ప్రయాగ్‌రాజ్‌: కుంభమేళాలో స్నానం చేస్తే తాము చేసిన పాపాలు తొలగిపోతాయని చాలామంది నమ్ముతారు. అయితే దీనికి విరుద్ధంగా కొందరు కుంభమేళా ప్రాంతంలో దొంగతనాలకు పాల్పడుతూ పాపాలను మూటగట్టుకుంటున్నారు. మధురలోని బృందావనాన్ని సందర్శించి, అక్కడినుంచి కుంభమేళాకు వచ్చిన ఒక వ్యక్తికి చేదు అనుభం ఎదురయ్యింది. జనసమూహంలో అతని పర్సు చోరీకి గురయ్యింది. ఆ పర్సులో నగదు, విలువైన కాగితాలు ఉన్నాయి. దీంతో అతను కాసేపు బాధపడ్డాడు. తిరిగి తన స్వస్థలానికి చేరడం ఎలా అని ఆలోచించాడు. వెనువెంటనే ఒక అద్భుతమైన ఆలోచన చేశాడు.జేబులో ఒక్కపైసా కూడా లేకపోవడంతో మరోమార్గం లేక అక్కడున్న కొందరు భక్తులకు తన పరిస్థితి చెప్పుకుని, డబ్బులు సాయం చేయాలని కోరాడు. వారిచ్చిన డబ్బుతో టీ తయారు చేసి విక్రయించసాగాడు. ఇలా కుంభమేళాలో రోజుకు రెండు, మూడు వేలు సంపాదిస్తూ రూ. 50 వేలు జమచేశాడు.పర్సుపోతే పోయిందిగానీ, అతనికి ఒక కొత్త ఉపాధి మార్గం దొరికింది. పేరు చెప్పడానికి ఇష్టపడని ఆయన మీడియాతో మాట్లాడుతూ ‘నేను బృందావనం నుంచి మహాకుంభమేళాలో స్నానం చేసేందుకు వచ్చాను. ఇంతలో నా పర్సు ఎవరో చోరీ చేశారు. ఏం చేయాలో తెలియక టీ విక్రయిస్తూ, డబ్బులు కూడబెట్టాలని నిర్ణయించుకున్నాను. రాత్రనక, పగలనక ఇక్కడికి వచ్చే భక్తులకు టీ అమ్ముతూ వచ్చాను. రోజుకు మూడు వేల రూపాయల వరకూ సంపాదించాను. అలా ఇప్పటివరకూ రూ. 50 వేలు కూడబెట్టాను’ అని తెలిపాడు. ఇది కూడా చదవండి: శివాజీ జయంతి: చిన్న లక్ష్యంతో మొదలుపెట్టి..

కర్ణాటక, బనశంకరి: ఆలయ దర్శనానికి వెళ్లిన ఎస్‌ఐ సతీమణికి చేదు అనుభవం ఎదురైంది. నగరంలో బనశంకరీ దేవి దర్శనానికి వెళ్లిన ఎస్‌ఐ భార్య పర్సును గుర్తుతెలియని దొంగలు చోరీ చేశారు. ఈ ఘటన కుమారస్వామి లేఔట్‌ పోలీస్‌స్టేషన్‌ పరిధిలో సోమవారం సాయంత్రం చోటుచేసుకుంది. వివరాలు... విశ్వేశ్వరపురం ట్రాఫిక్‌ ఎస్‌ఐ డీ.రమేశ్‌ సతీమణి హెచ్‌.గీత నలుగురు పోలీస్‌ అధికారుల భార్యలతో కలిసి సోమవారం సాయంత్రం బనశంకరీదేవీ దేవస్థానానికి వెళ్లారు. అందరూ క్యూలో వెళ్లి దర్శనం చేసుకుని వచ్చారు. ఇంతలో గీతా బ్యాగ్‌లో ఉన్న పర్సు మాయమైంది. అందులో 12 గ్రాముల బంగారు కమ్మలు, 8 గ్రాముల బరువుగల చైన్, బంగారు డాలర్, ఆధార్‌కార్డు, ఓటరు కార్డు తదితర పత్రాలు ఉన్నాయి.  ఖాళీ పర్సే దొరికింది   కంగుతిన్న బాధితురాలు కుమారస్వామి పోలీస్‌స్టేషన్‌లో ఫిర్యాదు చేయడంతో కేసు నమోదు చేసుకున్న పోలీసులు బనశంకరీ దేవస్ధానంలో పరిశీలించారు. మహిళా శౌచాలయంలో పనిచేసే మహిళా సిబ్బందికి పర్సు లభించడంతో పోలీసులకు అప్పగించారు. అయితే అది ఖాళీగా ఉంది. దొంగలు మొత్తం ఊడ్చుకుని ఖాళీ పర్సను పడేసి వెళ్లారు.  మహిళా దొంగల పనేనా   మహిళా దొంగలే చోరీకి పాల్పడ్డారని పోలీసులు అనుమానిస్తున్నారు. ఆలయంలో తరచూ భక్తుల నగలు, పర్సులు చోరీ అవుతున్నాయి. కుమారస్వామి లేఔట్‌ పోలీస్‌ స్టేషన్‌ మహిళా పోలీస్‌ సిబ్బంది భక్తుల మాదిరిగా దేవస్థానంలో మకాం వేసి భద్రత కల్పిస్తున్నారు. కానీ చోరీలు మాత్రం జరిగిపోతున్నాయని భక్తులు వాపోతున్నారు. దేవస్ధానం వద్ద సీసీ కెమెరాలు లేని స్ధలాల్లో మాత్రమే చోరీలు జరుగుతున్నాయి. భక్తులు ఆలయం చుట్టూ సీసీ కెమెరాలు అమర్చాలని డిమాండ్‌ చేస్తున్నారు.

టెక్కలి రూరల్‌ శ్రీకాకుళం : కడుపు నొప్పిగా ఉందని మాయమాటలు చెప్పి పర్సు చోరీ చేసిన ఘటన బుధవారం అక్కవరం జంక్షన్‌లో చోటుచేసుకుంది. లింగాలవలసకు చెందిన రోణంకి శ్రీరామ్మూర్తి దండుగోపాలపురంలో పశు వైద్యాధికారిగా పనిచేస్తున్నారు. బుధవారం తన విధులు ముగించుకుని బైకుపై తిరిగి వస్తుండగా అక్కవరం జంక్షన్‌ సమీపంలో ఓ వ్యక్తి బండి ఆపాడు. ‘సార్‌.. మీరు డాక్టర్‌ కదా.. నాకు కడుపులో నొప్పిగా ఉంది.. కొంచెం ట్రీట్‌మెంట్‌ చేయండి..’ అని అడిగాడు. అందుకు శ్రీరామ్మూర్తి స్పందిస్తూ తాను పశువైద్యాధికారినని.. టెక్కలి వెళ్లి మంచి వైద్యునికి చూపించు అని సలహాఇచ్చారు. సదరు వ్యక్తి ‘అలాగే సార్‌.. అని చెబుతూ శ్రీరామ్మూర్తి వద్దకు వెళ్లి తనకు ఎక్కడ నొప్పి వస్తుందో చేతితో తాకుతూ చెప్పి తిరిగి వెళ్లిపోయాడు. శ్రీరామ్మూర్తి ఇంటికి వచ్చి చూసేసరికి పర్సు పోయిందని గ్రహించి, కొద్దిసేపటి కింద తనను కలిసిన వ్యక్తిపైనే అనుమానం ఉందంటూ పోలీసులకు సమాచారం ఇచ్చారు. పర్సులో రూ.3800 నగదుతో పాటు రూ.2లక్షల 16వేల చెక్, ఆధార్‌ కార్డు, గుర్తింపు కార్డు ఉన్నాయని ఫిర్యాదులో పేర్కొన్నారు.     


 నల్లచెరువు : స్థానిక తహశీల్దార్‌ కార్యాలయంలో తహశీల్దార్‌ కళావతి పర్సు చోరీకి గురైంది. ఈ మేరకు తహశీల్దార్‌ గురువారం పోలీసులకు ఫిర్యాదు చేశారు. ఈ సందర్భంగా ఆమె మాట్లాడుతూ తహశీల్దార్‌ కార్యాలయంలోని తన ఛాంబర్‌ నుంచి కంప్యూటర్‌ గదిలోకి వెళ్లి వచ్చానని భోజనం కోసం పర్సు తీసుకోవాలని చూడగా పర్సు కనపడలేదని, అందులో రూ.4వేల నగదు ఉన్నట్లు తెలిపారు.