మీరాబాయికి నాలుగో స్థానం

పట్టాయా (థాయ్‌లాండ్‌): మాజీ చాంపియన్‌ లిఫ్టర్‌ మీరాబాయి చాను ప్రపంచ వెయిట్‌ లిఫ్టింగ్‌ చాంపియన్‌షిప్‌లో పతకానికి దూరమైంది. మహిళల 49 కేజీల ఈవెంట్‌లో గురువారం పోటీపడిన ఆమె 201 కేజీల బరువెత్తింది. వ్యక్తిగతంగా ఇది అత్యుత్తమ ప్రదర్శనే కానీ పతకాన్ని మాత్రం తెచి్చపెట్టలేకపోయింది. ఈ ఏప్రిల్‌లో జరిగిన ఆసియా చాంపియన్‌షిప్‌లో 25 ఏళ్ల మీర స్నాచ్‌లో 88 కేజీలు, క్లీన్‌ అండ్‌ జెర్క్‌లో 111 కేజీలు,  మొత్తం కలిపి 199 కేజీల బరువెత్తింది. ఇక్కడ 87 కేజీలు+114 కేజీలు కలిపి మొత్తంగా 201 కేజీలు ఎత్తినా నాలుగో స్థానంతోనే తృప్తిపడింది.

చైనా లిఫ్టర్‌ జియాంగ్‌ హుయిహువా 212 (94+118) కేజీలతో కొత్త ప్రపంచ రికార్డు నెలకొల్పింది. తమ దేశానికే చెందిన హౌ జిహుయి (210 కేజీలు) రికార్డును చెరిపేసింది. హౌ జిహుయి 211 (94+117) కేజీల బరువెత్తి రజతం నెగ్గగా, నార్త్‌ కొరియా లిఫ్టర్‌ రి సంగ్‌ గమ్‌ 204 (89+115) కేజీలతో కాంస్యం గెలుచుకుంది.