అన్ని వర్గాలకు అందుబాటులో ఇగ్నో కోర్సులు

దుర్గమ్మ ఆలయంలో భక్తుల సందడి ఇంద్రకీలాద్రి(విజయవాడపశ్చిమ): వేసవి సెలవులు, వివాహ సుముహూర్తాల నేపథ్యంలో ఇంద్రకీలాద్రిపై కొలువై ఉన్న దుర్గమ్మ దర్శనానికి పెద్ద ఎత్తున భక్తులు తరలివస్తున్నారు. ఆదివారం పెద్ద ఎత్తున భక్తులు అమ్మవారి దర్శనానికి తరలిరావడంతో ఆలయ ప్రాంగణంలో రద్దీ కనిపించింది. తెల్లవారుజామున ఆరు గంటల నుంచి మధ్యాహ్నం ఒంటి గంట వరకు అన్ని క్యూలైన్లు భక్తులతో కిటకిటలాడుతూ కనిపించాయి. మధ్యాహ్నం ఎండ తీవ్రత అధికంగా ఉండటంతో రెండు నుంచి సాయంత్రం ఆరు గంటల వరకు కొండపై రద్దీ తగ్గింది. శనివారం రాత్రి నుంచి ఆదివారం ఉదయం వరకు దుర్గమ్మ సన్నిధిలోని మహా మండపం మూడో అంతస్తులో వివాహాల సందడి కనిపించింది. వివాహాలైన నూతన వధూవరులు, వారి కుటుంబ సభ్యులు తెల్లవారుజామునే నాలుగు గంటల నుంచి అమ్మవారిని దర్శించుకుని తమ స్వస్థలాలకు తిరుగు ప్రయాణమయ్యారు. మరో వైపు విజయవాడ నుంచి విశాఖపట్నం, చైన్నె, హైదరాబాద్‌ వైపు ఆరు గంటల సమయంలో రైళ్లు అందుబాటులో ఉండటంతో తెల్లవారుజామున రద్దీకి కారణమని తెలుస్తోంది. ఇక తెలంగాణ, చైన్నె, బెంగళూరు ప్రాంతాల నుంచి విచ్చేసే భక్తులు ఉదయానికి కల్లా నగరానికి చేరుకుని అమ్మవారిని దర్శించుకుని తిరుగు ప్రయాణం కావడమే కొండపై రద్దీకి కారణమని ఆలయ అధికారులు అంచనా వేస్తున్నారు. ఆదివారం సాయంత్రం వేళ భక్తుల రద్దీ అధికంగా కనిపించింది. సాయంత్రం ఆరు గంటలకు అమ్మవారికి పంచహారతుల సేవ నిర్వహించేందుకు అర్ధగంట పాటు అన్ని దర్శనాలు నిలిపివేశారు.దీంతో క్యూలైన్లలో వేచి ఉన్న భక్తులకు తోడు నగరానికి చెందిన వారు సైతం సాయంత్రం అమ్మవారిని దర్శించుకునేందుకు విచ్చేసిన భక్తులతో ఆలయ ప్రాంగణంలో సందడి వాతావరణం కనిపించింది. ఇక రాత్రి 9.30 గంటల వరకు భక్తుల రద్దీ కొనసాగింది. దుర్గగుడి ఈఓ శీనానాయక్‌, ఇంజినీరింగ్‌ అధికారులు ఏర్పాట్లను పరిశీలించారు. దుర్గాఘాట్‌ను పరిశీలించిన ఈఓ శీనానాయక్‌ దేవస్థాన బస్సులో కొండపైకి చేరుకున్నారు. ఓం టర్నింగ్‌ వద్ద భక్తులకు కల్పిస్తున్న సదుపాయాల గురించి ఆరా తీశారు. అమ్మవారి దర్శనం అనంతరం తిరుగు ప్రయాణమవుతున్న భక్తులతో మాట్లాడారు. వేసవి నేపధ్యంలో దేవస్థానం భక్తులకు మంచినీటి సదుపాయం, మజ్జిగ పంపిణీ గురించి ఆయన తెలిపారు.