నిద్రాణ గెలాక్సీలో కృష్ణబిలాల జంట...

మనకు 200 కోట్ల కాంతి సంవత్సరాల దూరంలో.. క్రియా రహితంగా ఉన్న ‘ఎస్‌డీఎస్‌ఎస్ జే120136’ అనే గెలాక్సీ కేంద్రంలోని రెండు అతి శక్తిమంతమైన కృష్ణబిలాల(బ్లాక్‌హోల్స్) ఊహాచిత్రమిది. ఆ గెలాక్సీ కేంద్రంలోని ఓ నక్షత్రం వీటి ప్రభావానికి ముక్కలైపోగా.. దాని నుంచి ఇవి వాయువులను ఇలా పీల్చేసుకుంటున్నాయట. చిత్రంలో ఓ కృష్ణబిలం వైపుగా వెళుతున్న వాయువులను మధ్యలో మరో కృష్ణబిలం పీల్చేసుకోవడం చూడొచ్చు. ఇప్పటిదాకా ఇలాంటి కృష్ణబిలాల జంటలు క్రియాశీలకంగా ఉండే గెలాక్సీల్లోనే గుర్తించగా.. క్రియారహితమైన గెలాక్సీలోనూ కనుగొనడం ఇదే తొలిసారి. వీటిని చైనాలోని పెకింగ్ యూనివర్సిటీ పరిశోధకుడు ఫుకున్ లీయూ కనుగొన్నారు.