడంతోపాటు 18–12తో ఆధిక్యంలోకి వెళ్లి గేమ్ను దక్కించుకున్నాడు. రెండో గేమ్లో ఆరంభం నుంచి అక్సెల్సన్ ఆధిపత్యం చలాయించి శ్రీకాంత్కు మరో అవకాశం ఇవ్వకుండా విజయాన్ని ఖాయం చేసుకున్నాడు. గురువారం జరిగే రెండో రౌండ్ లీగ్ మ్యాచ్ల్లో చౌ టియెన్ చెన్ (చైనీస్ తైపీ)తో శ్రీకాంత్; సయాకా సాటో (జపాన్)తో పీవీ సింధు తలపడతారు. -
రెండో మ్యాచ్ కోల్పోయిన సైనా నెహ్వాల్
కౌలాంపూర్: సీజన్ ముగింపు టోర్నమెంట్ వరల్డ్ సూపర్ సిరీస్ ఫైనల్స్లో భారత బ్యాడ్మింటన్ స్టార్ సైనా నెహ్వాల్ రెండో మ్యాచ్ కోల్పోయింది. తన పేలవ ప్రదర్శన కొనసాగిస్తూ ఈ హైదరాబాద్ అమ్మాయి గురువారం జరిగిన రెండవ లీగ్ మ్యాచ్లో 27 నిమిషాల్లో 9-21, 14-21తో వరల్ఢ్ నెంబర్ వన్ జురుయ్ లీ( చైనా) చేతిలో ఓడిపోయింది. అయితే సీజన్ ముగింపు టోర్నమెంట్ వరల్డ్ సూపర్ సిరీస్ ఫైనల్స్లో భారత బ్యాడ్మింటన్ స్టార్ సైనా నెహ్వాల్కు తొలి మ్యాచ్లోనే చుక్కెదురైంది. ఈ ఏడాది తన పేలవ ప్రదర్శన కొనసాగిస్తూ బుధవారం జరిగిన గ్రూప్ ‘బి’ తొలి లీగ్ మ్యాచ్లో 21-19, 22-24, 19-21తో మినత్సు మితాని (జపాన్) చేతిలో ఓడిపోయింది.


