సాక్షి, హైదరాబాద్‌: ఐదేళ్లలో రాష్ట్రంలోని కోటి మంది మహిళలను కోటీశ్వరులను చేసే బాధ్యత తాను తీసుకుంటున్నట్లు సీఎం రేవంత్‌రెడ్డి చెప్పారు. రా ష్ట్రంలోని స్వయం సహాయక సంఘాల్లో (ఎస్‌హెచ్‌ జీలు) ప్రస్తుతం ఉన్న 63 లక్షల మంది మహిళలను కోటికి పెంచడమే కాకుండా ప్రతి ఒక్కరిని కోటీశ్వ రులను చేయడమే తన లక్ష్యమని పేర్కొన్నారు. గతంలో దివంగత వైఎస్‌ రాజశేఖర్‌ రెడ్డి మహిళల ను లక్షాధికారుల్ని చేసే లక్ష్యంతో పావలా వడ్డీ రుణాలను ప్రారంభించారని, ఇప్పుడు ప్రతి మహిళ ను కోటీశ్వరురాలిని చేసే లక్ష్యంతో గత ప్రభుత్వ హయాంలో నిలిచి పోయిన వడ్డీలేని రుణాల పథకాన్ని తిరిగి ప్రారంభిస్తున్నట్లు తెలిపారు. కోటి మంది మహిళలను కోటీశ్వరులను చేస్తే తెలంగాణ బంగారు తెలంగాణ, ధనిక తెలంగాణ, అభివృద్ధి చెందిన తెలంగాణ అవుతుందని, మహిళలు తమ పిల్లలను డాక్టర్లు, ఐఏఎస్‌లను చేసుకోగలరని అన్నారు. సికింద్రాబాద్‌ పెరేడ్‌ గ్రౌండ్స్‌లో ఏర్పాటు చేసిన ‘మహాలక్ష్మి స్వశక్తి మహిళా సదస్సు’కు ఆయన ముఖ్య అతిథిగా హాజరై ప్రసంగించారు. ఆడబిడ్డల ఆశీర్వాదంతోనే అధికారంలోకి.. ‘పదేళ్ల పాలనలో కేసీఆర్‌ తెలంగాణలో ఆడబిడ్డల ను పట్టించుకోలేదు. పావలా వడ్డీ, సున్నా వడ్డీ ఇవ్వలేదు. అందుకే మా ఆడబిడ్డలు కంకణం కట్టుకుని ఎన్నికల్లో కేసీఆర్‌ను బండకేసి కొట్టారు. వంద మీటర్ల గొయ్యి తీసి పాతిపెట్టారు. ఆడబిడ్డల ఆశీర్వాదంతోనే రాష్ట్రంలో కాంగ్రెస్‌ అధికారంలోకి వచ్చింది. నేను సీఎం అయ్యా. అధికారంలోకి వచ్చిన వెంటనే గతేడాది సెప్టెంబర్‌ 17న సోనియాగాంధీ ఇచ్చిన ఆరు గ్యారెంటీల అమలు ప్రారంభించాం. మహిళలకు ఆర్టీసీ బస్సుల్లో ఉచిత ప్రయాణం కల్పిస్తే, ఇప్పటివరకు 23 కోట్ల మంది వినియోగించుకున్నారు. కానీ కేసీఆర్, హరీశ్, కవిత, కేటీఆర్‌ కిరాయి ఇచ్చి ఆటో డ్రైవర్లతో ధర్నాలు చేయిస్తున్నారు. ఎవరు అడ్డు వచ్చినా సరే.. మహిళలకు ఉచిత ప్రయాణ సౌకర్యాన్ని కొనసాగిస్తాం. ఆనాడు వైఎస్‌ రాజశేఖర్‌ రెడ్డి ప్రారంభించిన రాజీవ్‌ ఆరోగ్యశ్రీని కేసీఆర్‌ ఎటుగాకుండా చేశారు. మహిళలను కట్టెల పొయ్యి కష్టాల నుంచి గట్టెక్కించేందుకు గతంలో దీపం పథకం ద్వారా సోనియాగాంధీ రూ.400కే గ్యాస్‌ సిలిండర్‌ ఇస్తే, ప్రధాని నరేంద్ర మోదీ,  కేసీఆర్‌ కలిసి దానిని రూ.1200కు పెంచి మళ్లీ కట్టెల పొయ్యికి మళ్లే పరిస్థితి కల్పించారు. అందుకే ఇప్పుడు రూ.500లకే మహిళలకు గ్యాస్‌ సిలిండర్‌ అందిస్తున్నాం. గృహాలక్ష్మి పథకం ద్వారా పేదల ఇంటికి 200 యూనిట్ల వరకు ఉచిత విద్యుత్‌ అందిస్తున్నాం..’ అని రేవంత్‌ తెలిపారు. టాటా, బిర్లాలతో పోటీ పడేలా చేస్తాం ‘ఎస్‌హెచ్‌జీల మహిళలు తయారు చేసే ఉత్పత్తుల కు మార్కెటింగ్‌ సౌకర్యం లేదనే విషయం నా దృష్టికి వచ్చింది. రాబోయే నెల రోజుల్లో శిల్పారామం పక్కన ఎస్‌హెచ్‌జీల మహిళలకు వంద స్టాళ్లు ఏర్పా టు చేస్తాం. మీరు తయారు చేసిన ఉత్పత్తులకు జాతీయ, అంతర్జాతీయ స్థాయిలో మార్కెటింగ్‌ సదుపాయం కల్పిస్తాం. ఔటర్‌ రింగ్‌రోడ్డు చుట్టూ కూడా మహిళా ఉత్పత్తుల విక్రయానికి బజార్లు ఏర్పాటు చేస్తాం. టాటా, బిర్లాలు, అదానీ, అంబానీలతో పోటీ పడే విధంగా మహిళలు రాణించేలా కృషి చేస్తాం..’ అని ముఖ్యమంత్రి చెప్పారు.  డబుల్‌ బెడ్‌రూం ఆశ చూపి మోసం చేశారు ‘ఇందిరమ్మ ఇళ్లు ఎన్నికలు అయిపోయిన తరువాత ఇద్దామనుకున్నాం. కానీ మహిళల కోసం భద్రాద్రి రామచంద్ర స్వామి ఆశీస్సులతో ఈ పథకాన్ని ప్రారంభించుకున్నాం. కేసీఆర్‌ డబుల్‌ బెడ్‌రూం ఇళ్ల ఆశ చూపి మహిళలను మోసం చేసిండు. మేం మొత్తం రూ.22,500 కోట్లతో ఇల్లు కట్టుకునే పేదలకు రూ.5 లక్షల చొప్పున ఆర్థిక సాయం అందించబోతున్నాం..’ అని రేవంత్‌ తెలిపారు.  మోదీ, కేసీఆర్‌ కుట్రలు చేస్తున్నారు ‘మా ప్రభుత్వాన్ని పడగొడతామంటూ కొందరు చిందులు వేస్తున్నారు. కేసీఆర్, మోదీలు కుట్రలు చేస్తున్నారు. ముఖ్యమంత్రి కుర్చీలో దొరలే కూర్చో వాలా? రైతు బిడ్డ కూర్చోకూడదా? నేనేం పాపం చేశా? మీ అవినీతి సొమ్ములో షేర్‌ అడిగానా? నేనే మన్నా అయ్య పేరు చెప్పుకొని, విరాసత్‌ రాయించుకొని ముఖ్యమంత్రి అయ్యానా? ఎవరి కుర్చీనైనా గుంజుకున్నానా? రేవంత్‌ను, ప్రభుత్వాన్ని పడగొడ తామని ఎవరైనా వస్తే..  మా ఆడబిడ్డలు చీపురు కట్టలు మర్లేసి కొడతారు. కొద్దిరోజుల్లో 10 లక్షల మంది ఆడబిడ్డలతో కవాతు చేస్తాం. మా సైన్యం మీరే.. మా బలగం మీరే..’ అని సీఎం అన్నారు. అధికారం పోతుందని తెలిసినా సోనియా తెలంగాణ ఇచ్చారు ‘కాంగ్రెస్‌ పార్టీ అంటేనే ఇందిరాగాంధీ, సోనియా గాంధీ, ప్రియాంక గాంధీ. మేము ఒక మహిళ నాయకత్వంలో పని చేయడానికి గర్విస్తున్నాం. ప్రత్యేక రాష్ట్రం ఇవ్వడం వల్ల ఆంధ్రప్రదేశ్‌లో, కేంద్రంలో కాంగ్రెస్‌ అధికారం కోల్పోతుందని తెలిసినా 2004లో కరీంనగర్‌లో ఇచ్చిన మాట కోసం సోనియాగాంధీ తెలంగాణ ఇచ్చారు..’ అని రేవంత్‌ చెప్పారు.   స్టాళ్ల సందర్శన.. మహిళలతో సంభాషణ సదస్సుకు ముందు ముఖ్యమంత్రి ఎస్‌హెచ్‌జీల మహిళలు ఏర్పాటు చేసిన వివిధ ఉత్పత్తులతో కూడిన స్టాళ్లను సందర్శించారు. ఈ సందర్భంగా పలువురు మహిళలు తమ ఉత్పత్తులకు మార్కెటింగ్‌ సౌకర్యం కల్పించాలని సీఎంను కోరారు.  విజన్‌ డాక్యుమెంట్‌ ఆవిష్కరణ ‘మహిళా శక్తి మహిళా ఉన్నతి – తెలంగాణ ప్రగతి’ విజన్‌ డాక్యుమెంట్‌ను మంత్రివర్గ సహచరులతో కలిసి సీఎం ఆవిష్కరించారు. వచ్చే ఐదేళ్లలో బ్యాంకులు, స్త్రీ నిధి ద్వారా ఎస్‌హెచ్‌జీలకు సంబంధించిన రూ.లక్ష కోట్ల రుణాలను అనుసంధానించడం, వడ్డీ లేని రుణాలు పునరుద్ధరించడం, సంఘాల ఉత్పత్తులకు బ్రాండింగ్, మార్కెటింగ్‌ కల్పించడం, సంఘాలకు శిక్షణ, సంఘాల్లోని మహిళలకు రూ. పది లక్షల జీవిత బీమా, పాఠశాలల్లో మధ్యాహ్న భోజన పథకం సంఘాలతో నిర్వహణ లాంటి అంశాలు విజన్‌ డాక్యుమెంట్‌లో ఉన్నాయి. ఈ సదస్సు కు సీఎస్‌ శాంతికుమారి అధ్యక్షత వహించగా, డిప్యూటీ సీఎం భట్టి విక్రమార్క, మంత్రులు సీత క్క, సురేఖ, పొన్నం ప్రభాకర్, శ్రీధర్‌బాబు ప్రసంగించారు. స్పీకర్‌ ప్రసాద్‌కుమార్, మంత్రులు జూప ల్లి కృష్ణారావు, తుమ్మల నాగేశ్వర్‌రావు, ఉత్తమ్‌కు మార్‌ రెడ్డి, రాజనర్సింహ, కోమటిరెడ్డి వెంకటరెడ్డి, పొంగులేటి శ్రీనివాస్‌రెడ్డి, ప్రభుత్వ ప్రధాన సలహాదారు వేం నరేందర్‌ రెడ్డి, ప్రణాళికా మండలి ఉపాధ్యక్షుడు చిన్నారెడ్డి, ఎమ్మెల్యేలు పాల్గొన్నారు.

సాక్షి, అమరావతి: రాష్ట్రంలోని గ్రామీణ ప్రాంతాల్లో ఉండే డ్వాక్రా మహిళల పొదుపు బిలియన్‌ డాలర్లను దాటేసింది. ప్రపంచ ఆర్థిక వ్యవస్థలో బిలియన్‌ డాలర్లకు ప్రత్యేక స్థానం ఉంది. బిలియన్‌ డాలర్ల మూల ధన నిధి.. అంటే ప్రస్తుత ధరల ప్రకారం రూ.7,324 కోట్లు. ఈ మేరకు మూల ధన నిధి ఉండే కంపెనీలకు వ్యాపార రంగంలో ప్రత్యేక ప్రాధాన్యత ఉంటుంది. గ్రామీణ ప్రాంతాల్లోని పొదుపు సంఘాల మహిళలు పొదుపు చేసుకున్న మొత్తం ప్రస్తుతం రూ.8,706 కోట్లకు చేరింది. సంఘాలలో సభ్యులుగా ఉండే మహిళలు ప్రతి నెలా వంద రూపాయల చొప్పున తప్పనిసరిగా పొదుపు చేసుకోవాలన్న నిబంధన ఉంది. రాష్ట్రంలో పొదుపు సంఘాల వ్యవస్థ మొదలైన కొత్తలో రోజుకు ఒక రూపాయి చొప్పున నెలకు రూ.30 పొదుపు చేసుకునేవారు. క్రమంగా ఆ మొత్తం రూ.వందకు పెరిగింది. సంఘంలో ఎంత మంది సభ్యులు ఉంటే అంతమంది ప్రతి నెలా సమావేశమై, తమ స్థితిగతులను చర్చించుకుంటారు. అందరి సభ్యుల పొదుపును పోగు చేసి, సంఘం పేరిట బ్యాంకులో పొదుపు ఖాతాల్లో జమ చేసుకుంటారు. ఈ మొత్తానికి తోడు సంఘ సభ్యుల రుణ చెల్లింపుల రికార్డు ఆధారంగా బ్యాంకులు ఆయా సంఘాలకు తిరిగి కొత్త రుణాలు మంజూరు చేస్తుంటాయి. గత ప్రభుత్వ తీరుతో డీలా ఒక్క ఏప్రిల్‌ నెలలోనే మహిళలు రూ.81.76 కోట్ల మొత్తాన్ని పొదుపు చేసుకున్నారు. గత రెండేళ్లుగా ప్రతి నెలా రూ.70 కోట్లకు తగ్గకుండా పొదుపు చేసుకుంటున్నారు. అయితే, చంద్రబాబు ప్రభుత్వ హయాంలో 2014 జూన్‌ తర్వాత నుంచి 2016 మార్చి మధ్య చాలా నెలల పాటు గ్రామీణ ప్రాంత పొదుపు సంఘాల మహిళలు ప్రతి నెలా రూ.7 లక్షల చొప్పున మాత్రమే పొదుపు చేసుకునే పరిస్థితి ఉండేది. 2014 అసెంబ్లీ ఎన్నికల సమయంలో డ్వాక్రా రుణాలన్నీ మాఫీ చేస్తానని హామీ ఇచ్చిన చంద్రబాబు.. అధికారంలొకి వచ్చాక హామీని గాలికి వదిలేశారు. దీంతో అప్పట్లో పొదుపు సంఘాల మహిళలు ప్రతి నెలా సమావేశాలు కూడా ఏర్పాటు చేసుకోలేని పరిస్థితి నెలకొంది. దీంతో మహిళలు పొదుపు పట్ల ఆసక్తి చూపలేదు. వైఎస్‌ జగన్‌ ముఖ్యమంత్రిగా బాధ్యతలు చేపట్టాక, పొదుపు సంఘాల మహిళలకు వైఎస్సార్‌ ఆసరా, సున్నా వడ్డీ పథకాలను అమలు చేయడంతో వారు కార్యకలాపాల్లో తిరిగి చురుగ్గా పాల్గొంటున్నారు.  పొదుపు డబ్బును వినియోగించుకోవచ్చు.. పొదుపు సంఘాల మహిళలు ప్రతి నెలా దాచుకున్న డబ్బు ఇప్పటి వరకు బ్యాంకులో పొదుపు ఖాతాల్లో నిరుపయోగంగా ఉంటున్నట్టు సెర్ప్‌ అధికారులు వెల్లడించారు. వారు దాచుకున్న డబ్బు రూ.8,706 కోట్లు ఉన్నా, వారు ఆ డబ్బును అలానే తక్కువ వడ్డీ వచ్చే పొదుపు ఖాతాలో ఉంచి, అధిక వడ్డీకి ఆవే బ్యాంకుల నుంచి రుణాలు తీసుకుంటున్నారు. వారి పొదుపు డబ్బుకు 4 శాతం వడ్డీ వస్తుండగా, వారు బ్యాంకుల నుంచి 10 శాతం వడ్డీకి రుణాలు తీసుకుంటున్నట్టు అధికార వర్గాలు వెల్లడించాయి. ఈ నేపథ్యంలో ఇక నుంచి మహిళలు తమ పొదుపు సంఘంలో దాచుకున్న మొత్తాన్ని మొదట సంఘంలో డబ్బు అవసరం ఉన్న మహిళలకు అప్పుగా ఇచ్చిన తర్వాతే ఇతరులకు అవసరం మేరకు బ్యాంకుల నుంచి రుణం తీసుకునేలా సెర్ప్‌ అధికారులు కార్యాచరణ ప్రణాళికను సిద్ధం చేశారు. బ్యాంకులు కూడా పొదుపు సంఘాలలో డబ్బులను ష్యూరిటీగా ఉంచుకొని ఆయా సంఘాలకు కావాల్సిన మొత్తం రుణం ఇవ్వడం పరిపాటిగా కొనసాగుతోంది. కాగా, రుణ పంపిణీకి ఇబ్బంది లేకుండా పొదుపు సంఘాల మహిళలు తమ పొదుపు ఖాతాలో ఉన్న మొత్తాలను తొలత తమ అవసరాలకు ఉపయోగించుకోవడానికి వీలుగా ఎస్‌బీఐ, చైతన్య గోదావరి గ్రామీణ బ్యాంకు, డీసీసీబీ బ్యాంకులు ఇప్పటికే అంగీకారం తెలిపినట్టు సెర్ప్‌ అధికారులు తెలిపారు. గ్రామీణ ప్రాంత పొదుపు సంఘాలు ప్రస్తుతం వివిధ బ్యాంకుల నుంచి దాదాపు రూ.28 వేల కోట్ల రుణాలు తీసుకున్నట్టు గణాంకాలు చెబుతున్నాయి. ఈ నేపథ్యంలో పొదుపు సంఘాలు దాచుకున్న రూ.8,706 కోట్లను వారి అవసరాలకు ఉపయోగించుకునేందుకు వీలు కల్పించడం ద్వారా మహిళలు బ్యాంకు రుణాలపై ఆధార పడే పరిస్థితి తగ్గుతుంది. ఆయా సంఘాల మూల ధన నిధి మరింత పెరిగే అవకాశం ఉంది.   

ముంబై: మహిళలు రుణాలను ఆశ్రయించే పరిస్థితి పెరుగుతోంది. రిటైల్‌ రుణాలు తీసుకుంటున్న వారిలో మహిళల శాతం 2020 సెప్టెంబర్‌ నాటికి 28 శాతానికి చేరినట్టు ట్రాన్స్‌యూనియన్‌ సిబిల్‌ సంస్థ వెల్లడించింది. రుణాలు తీసుకుంటున్న మహిళల శాతం 2014 నుంచి 21 శాతం మేర పెరిగినట్టు వివరించింది. 2014 నాటికి రుణాలు తీసుకునే మహిళలు 23 శాతంగానే ఉన్నారని పేర్కొంది. కానీ ఇదే కాలంలో రుణాలను ఆశ్రయించిన పురుషులు 16 శాతమే పెరిగారని.. మొత్తం మీద పురుషులతో పోలిస్తే మహిళలే ఈ కాలంలో ఎక్కువగా రుణ బాట పట్టారని.. రుణ మార్కెట్లో మహిళా రుణ గ్రహీతల సంఖ్య 4.7 కోట్లకు చేరుకుందని సిబిల్‌ నివేదిక తెలియజేసింది. ‘‘రిటైల్‌ రుణాల్లో రూ.15.1 లక్షల కోట్లు నేడు మహిళలు తీసుకున్నవే. గత ఆరేళ్ల కాలంలో వార్షికంగా 12 శాతం చొప్పున పెరిగింది’’ అని వివరించింది. ‘‘కార్మిక శక్తిలో మహిళల భాగస్వామ్యం పెరగడానికి తోడు, ఆర్థిక అవకాశాలను సొంతం చేసుకునే దిశగా ప్రభుత్వం తీసుకున్న విధానపరమైన చర్యలు ఈ వృద్ధికి దోహదపడ్డాయి’’ అని సిబిల్‌ సీవోవో హర్షలా చందోర్కర్‌ తెలిపారు. కొన్ని రాష్ట్రాల్లో మహిళలు ఇళ్ల కొనుగోలుపై స్టాంప్‌ డ్యూటీ చార్జీలు తక్కువగా ఉండడం, మహిళలకు ప్రోత్సాహకంగా కొన్ని బ్యాంకులు తక్కువ వడ్డీ రేటుకు గృహ రుణాలను ఆఫర్‌ చేస్తుండడం కూడా దీనికి తోడ్పడినట్టు చెప్పారు.  


 ఒంగోలు టౌన్:జిల్లాలోని అర్హత కలిగిన స్వయం సహాయక సంఘాలకు, రైతులకు ఇతోధికంగా రుణాలు అందించి లక్ష్యసాధనలో బ్యాంకర్లు తమవంతు సహకారం అందించాలని కలెక్టర్ జీఎస్‌ఆర్‌కేఆర్ విజయకుమార్ ఆదేశించారు. శనివారం స్థానిక సీపీవో కాన్ఫరెన్స్ హాలులో నిర్వహించిన జిల్లా స్థాయి బ్యాంకర్ల సంప్రదింపుల కమిటీ సమావేశంలో ఆయన మాట్లాడారు. రాష్ట్ర ప్రభుత్వం రుణమాఫీ, స్వయం సహాయక సంఘాలకు అందించే బ్యాంకు లింకేజీలకు అధిక ప్రాధాన్యం ఇస్తుందన్నారు. నెలాఖరులోగా బ్రాంచ్ మేనేజర్లు, అధికారులకు ఓరియంటేషన్ కార్యక్రమం నిర్వహించాలని ఆదేశించారు.  మండల స్థాయిలో నిర్వహించే జేఎంఎల్‌బీసీలో, గ్రామ సభల్లో బ్రాంచ్ మేనేజర్లు విధిగా హాజరు కావాలని  కలెక్టర్ ఆదేశించారు. బ్రాంచ్ మేనేజర్లు హాజరు కాకుంటే ఎందుచేత హాజరు కాలేదో రాతపూర్వకంగా తెలియజేయాలన్నారు.
  
  28 నుంచి గ్రామాల ఎంపిక
  వివిధ కార్పొరేషన్లలో యూనిట్ల మంజూరు, గ్రౌండింగ్, లబ్ధిదారులకు సంబంధించి ఈనెల 28, 29 తేదీల్లో మండల పరిషత్ అభివృద్ధి అధికారులతో మండల కమిటీల ద్వారా గ్రామాల ఎంపిక ప్రక్రియ నిర్వహించాలని  కలెక్టర్ ఆదేశించారు. 30, 31 తేదీల్లో నిర్దేశించిన ప్రాంతాల్లో అవగాహన సదస్సులు నిర్వహించాలని సూచించారు. నవంబర్ 12 నుంచి 28వ తేదీ వరకు గ్రామసభల ద్వారా లబ్ధిదారుల ఎంపిక చేపట్టాలన్నారు. డిసెంబర్ 3నుంచి 5వ తేదీ వరకు ఎంపికైన అభ్యర్థులకు అవగాహన సదస్సులు నిర్వహించాలని ఆదేశించారు. 9 నుంచి 21వ తేదీ వరకు డాక్యుమెంటేషన్, బ్యాంకు ఖాతాల తెరిచే ప్రక్రియ నిర్వహించాలన్నారు. 23 నాటికి స్క్రూట్నీ నిర్వహించి తుది జాబితా జిల్లా కేంద్రానికి పంపించాలని ఆదేశించారు. 23 నుంచి 31వ తేదీలోపు కార్పొరేషన్ అధికారులు మంజూరు ఉత్తర్వులు జారీ చేయాలన్నారు. ఎంపికైన అభ్యర్థులకు వచ్చే ఏడాది జనవరి 5 నుంచి సంబంధిత రంగాలపై శిక్షణ ఇవ్వాలన్నారు. 19 నుంచి 31వ తేదీలోపు మంజూరైన యూనిట్లు గ్రౌండింగ్ అయ్యేలా చూడాలని కలెక్టర్ ఆదేశించారు. లబ్ధిదారులకు రిసోర్స్ పర్సన్స్, సాంకేతిక పరిజ్ఞానం కలిగిన వారితో శిక్షణ ఇప్పించాలన్నారు. గతంలో మంజూరై గ్రౌండింగ్ అయిన యూనిట్లకు సంబంధించి యుటిలైజేషన్ సర్టిఫికెట్లు బ్యాంకర్లు సంబంధిత అధికారులకు పంపాలన్నారు. బ్యాంకుల ద్వారా పౌరులకు అందాల్సిన సేవలు, మౌలిక వసతులు సక్రమంగా కల్పించాలని ఆదేశించారు.
  
  క్రెడిట్ ప్లాన్ ఆవిష్కరణ:
  2015-2016 ఆర్ధిక సంవత్సరానికి సంబంధించిన నాబార్డు పొటెన్షియల్ లింక్‌డ్ క్రెడిట్ ప్లాన్‌ను కలెక్టర్ విజయకుమార్ ఆవిష్కరించారు. 2014-2015 ఆర్థిక సంవత్సరానికి సంబంధించి ఎస్సీ, ఎస్టీ, బీసీ, మైనార్టీ, ఫైనాన్స్ కార్పొరేషన్, స్టెప్, పశుసంవర్ధకశాఖ, మెప్మాలకు సంబంధించిన కార్యాచరణ ప్రణాళికలను సంబంధిత అధికారులు వివరించారు. డీఆర్‌డీఏ, ఐకేపీ తరఫున సెప్టెంబర్‌లో రూ.332 కోట్లు స్వయం సహాయక సంఘాలకు బ్యాంకు లింకేజీ లక్ష్యం కాగా, రూ.183 కోట్లు చేరుకున్నట్లు పీడీ పద్మజ వివరించారు. సమావేశంలో సిండికేట్ బ్యాంకు డీజీఎం పీబీఎల్ నరసింహారావు, నాబార్డు ఏజీఎం జ్యోతిశ్రీనివాస్, ఆర్‌బీఐ ప్రతినిధి మురళీధర్, ఎల్‌డీఎం నరసింహారావు, ఎస్సీ కార్పొరేషన్ ఈడీ రాజు, బీసీ కార్పొరేషన్ ఈడీ నాగేశ్వరరావు, మైనార్టీ ఫైనాన్స్ కార్పొరేషన్ ఈడీ సప్తగిరి, స్టెప్ సీఈవో బీ రవి, పశుసంవర్ధకశాఖ జేడీ రజనీకుమారి తదితరులు పాల్గొన్నారు.
  
  31లోపు హౌస్ హోల్డ్  సర్వే పూర్తిచేయాలి
  ప్రధానమంత్రి జన్‌ధన్ యోజనకు సంబంధించి జిల్లాలో హౌస్ హోల్డ్ సర్వే ఈనెల 31నాటికి పూర్తి చేయాలని డీఆర్‌డీఏ పీడీ పద్మజను కలెక్టర్ ఆదేశించారు. సర్వే చేసిన వివరాలను కంప్యూటరీకరించాలన్నారు. సర్వేకు సంబంధించిన ఫారాలు అన్ని బ్యాంకులకు పంపేలా చర్యలు తీసుకోవాలన్నారు. సర్వే చేసిన వివరాలను అకనాలెడ్జ్‌మెంట్‌తో సంబంధిత బ్రాంచ్ మేనేజర్‌కు అందించేలా చర్యలు తీసుకోవాలన్నారు. ప్రతి ఒక్కరికీ బ్యాంకు ఖాతా ఉండేలా బ్యాంకర్లు సహకరించాలని సూచించారు.