Wasps

తేనెటీగలు, ఇతర కీటకాలను వేటాడే ఆసియా కందిరీగలు వేగంగా విస్తరిస్తున్నాయి. గుయెర్న్సీలో ఈ ఏడాది ఇప్పటివరకు 44 కందిరీగల గూళ్లను గుర్తించారు. గత ఏడాది నమోదైన 17 గూళ్లతో పోలిస్తే ఈ సంఖ్య రెండింతలకు పైగా పెరిగింది. దీంతో అక్కడి అధికారులు అప్రమత్తమయ్యారు.ఆసియా కందిరీగలు ఇతర కీటకాలపై దాడి చేసే ఆక్రమణ జాతి. ముఖ్యంగా తేనెటీగలకు ఇవి పెద్ద ముప్పుగా మారాయి. ఈ కందిరీగల ఆహారంలో 39 శాతం తేనెటీగలే ఉంటున్నాయని అధికారులు చెబుతున్నారు. వీటి సంఖ్య పెరిగితే స్థానిక జీవవైవిధ్యంపై కూడా ప్రభావం పడే ప్రమాదం ఉందని అంటున్నారు.గుయెర్న్సీలో 2026 మార్చి నుంచి ఇప్పటివరకు మొత్తం 44 గూళ్లలో.. చిన్న గూళ్లతోపాటు, వేలాది కందిరీగలు ఉండే భారీ గూళ్లను అధికారులు గుర్తించారు. 2025లో 17, 2024లో నాలుగు, 2023లో 19, 2022లో నాలుగు గూళ్లు మాత్రమే బయటపడ్డాయి. 2017లో తొలిసారిగా ఈ కందిరీగలు అక్కడ కనిపించగా.. గుర్తించిన గూళ్లను అధికారులు ప్రత్యేకంగా పర్యవేక్షించి, పొడి రూపంలోని పురుగుమందుతో వాటిని తొలగిస్తున్నారు.అయితే, వసంతకాలం రాగానే రాణిగా పిలవబడే ఆడ కందిరీగ నిద్రాణస్థితి నుంచి బయటకు వచ్చి గూడు కట్టడం ప్రారంభిస్తుంది.. మొదటగా 100 వరకు కందిరీగలు ఉండే చిన్న గూడును ఏర్పాటు చేసి, మిగతా కందిరీగలను పెంచుతుంది. ఆ తర్వాత చెట్లపై ఎత్తైన ప్రదేశాల్లో పాత గూడును సరిచేస్తూ పెద్ద గూడును నిర్మిస్తుంది. ఇలాంటి రెండవ గూళ్లలో ఏకంగా 5 వేల వరకు కందిరీగలు ఉండే అవకాశం ఉంది. పొదలు, కంచెలు, ఇంటి పైకప్పుల వంటి మనుషులు తరచూ తిరిగే ప్రాంతాల్లో గూళ్లు ఉంటే ప్రమాదం ఎక్కువగా ఉంటుందని కీటకాలపై పరిశోధనలు చేసే నిపుణులు చెబుతున్నారు.వీటి సంఖ్యను నియంత్రించేందుకు.. వసంతకాలంలోనే రాణి కందిరీగలను గుర్తించి నిర్మూలించే ప్రయత్నం చేస్తున్నారు. అలా చేస్తే జనావాసాల్లో అవి వాటి గూళ్లను ఏర్పాటు చేయకుండా అడ్డుకోవచ్చని అధికారులు భావిస్తున్నారు. ప్రస్తుతం ఫాట్సియా జపోనికా, కామెలియా మొక్కల పూలపై ఈ కందిరీగలు కనిపించే అవకాశం ఉంది. దాంతో చుట్టూ ఉన్న పరిసరాలను గమనించాలని, కందిరీగలు లేదా వాటి గూళ్లు కనిపిస్తే వెంటనే పర్యావరణ శాఖ అధికారులకు సమాచారం ఇవ్వాలని అక్కడి స్థానిక ప్రజలకు, అలాగే ఈ మొక్కలు ఉన్నవారికి అధికారులు తగు సూచనలు ఇస్తున్నారు.ఇదీ చదవండి: బల్లి కాళ్లకు జిగురు ఉంటుందా? తోకను ఎందుకు తెంచుకుంటుంది?

ఓల్డెన్‌బర్గ్‌ : సాధారణంగా నేరస్తులను పట్టుకోవటానికి ‘‘స్టింగ్‌ ఆపరేషన్‌’’ చేస్తుంటారు. పక్కాగా ఓ పథకం ప్రకారం నేరగాడ్ని వల వేసి పట్టుకోవటం ఈ స్టింగ్‌ ఆపరేషన్‌ ప్రత్యేకత. కానీ, జర్మనీలో చోటుచేసుకున్న స్టింగ్‌ ఆపరేషన్‌ మాత్రం ఇందుకు భిన్నమైనది. జైలు నుంచి పారిపోతున్న ఖైదీని పట్టుకోవటానికి కందిరీగలు ‘‘స్టింగ్‌’’ ఆపరేషన్‌ చేశాయి(యాదృచ్ఛికంగా). వివరాల్లోకి వెళితే.. జర్మనీ ఓల్డెన్‌బర్గ్‌లోని ఓ జైలు నుంచి 32 ఏళ్ల ఓ ఖైదీ తప్పించుకున్నాడు. జైలు బాల్కనీలోంచి నేరుగా కందిరీగలు ఉన్న తెట్టెపైకి దూకాడు. దీంతో ఆగ్రహానికి గురైన కందిరీగలు అతడ్ని వెంటాడి కుట్టడం ప్రారంభించాయి. నొప్పి తాళలేక అతడు వీధుల్లో పరుగులు పెట్టసాగాడు. అయినప్పటికి అవి అతడ్ని వదలలేదు. ఇక చేసేదేమీ లేక అతడు అక్కడే ఉన్న ఓ ప్లాస్టిక్‌ స్విమ్మింగ్‌ పూల్‌లోకి దూకి తలదాచుకున్నాడు. ఖైదీని వెంటాడుతూ వచ్చిన పోలీసులు పూల్‌ దగ్గర అతడ్ని పట్టుకున్నారు. ‘‘స్టింగ్‌’’ ఆపరేషన్‌తో ఖైదీని పట్టించిన కందిరీగలకు పోలీసులు కృతజ్ఞతలు తెలిపారు.

వెదురుకొమ్మల కోసం అడవికి వెళ్లిన ఆరేళ్ల చిన్నారి అనుకోని ప్రమాదంలో చిక్కకొని ప్రాణాలు కోల్పోయింది. కందిరీగలు దాడి చేసి కుట్టడంతో తీవ్రంగా గాయపడి చికిత్స పొందుతూ కన్నుమూసింది. ఈ విషాద సంఘటన జి.మాడుగుల మండలంలో చోటుచేసుకోగా..వంతాల సంధ్య మృత్యువుఒడిలోకి చేరింది. కందిరీగల  దాడిలో మరో ఇద్దరు గాయపడ్డారు.  సాక్షి, జి.మాడుగుల :  కె.కోడాపల్లి పంచాయతీ కవలపూలు పైవీధి గ్రామానికి చెందిన వంతాల సుబ్బారావు, వంతాల సీత భార్యభర్తలు. వీరితో పాటు ముగ్గురు ఆడపిల్లలు, గ్రామానికి చెందిన మరో ముగ్గురు గిరిజనులు కలసి గన్నేరుపుట్ట గ్రామం వద్ద అడవికి గురువారం సాయంత్రం సమయంలో వెదురుకొమ్ములు సేకరించటానికి వెళ్లారు. ఇంతలో కందిరీగలు గుంపుగా వచ్చి వీరిపై దాడి చేయగా వీరిలో అయిదుగురు వ్యక్తులు తప్పించుకొని పారిపోయారు. వంతాల సీత, వంతాల సంధ్య (6), 3 సంవత్సరాల వయస్సు గల వంతాల లక్ష్మిలపై  కందిరీగలు, కొండ ఈగలు దాడి చేయటంతో తీవ్రంగా గాయపడ్డారు. ఈ సమాచారాన్ని ఆశ వర్కర్‌ వైద్య సిబ్బందికి తెలిజేశారు. దీంతో అంబులెన్స్‌ పంపించి హుటాహూటిన జి.మాడుగుల పీహెచ్‌సీకి రాత్రి ఎనిమిది గంటల సమయంలో తరలించారు. వైద్యాధికారి డాక్టర్‌ వినోద్‌ కుమార్‌ వైద్యం అందిస్తున్న సమయంలో వంతాల సంధ్య మృతి చెందింది. మృతురాలి తల్లి సీత, వంతాల లక్ష్మిలకు చికిత్స అందించారు. వీరి ప్రాణాపాయం నుంచి బయటపడ్డారు. కాగా కందిరీగల దాడిలో తీవ్రంగా గాయపడిన వంతాల సీత, 3 సంవత్సరాల వంతాల లక్ష్మిలకు మరోసారి వైద్యం అందించేందుకు శుక్రవారం ఉదయం వైద్య సిబ్బంది, ఏఎన్‌ఎం సుమిత్ర, హెల్త్‌ అసిస్టెంట్‌ సప్పి బాలయ్యలు కవలపూలు గ్రామానికి ప్రయాసపడి కాలినడక వెళ్లారు. సీత, లక్షిలను వైద్యం చేయింటానికి అంబులెన్స్‌ ఏర్పాటు చేసి ఎంత బతిమిలాడిన ససేమిరా అన్నారు. దీంతో భాషా సంస్కృతులతో వైద్యానికి ఒప్పించి పాడేరు కమ్యూనిటీ ఆస్పత్రికి తలించి వైద్యం చేయించారు. సీత, లక్ష్మిలు ఆరోగ్యంగా నిలకడగా ఉందని వైద్యులు తెలిపారు.