స్వాతంత్య్ర వేడుకల ఏర్పాట్లు పరిశీలన

Aug 15 2025 7:06 AM | Updated on Aug 15 2025 7:06 AM

స్వాతంత్య్ర వేడుకల ఏర్పాట్లు పరిశీలన వైభవంగా అమరేశ్వర స్వామి వార్ల పవిత్రోత్సవాలు అమరావతి: అమరావతిలోని బాలచాముండికా సమేత అమరేశ్వరస్వామి ఆలయంలో వార్షిక పవిత్రోత్సవాలు వైభవంగా జరుగుతున్నాయి. రెండవ రోజు గురువారం ఉదయం అలయ అర్చకులు, వేద పండితులు మండప పూజ, దీక్ష హోమం, రుద్ర హోమం, పవిత్రధారణ, చండీ హోమం జరిపి హారతి మంత్రపుష్పాలు సమర్పించారు. అనంతరం స్వామివార్లకు పట్టు పవిత్రములు సమర్పించారు. ఈ సందర్భంగా ఆలయ కార్యనిర్వహణాధికారి రేఖ మాట్లాడుతూ విజయవాడకు చెందిన యార్లగడ్డ ఉపేంద్ర, విజయలక్ష్మి దంపతుల ఆధ్వర్యంలో స్వామి వారి వార్షిక పవిత్రోత్సవాలు వైభవంగా నిర్వహిస్తున్నామన్నారు. శుక్రవారం ఉదయం పవిత్రోత్సవాలు ముగింపు సందర్భంగా 11 గంటలకు మహా పూర్ణాహుతి నిర్వహిస్తామన్నారు.

బాపట్ల: బాపట్లలో భారత స్వాతంత్య్ర దినోత్సవం ఘనంగా నిర్వహించాలని జిల్లా కలెక్టర్‌ జె వెంకటమురళి తెలిపారు. భారీ వర్షాల కారణంతో ప్రజలకు అసౌకర్యాలు కలుగకుండా జెండా పండుగను నిర్వహించాలన్నారు. బాపట్ల మహిళా ఇంజినీరింగ్‌ కళాశాల ఆడిటోరియంలో వేడుకలు నిర్వహిస్తున్న నేపథ్యంలో గురువారం సంబంధిత కళాశాల ప్రాంగణాన్ని కలెక్టర్‌ పరిశీలించారు. వర్షాలు వచ్చినప్పటికీ జాతీయ పండుగను వైభవంగా జరపాలన్నారు. కార్యక్రమానికి ముఖ్య అతిథిగా విద్యుత్‌ శాఖ మంత్రి గొట్టిపాటి రవికుమార్‌ హాజరవుతారన్నారు. కార్యక్రమంలో భాగంగా సాంస్కృతిక కార్యక్రమాలు, శకటాలు, స్టాల్స్‌ ప్రదర్శన నిర్వహించే ప్రాంతాలను ఆయన పరిశీలించారు. త్వరగా ఏర్పాట్లు చేయాలని అధికారులకు ఆయన పలు సూచనలు చేశారు. ఆయన వెంట జిల్లా ఎస్పీ తుషార్‌ డూడీ, ఇన్‌చార్జి జేసీ జి.గంగాధర్‌గౌడ్‌, ఆర్డీవో గ్లోరియా ఉన్నారు.

ట్రయల్‌ రన్‌

బాపట్లటౌన్‌: గురువారం ఎస్పీ తుషార్‌ డూడీ ఆధ్వర్యంలో ట్రయల్‌ రన్‌ నిర్వహించారు. ఎస్పీ మాట్లాడుతూ స్వాతంత్య్ర వేడుకలను వీక్షించడానికి విచ్చేసే ప్రజలకు, విద్యార్థులకు ఎటువంటి అసౌకర్యం తలెత్తకుండా తగిన భద్రత చర్యలు తీసుకోవాలన్నారు. జిల్లా నలుమూలల నుంచి ప్రజాప్రతినిధులు, వివిధ శాఖల అధికారులు వస్తుండటంతో పట్టణంలో ట్రాఫిక్‌ సమస్య తలెత్తకుండా ముందస్తు చర్యలు తీసుకోవాలన్నారు. కార్యక్రమంలో ఎస్‌బీ సీఐ జి.నారాయణ, పట్టణ సీఐ ఆర్‌.రాంబాబు, ఆర్‌ఐలు షేక్‌ మౌలుద్దీన్‌, టి.శ్రీకాంత్‌ పాల్గొన్నారు.