అప్పుల బాధతో ఆగిన గుండె

తాడిమర్రి :అప్పులు తీర్చే దారి కానరాక ఓ రైతు గుండె ఆగిపోయింది. ఈ సంఘటన అనంతపురం జిల్లా తాడిమర్రి మండలంలోని చిల్లకొండయ్యపల్లి గ్రామంలో చోటుచేసుకుంది.  వివరాల్లోకి వెళ్తే... చిల్లకొండయ్యపల్లి గ్రామానికి చెందిన మాజీ సర్పంచ్ నర్సింహులు(65)  రైతు. నీటి సమస్య ఎక్కువగా ఉండటంతో తన తోట ఎండిపోకుండా ఉండటానికి అప్పు  చేసి నాలుగు బోర్లు వేయించారు.

అయినా ఫలితం లేకపోయింది. నీరు పడకపోగా తోట పూర్తిగా ఎండిపోవడంతో అప్పు తీర్చే దారి కనపడక గత కొన్ని రోజులుగా తీవ్ర మనస్థాపంతో ఒత్తిడికి గురవుతూ ఉండేవారు. ఈ క్రమంలో ఆదివారం హఠాత్తుగా గుండెనొప్పి వచ్చి మృతిచెందారు.