ఎల్బీ స్టేడియం, న్యూస్‌లైన్: అంతర్ జిల్లా అండర్-19 జూనియర్ కాలేజి సాఫ్ట్‌బాల్ టోర్నమెంట్‌లో బాలికల టీమ్ టైటిల్‌ను హైదరాబాద్ జట్టు చేజిక్కించుకుంది. బాలుర  విభాగంలో కరీంనగర్ జట్టు విజేతగా నిలిచింది. కరీంనగర్‌లోని డాక్టర్ బి.ఆర్.అంబేద్కర్ స్టేడియంలో శనివారం జరిగిన బాలికల ఫైనల్లో హైదరాబాద్ జట్టు 17-3 స్కోరుతో కరీంనగర్ జట్టుపై విజయం సాధించింది. సెమీఫైనల్లో హైదరాబాద్ 22-5తో మెదక్‌పై, కరీంనగర్ 15-5తో వరంగల్‌పై గెలిచాయి.
 
 బాలుర విభాగం ఫైనల్లో కరీంనగర్ 2-0తో నెల్లూరుపై గెలిచింది. మూడో స్థానం కోసం జరిగిన మ్యాచ్‌లో మహబూబ్‌నగర్ 14-1తో నిజామాబాద్‌పై గెలిచింది. సెమీస్‌లో కరీంనగర్ 5-2తో మహబూబ్‌నగర్‌పై, నెల్లూరు 9-0తో నిజామాబాద్‌పై నెగ్గాయి. ఈ పోటీల ముగింపు వేడుకలకు కరీంనగర్ ఎంపీ పొన్నం ప్రభాకర్ ముఖ్య అతిథిగా విచ్చేసి విజేతలకు ట్రోఫీలను అందజేశారు. ఈ కార్యక్రమంలో రాష్ట్ర స్కూల్ గేమ్స్ సమాఖ్య కార్యదర్శి కె.విజయారావు, ఆర్గనైజింగ్ సెక్రటరీ మధు జాన్సన్ తదితరులు పాల్గొన్నారు.
  


 ఎల్బీ స్టేడియం, న్యూస్‌లైన్: ఇంటర్ కాలేజి మహిళల సాఫ్ట్‌బాల్ టోర్నమెంట్ టైటిల్‌ను భవాన్స్ కాలేజి జట్టు కైవసం చేసుకుంది. సైనిక్‌పురిలోని భవాన్స్ కాలేజి మైదానంలో శుక్రవారం జరిగిన ఫైనల్లో భవాన్స్ కాలేజి 8-1 స్కోరుతో సెయింట్ ఫ్రాన్సిస్‌పై ఘన విజయం సాధించింది. మూడో స్థానం కోసం జరిగిన మ్యాచ్‌లో రైల్వే డిగ్రీ కాలేజి 11-7 స్కోరుతో సెయింట్ ఆన్స్ కాలేజిపై గెలిచింది.
  
   సెమీఫైనల్లో భవాన్స్ 17-4తో సెయింట్ ఆన్స్‌పై, సెయింట్ ఫ్రాన్సిస్ కాలేజి 12-5తో  రైల్వే కాలేజిపై నెగ్గాయి. విజేతలకు భవాన్స్ కాలేజి ప్రిన్సిపల్ ప్రొఫెసర్ వై.అశోక్ ట్రోఫీలను అందజేశారు. ఈ కార్యక్రమంలో ఫిజికల్ డెరైక్టర్ డాక్టర్ జి.కొండల్‌రెడ్డి పాల్గొన్నారు.