నీది కల్తీలేని అవకాశవాదం

చంద్రబాబుకు కేటీఆర్ బహిరంగ లేఖ
 సాక్షి, హైదరాబాద్: తెలంగాణ ఏర్పాటుపై టీడీపీ అధినేత చంద్రబాబునాయుడు అనుసరిస్తున్న వైఖరి కల్తీలేని, నిఖార్సయిన పచ్చి అవకాశవాదానికి పరాకాష్ట అని టీఆర్‌ఎస్ నేత కే తారక రామారావు విమర్శించారు. తెలంగాణకు అనుకూలంగా లేఖ ఇచ్చిన బాబు ఇప్పుడు మాట మారుస్తున్నారని ధ్వజమెత్తారు. ఈ మేరకు కేటీఆర్ గురువారం చంద్రబాబుకు బహిరంగ లేఖ రాశారు. 2009 ఎన్నికలకు ముందు తెలంగాణకు అనుకూలంగా నిర్ణయం తీసుకుని టీఆర్‌ఎస్‌తో పొత్తు పెట్టుకున్న విషయాన్ని లేఖలో గుర్తుచేశారు.

 

‘ఎన్నికల్లో లబ్ది పొందాలనే ఆ నిర్ణయం తీసుకున్నారా?’ అని ప్రశ్నించారు. కాంగ్రెస్‌పై కల్లబొల్లి విమర్శలు చేయడం, మరోవైపు కాంగ్రెస్ ప్రభుత్వ మనుగడకు సహకరించడం.. ఈ పద్దతుల ద్వారా రాజకీయాల్లో పచ్చి అవకాశవాదానికి, కొత్తరకం మోసాలకు చంద్రబాబు తెరతీశారని కేటీఆర్ విమర్శించారు. ‘రాజకీయాల్లో తలలు పండిపోయిన నేతలకు ఎలాంటి రాజకీయ అనుభవంలేని లోకేశ్ పవర్ పాయింట్ ప్రెజెంటేషన్ ఇవ్వడం వారసత్వ రాజకీయం కాదా’ అన్నారు.