నాలుగోసారైనా కలిసి వచ్చేనా..!

● మెట్‌పల్లి మున్సిపాలిటీకి మూడుసార్లు ఎన్నికలు ● చైర్మన్‌ పీఠం వరుసగా మహిళలకే కేటాయింపు ● ఈసారైనా కలిసి రావాలని కోరుకుంటున్న నాయకులు ● మేజర్‌ గ్రామ పంచాయితీగా ఉన్న మెట్‌పల్లిని మహానేత వైఎస్‌.రాజశేఖర రెడ్డి ముఖ్యమంత్రిగా ఉన్న 2004లో మున్సిపాలిటీగా అప్‌గ్రేడ్‌ చేశారు. ● ఆ సమయంలో వైఎస్సార్‌ సొంత నియోజకవర్గమైన పులివెందులతోపాటు మెట్‌పల్లిని మాత్రమే మున్సిపాలిటీలుగా ఏర్పాటు చేయడం గమనార్హం. ● ఈ మున్సిపాలిటీకి మొదటిసారి 2005లో ఎన్నికలు జరిగాయి. అప్పుడు బీసీ మహిళకు చైర్మన్‌ పదవిని రిజర్వ్‌ చేశారు. ● 2010లో ఎన్నికలు జరగాల్సి ఉండగా.. ఆ సమయంలో రాష్ట్రంలో నెలకొన్న రాజకీయ పరిస్థితుల నేపథ్యంలో తెలంగాణ రాష్ట్రం ఏర్పాటయ్యే వరకు నిర్వహించడం సాధ్యం కాలేదు. ● తర్వాత 2014లో రెండోసారి నిర్వహించిన ఎన్నికల్లో చైర్మన్‌ స్థానాన్ని జనరల్‌ మహిళకు రిజర్వ్‌ చేశారు. ● 2020లో మూడోసారి జరిగిన ఎన్నికల్లో చైర్మన్‌ పదవి మరోమారు బీసీ మహిళను వరించింది. ● వరుసగా మూడు పర్యాయాలు చైర్మన్‌ పదవిని మహిళలే అలంకరించడంతో ఈసారి రిజర్వేషన్‌ తమకు తప్పకుండా కలిసివస్తుందని ఆ పదవిపై ఆశలు పెట్టుకున్న పురుష నాయకులు అంచనా వేస్తున్నారు. ● కొందరు ముఖ్యనేతలు చైర్మన్‌ రిజర్వేషన్‌ కలిసి వస్తేనే కౌన్సిలర్‌గా పోటీ చేయాలని నిర్ణయించుకుంటుంటే.. మరికొందరు అవసరమైతే తమ సతీమణులను రంగంలోకి దించాలనే ఆలోచనలో ఉన్నారు. ● పురుషులకు అనుకూలంగా రిజర్వేషన్‌ కలిసి వస్తే ప్రధాన పార్టీలైన కాంగ్రెస్‌, బీఆర్‌ఎస్‌, బీజేపీల్లో పోటీ తీవ్రంగా ఉండే అవకాశముంది. దీంతో ఆయా పార్టీల పెద్దలు అంగబలం, అర్థికబలం ఉన్న నేతలను పోటీలో దించడానికి మంతనాలు జరుపుతున్నారు.