breaking news
Allies and opposition
-
బంగ్లాదేశ్లో మాదిరి అరాచకానికి కుట్ర: రాజ్నాథ్
లక్నో: దేశ రాజధానిలో వరుస ఆందోళనలు చేపడుతున్న కాంగ్రెస్, దాని మిత్రపక్షాలపై రక్షణ మంత్రి రాజ్నాథ్ సింగ్ తీవ్రంగా మండిపడ్డారు. యువతను ఉపయోగించుకుని, అరాచకం సృష్టించి బంగ్లాదేశ్లో మాదిరిగా ప్రభుత్వాన్ని పడగొట్టేందుకు ప్రయత్నిస్తున్నాయని ఆయన ఆరోపించారు. శుక్రవారం ఆయన లక్నోలో మీడియాతో మాట్లాడారు. రాజ్యాంగ సంస్థల విశ్వసనీయతను దెబ్బతీసేందుకు, అశాంతిని సృష్టించేందుకు ప్రజాస్వామ్యంలో ఎవరికీ ఎలాంటి హక్కూ లేదని స్పష్టం చేశారు. ‘కాంగ్రెస్, దాని రాజకీయ మిత్రపక్షాలు నేరుగా, తమ అనుబంధ సంస్థల ద్వారా యువ శక్తిని రాజకీయ ఘర్షణలకు, అరాచకానికి వాడుకునేందుకు ప్రయత్నిస్తున్నట్లు కనిపిస్తోంది’అని మంత్రి ఆరోపించారు. యువత శక్తిని నిర్మాణాత్మక పనులకు, దేశ పురోగతికి వాడుకోవడానికి బదులుగా అరాచక రాజకీయాలకు పావులుగా మారుస్తున్నారని ఆయన పేర్కొన్నారు. బంగ్లాదేశ్ తరహాలోనే మనదేశంలో కూడా ప్రభుత్వాన్ని మార్చాలని కాంగ్రెస్, దాని మిత్రపక్షాలు కోరుకుంటున్నాయని సింగ్ ఆరోపించారు. ‘బంగ్లాదేశ్లో రెజిమ్ చేంజ్ స్ఫూర్తితోనే తాము ముందుకు వెళ్తున్నామని వారు బహిరంగంగానే చెబుతున్నారు. మరొకరేమో ప్రభుత్వాన్ని కూల్చేస్తామంటున్నారు. 2024లో షేక్ హసీనా ప్రభుత్వాన్ని పడగొట్టిన బంగ్లాదేశ్ తిరుగుబాటును ఉద్దేశించి ఆయన ఈ వ్యాఖ్యలు చేశారు. ‘దీన్ని బట్టి వారి ఏకైక ఎజెండా ప్రజాస్వామ్య వ్యవస్థలను ధ్వంసం చేయడం, దేశంలో అల్లర్లు సృష్టించడమేనని స్పష్టమవుతోందని రాజ్నాథ్ పేర్కొన్నారు. ఓటరు జాబితా సర్కు సంబంధించిన అంశాలు, ఎన్నికల సంస్కరణలు కాకుండా ప్రభుత్వాన్ని పడగొట్టడమనేది ప్రతిపక్షాల లక్ష్యంగా మారిందని ఆయన ఆరోపించారు. స్వాతంత్య్రోద్యమం సమయంలో చౌరా చౌరీ హింసాత్మక ఘటన అనంతరం మహాత్మాగాంధీ ఏకంగా సహాయ నిరాకరణ ఉద్యమాన్నే నిలిపివేశారని గుర్తు చేశారు. గాంధేయ మార్గాన్ని అనుసరిస్తామని చెప్పుకుంటున్న కాంగ్రెస్ పార్టీ నేడు.. దేశంలో ఎన్నికల ఓటమికి ప్రతీకారంగా హింస, అరాచకం ద్వారా ప్రభుత్వాన్ని పడగొట్టాలని చూస్తోందన్నారు. కాంగ్రెస్ నైతిక పతనం ఏస్థాయిలో ఉందో దీన్ని బట్టి అర్థమవుతోందని రాజ్నాథ్ ఆగ్రహం వ్యక్తం చేశారు. గాంధీ పేరును వాడుకునే నైతిక అర్హత ఆ పారీ్టకి ఏమాత్రం లేదని ధ్వజమెత్తారు. కాంగ్రెస్కు చెందిన గాంధీ కుటుంబం ఇంటి పేరులో గాంధీ అని వాడుకోకుండా ఆదేశించే విషయం పరిశీలించాలని సుప్రీంకోర్టుకు విజ్ఞప్తి చేస్తామన్నారు. ఇందుకు సంబంధించిన నిర్ణయం సుప్రీంకోర్టే తీసుకుంటుందని చెప్పారు. -
మార్చి 9 నుంచి అసెంబ్లీ సమావేశాలు
- 22 రోజులపాటు సాగనున్న బడ్జెట్ సమావేశాలు - మార్చి 18న సభ ముందుకు బడ్జెట్ - మిత్రపక్షాలు, ప్రతిపక్షాల సహకారం ఉంటుందా? సాక్షి, ముంబై: రాష్ట్రంలో బీజేపీ అధికారంలోకి వచ్చిన తర్వాత మొదటి బడ్జెట్ సమావేశాలు మార్చి 9 నుంచి ప్రారంభం కానున్నాయి. రాష్ట్ర బడ్జెట్ను మార్చి 18న సభలో ప్రవేశపెట్టాలని నిర్ణయించినట్లు శాసనసభ వ్యవహారాల శాఖ మంత్రి గిరీశ్ బాపట్ తెలిపారు. చివరి బడ్జెట్ సమావేశాలను గత ప్రభుత్వం 24 రోజుల పాటు నిర్వహించిందని ఆయన చెప్పారు. శాసన సభ వ్యవహారాల కమిటీ తీవ్ర కసరత్తు తర్వాత తుది మెరుగులు దిద్ది ఈ షెడ్యూల్ రూపొందించినట్లు ఆయన పేర్కొన్నారు. అయితే అంతకన్నా కనీసం ఒక్కరోజైనా ఎక్కువగా సమావేశాలు నిర్వహించాలని ప్రభుత్వం భావించినప్పటికీ సమయాభావం వల్ల కేవలం 22రోజుల పాటు (మార్చి 31 వరకు) సభా కార్యకలాపాలు నిర్వహించేలా షెడ్యూల్ రూపొందిచినట్లు వెల్లడించారు. ఫడ్నవీస్ ప్రభుత్వానికి బడ్జెట్ సమావేశాలు మొదటి సారి కావడంతో ప్రతిష్టాత్మకంగా తీసుకుంటోంది. కొత్త ప్రభుత్వం పై గంపెడు ఆశలు పెట్టుకున్న ప్రజలపై పన్నుల రూపంలో వాత పెడతారా అని ఆందోళన చెందుతున్నారు. పాన్సారే హత్యపై ప్రతిపక్షాలతో పాటు మిత్రపక్షాలు కూడా ఫడ్నవీస్ ప్రభుత్వాన్ని ఇరకాటంలో పెట్టేందుకు ప్రణాళికలు రచిస్తున్నారు. ఆగని రైతు ఆత్మహత్యలు, కేంద్రం నుంచి అందాల్సిన సహాయం ఇప్పటికీ అందకపోవడం వంటి కీలక అంశాలపై ప్రభుత్వాన్ని నిలదీయాలని యోచిస్తున్నారు. కూటమిలో భాగంగా మిత్రపక్షాలకు ఇచ్చిన హామీలను ఫడ్నవీస్ నెరవేర్చడం లేదని ప్రభుత్వంపై గుర్రుగా ఉన్నారు. శివసేనకు పూర్తిస్థాయి అధికారాలు ఇవ్వకుండా ప్రాధాన్యం లేని శాఖలిచ్చి, ప్రధాన శాఖలన్నీ బీజేపీ దగ్గరే ఉంచుకున్నారని మంత్రులు అసంతృప్తితో ఉన్నారు. కీలకమైన హోంశాఖను ఫడ్నవీస్ దగ్గరే ఉంచుకోవడం జీర్ణించుకోలేకపోతున్నారు. గతంలో నాగపూర్లో జరిగిన అసెంబ్లీ శీతాకాల సమావేశాల్లో కాంగ్రెస్, ఎన్సీపీ ప్రభుత్వంలో జరిగిన నేరాలు, అవినీతి, అక్రమాలను బీజేపీ నిలదీసింది. ఇప్పుడు కాంగ్రెస్, ఎన్సీపీలు పాన్సారే హత్యను బీజేపీ ప్రభుత్వాన్ని ఇరకాటంలో పెట్టేందుకు అస్త్రంగా వాడుకోవాలని చూస్తున్నారు. అధికారంలోకి వచ్చి నాలుగు నెలలు కావస్తున్నా మిత్రపక్షమైన శివసేనతో సత్సంబంధాలు ఏర్పరచుకోవడంలో సఫలీకృతం కాలేదు. ఎన్నికలకు ముందు ఆర్పీఐ అధ్యక్షుడు రాందాస్ ఆఠావలేకు, శేత్కరి అధ్యక్షుడు రాజుశెట్టికి ఇచ్చిన హామీల ఊసు ఇంతవరకు ఎత్తకపోవడంతో వారు కూడా సమావేశాలకు ఎంతవరకు సహకరిస్తారనేది ప్రశ్నార్థకంగా మారింది.


