కమెడియన్ కెరీర్ మంచి ఫాంలో ఉన్న టైంలోనే హీరోగా టర్న్ తీసుకున్న నటుడు సునీల్. కథానాయకుడిగా మారిన తరువాత ఒకటి రెండు సినిమాలతో పరవాలేదనిపించినా, తరువాత మాత్రం ఆకట్టుకోలేకపోతున్నాడు. రొటీన్ క్యారెక్టర్లతో బోర్ కొట్టిస్తున్న ఈ భీమవరం బుల్లోడు సరైన సక్సెస్ కోసం చాలా రోజులుగా ఎదురు చూస్తున్నాడు. దిల్ రాజు లాంటి స్టార్ ప్రొడ్యూసర్ తో కలిసి చేసిన కృష్ణాష్టమి కూడా నిరాశపరచటంతో తన తదుపరి సినిమా మీద చాలా ఆశలు పెట్టుకున్నాడు.
 
 ప్రస్తుతం సునీల్, వంశీకృష్ణ ఆకెళ్ల దర్శకత్వంలో జక్కన్న సినిమాలో హీరోగా నటిస్తున్నాడు. యాక్షన్ డ్రామాగా తెరకెక్కుతున్న ఈ సినిమాలో సునీల్ మార్క్ కామెడీ కూడా బాగానే ఉంది. ఇటీవల విడుదలైన ట్రైలర్ సినిమా మీద పాజిటివ్ టాక్ క్రియేట్ చేసిన రిజల్ట్ విషయంలో మాత్రం చిత్ర యూనిట్ టెన్షన్ పడుతూనే ఉన్నారు. రక్ష సినిమాతో డైరెక్టర్ గా ఎంట్రీ ఇచ్చిన వంశీకృష్ణకు కూడా జక్కన్న సక్సెస్ చాలా కీలకం. మరి రాజమౌళి పేరుతో వస్తున్న ఈ సినిమా అయినా సునీల్ కెరీర్ ను గాడిలో పెడుతుందేమో చూడాలి.


 ‘రాళ్లను శిల్పాలుగా చెక్కి అమరశిల్పి జక్కన్న ఎంతో కీర్తి పొందారు. ఎందుకూ పనికి రాడనుకున్న వాడు గొప్ప గొప్ప పనులు చేసి లక్ష్యసాధనలో ఎలా విజయం సాధించాడన్నదే ఈ సినిమా ముఖ్య కథాంశం’’ అని హీరో సునీల్ చెప్పారు. సునీల్, మన్నార్ చోప్రా జంటగా వంశీ కృష్ణ ఆకెళ్ల దర్శకత్వంలో ఆర్.సుదర్శన్ రెడ్డి నిర్మిస్తున్న చిత్రం ‘జక్కన్న’. ఈ సినిమా టైటిల్‌ను, మోషన్ పిక్చర్‌ను శుక్రవారం విడుదల చేశారు. ‘‘కంప్లీట్ ఎంటర్‌టైనర్‌గా తెరకెక్కుతున్న ఈ చిత్రం షూటింగ్ ఎనభై శాతం పూర్తయింది. ఈ వేసవిలోనే సినిమాను విడుదల చేసేందుకు సన్నాహాలు చేస్తున్నాం’’ అని దర్శక, నిర్మాతలు తెలిపారు. కెమేరామ్యాన్ సి. రామ్‌ప్రసాద్, సంగీత దర్శకుడు దినేశ్, మాటల రచయితలు భవానీ ప్రసాద్, జీఆర్ మహర్షి, నటులు రాజా రవీంద్ర, సప్తగిరి, సహ నిర్మాతలు ఆయుష్ రెడ్డి, అక్షిత్ రెడ్డి తదితరులు పాల్గొన్నారు.


  ‘రాక్ ఆన్’, ‘లైఫ్ పార్టనర్’, ‘బోల్ బచ్చన్’, ఏక్ విలన్’.. ఇలా హిందీలో అరడజను చిత్రాలకు పైగా నటించారు ప్రాచీ దేశాయ్. ప్రస్తుతం హిందీలో ఆమె రెండు చిత్రాల్లో నటిస్తున్నారు. ఇవి కాకుండా తెలుగులో సునీల్ సరసన కథానాయికగా నటించడానికి గ్రీన్ సిగ్నల్ ఇచ్చారు. వంశీకృష్ణ ఆకెళ్ల దర్శకత్వంలో ఆర్‌పీఎ క్రియేషన్స్ పతాకంపై ఆర్. సుదర్శన్ రెడ్డి ఈ చిత్రాన్ని నిర్మించనున్నారు. ఈ నెలలోనే చిత్రీకరణ ఆరంభం కానుంది. ఇందులో సునీల్ పాత్ర చాలా వైవిధ్యంగా ఉంటుందని దర్శక, నిర్మాతలు తెలిపారు.


 ‘అందాల రాముడు’, ‘మర్యాద రామన్న’, ‘పూల రంగడు’ తదితర చిత్రాలతో హాస్య నటుడు సునీల్ హీరోగా స్థిరపడిపోయారు. ప్రస్తుతం ఆయన హీరోగా ఆర్.పి.ఏ క్రియేషన్స్ పతాకంపై ఆర్. సుదర్శన్‌రెడ్డి ఓ చిత్రం నిర్మించనున్నారు. ‘రక్ష' ఫేం వంశీకృష్ణ ఆకెళ్ల దర్శకత్వంలో ఈ చిత్రం రూపొందనుంది. శనివారం సునీల్ పుట్టినరోజు సందర్భంగా ఈ చిత్రవిశేషాలను తెలియజేశారు. నిర్మాత మాట్లాడుతూ - ‘‘మా సంస్థ తీసిన తొలి చిత్రం ‘ప్రేమకథా చిత్రమ్’ మంచి విజయాన్ని సొంతం చేసుకుంది.
 
 మలి చిత్రం కూడా ఆ స్థాయిలో ఉండాలనే ఆకాంక్షతో చాలా కథలు విన్నాం. వంశీకృష్ణ చెప్పిన కథ బాగా నచ్చింది. సునీల్ నుంచి ప్రేక్షకులు ఎలాంటి చిత్రం కోరుకుంటారో అలా ఉంటుంది. ఈ చిత్రంలో ఆయన శారీరక భాష కొత్తగా ఉంటుంది. త్వరలో చిత్రీకరణ ఆరంభిస్తాం’’ అని చెప్పారు. ‘‘ఒక మంచి వాణిజ్య చిత్రానికి ఎలాంటి అంశాలు ఉండాలో అవన్నీ పుష్కలంగా ఉన్న చిత్రం ఇది’’ అని దర్శకుడు పేర్కొన్నారు. ఈ చిత్రానికి సహనిర్మాతలు: ఆర్. ఆయుష్‌రెడ్డి, ఆర్.పి. అక్షిత్‌రెడ్డి.