కన్నవారి వద్దకు వెళ్లేందుకు ఆసక్తి
  
 సాక్షి, హైదరాబాద్‌: ‘తల్లిదండ్రులను కలవను, నేను వారితో ఉంటే వారికి చెడు జరుగుతుంది..’అంటూ భీష్మించుకు కూర్చున్న పూర్ణిమసాయి వైఖరిలో మార్పు వచ్చినట్టు తెలుస్తోంది. ఇంటికి వెళ్లేందుకు ఆసక్తి చూపుతున్నట్లు సమాచారం. జూన్‌ 7న హైదరాబాద్‌ లో అదృశ్యమైన పూర్ణిమ ముంబైలో ఉన్నట్లు పోలీసులు కనుగొన్న విషయం తెలిసిందే. బుధవారం తెల్లవారుజామున నగరానికి తీసుకువచ్చిన పూర్ణిమని బాలల పరిరక్షణ సమితి(సీడబ్ల్యూసీ) ఆదేశాల మేరకు కాచి గూడ నింబోలిఅడ్డాలోని ప్రభుత్వ బాలికల సదన్‌కు తరలించారు. విషయం తెలుసుకొని ఉదయం బాలసదన్‌కు వచ్చిన ఆమె తల్లిదం డ్రులు నాగరాజు, విజయకుమారి సాయంత్రం వరకు అక్కడే వేచి ఉన్నారు. ఆమె ఉద్దేశాన్ని కౌన్సెలర్లు కూడా తెలుసుకునే ప్రయత్నం చేశారు.
 
 చైల్డ్‌ వెల్ఫేర్‌ కమిటీ (సీడబ్ల్యూసీ) సభ్యులు వెంకటేశ్వర్లు, పి.అంజన్‌రావు కూడా పూర్ణిమను కలసి ఇల్లు వదలి వెళ్లేందుకు గల కారణాలను అడిగి తెలుసుకున్నారు. ‘నేను యాక్టింగ్‌ కోర్సు చేస్తానంటే ఇంట్లో వద్దన్నారు. నాన్న డాక్టర్‌ కావాలని గట్టిగా కోప్పడ్డాడు. అందుకే ఇంటి నుంచి వెళ్లా. అమ్మనాన్నల వద్దకు వెళ్లేందుకు నాకు ఎలాంటి అభ్యంతరం లేదు’ అని ఆమె వారితో చెప్పినట్టు తెలిసింది.  సాయంత్రం తల్లిదండ్రులు, అమ్మమ్మతో మాట్లాడినట్టు సమాచారం. ముంబై నుంచి దాదాపు 14 గంటలపాటు ప్రయాణం చేసి అలసిపోయిన పూర్ణిమ కుదుటపడ్డాక మాట్లా డతామని, ఆమె ఇష్టాఇష్టాలు తెలుసుకుంటా మని, ఆ తర్వాత ఆమె తల్లిదండ్రులతో మాట్లా డాక ఓ నిర్ణయానికి వస్తామని సీడబ్ల్యూసీ చైర్‌పర్సన్‌ పద్మావతి ‘సాక్షి’కి తెలిపారు.
 
 ఇప్పటికే పూర్ణిమ మానసిక స్థితి కుదుటపడేలా కౌన్సెలింగ్‌ ఇస్తున్నామని, ఆమె తల్లిదండ్రు లతో వెళ్లేందుకు ఇష్టంగానే ఉన్నట్టు తెలిసిం దని, రేపు మరోసారి బాలికతో మాట్లాడిన తర్వాత శుక్రవారం సీడబ్ల్యూసీ తుది నిర్ణయం తీసుకుంటుందని చెప్పారు. పద్మావతి, వెంకటే శ్వర్లు, విజయాదేవి, నాగేశ్వరరావు, బాలా రాజ్‌లతో కూడిన బెంచ్‌ ఆఫ్‌ మేజిస్ట్రేట్స్‌ సమావేశమై పూర్ణిమతో, తర్వాత తల్లిదండ్రు లతో మాట్లాడనుంది. ప్రముఖ మానసిక నిపుణుడు వీరేందర్‌ పూర్ణిమకు కౌన్సెలింగ్‌ ఇచ్చేందుకు వెళ్లినా అనుమతించలేదు. 
  
 మానసిక ఒత్తిడికి లోనైంది: అంజన్‌రావు
 పూర్ణిమ మానసికంగా ఒత్తిడికి గురైనట్లు కనిపి స్తోందని అంజన్‌రావు అన్నారు. బాలిక తల్లి దండ్రులతో ఉండేందుకు అయిష్టత వ్యక్తం చేస్తూనే, ఒక్కోసారి వెళతానని అంటోందన్నా రు. పూర్ణిమని మాదాపూర్‌ డీసీపీ విశ్వ ప్రసాద్, కూకట్‌పల్లి ఏసీపీ భుజంగరావు కలిశారు. బాలిక మనస్సులో ఏదో ఆందోళనకరమైన విషయం ఉన్నట్లు కనిపిస్తోందని వారు తెలి పారు. బాలిక ఆరోగ్యంగానే ఉందన్నారు. తల్లిదండ్రులకు పంపే విషయంలో సీడబ్ల్యూ సీదే తుది నిర్ణయమని చెప్పారు.
  
 చదువులోనూ ముందంజే...
 నిజాంపేటలోని భాష్యం స్కూల్‌లో చదివే పూర్ణిమ విద్యార్థులందరితో కలివిడిగా ఉండడం తోపాటు చదువు విషయంలోనూ ముందంజలో ఉంటుందని ప్రిన్సిపాల్‌ సుధీర్‌ తెలిపారు. 70 శాతం పైగా మార్కులు సాధించి తరగతి గదిలో ముందువరుసలో ఉంటుందని చెప్పారు. ఆమె స్నేహితులు సాయిశ్రీ, పూజిత, దుర్గ మాట్లాడుతూ పూర్ణిమ అప్పుడప్పుడూ ఒంటరిగా ఉండి ఏదో ఆలోచిస్తుండేదన్నారు. ఆమెను ఏదైనా బాధ ఉన్నదా? అని అడిగితే తనకు ఇంట్లో అవమానం జరుగుతోందని చెప్పేదని వివరించారు. తన సోద రిని ఒక విధంగా, తనను మరోవిధంగా తన తల్లి దండ్రులు చూడడం ఎంతో బాధ కలిగించిందని చెప్పేదన్నారు. తనకు బ్యాంక్‌ ఉద్యోగం చేయాలని కూడా ఉందని పూర్ణిమ కొన్ని సందర్భాల్లో చెప్పినట్లు స్నేహితులు వివరించారు. ఇంట్లో జరుగుతున్న చిన్న, చిన్న మనస్పర్ధలే ఆమె ఇంటి వదిలివేయడానికి కారణం అయి ఉండవచ్చని ఆమె స్నేహితులు అభిప్రాయపడ్డారు. 


 హైదరాబాద్‌ : పదో తరగతి విద్యార్థిని పూర్ణిమ సాయి కథ ఎట్టకేలకు సుఖాంతమైంది. తల్లిదండ్రులతో కలిసి ఇంటికి వెళ్లేందుకు ఆమె అంగీకరించింది. సైకాలజిస్టుల కౌన్సెలింగ్‌తో పూర్ణిమ సాయి మనసు మార్చుకుంది. ముంబై స్టేట్‌హోంలో ఉన్నప్పుడు తల్లిదండ్రులకు వద్దకు వెళ్లనని, వాళ్ల ముఖాలే చూడనని తెగేసి చెప్పిన పూర్ణిమ... హైదరాబాద్‌కు రాగానే సానుకూలంగా స్పందించింది. గత నెల 7న అదృశ్యమై ముంబై చేరిన పూర్ణిమ సాయిని పోలీసులు ఇవాళ ఉదయం హైదరాబాద్‌ నింబోలి అడ్డాలోని బాలికాసదన్‌లో చేర్చారు.
 సుదీర్ఘ ప్రయాణం చేయటంతో అలసిపోయిన పూర్ణిమ ప్రస్తుతం విశ్రాంతి తీసుకుంటోంది. అయితే పూర్ణిమ ఆరోగ్యం  కుదుటపడ్డాకా... చైల్డ్‌ వెల్ఫేర్‌ కమిటీ  మరోసారి సమావేశమై  పూర్ణిమ ఇష్టానుసారం నిర్ణయం తీసుకోనున్నారు. పూర్ణిమ తండ్రి నాగరాజు మాట్లాడుతూ ‘పూర్ణిమ మాతో రావడానికి ఒప్పుకుంది. మాతో అరగంట పాటు మాట్లాడింది. అయితే అధికారికంగా పాపను మాకు అప్పగించేందుకు మరో రెండు రోజులు పడుతుంది.’ అన్నారు.
 
 ఈ సందర్భంగా పూర్ణిమ సాయి అమ్మమ్మ మాట్లాడుతూ ‘తల్లిదండ్రులతో కలిసి ఉంటే ఆపద వస్తుందని కలలో పూర్ణిమకు షిర్డీ సాయి చెప్పాడట. సైకాలజిస్టులతో పాటు మేం కూడా నచ్చజెప్పాం. మా ప్రయత్నం ఫలించింది. తల్లిదండ్రులతో ఉండేందుకు అంగీకరించింది.’ అని తెలిపారు.
 మరోవైపు  పూర్ణిమసాయికి  న్యాయం జరిగేలా చర్యలు తీసుకుంటామని బాలల హక్కుల కమిషన్ సభ్యుడు అంజన్‌రావు స్పష్టం చేశారు. పూర్ణిమ సాయి ఉదంతం మొత్తాన్ని  చైల్డ్ రైట్స్‌ కమిషన్ ద్వారా ప్రభుత్వానికి తెలియజేస్తామన్నారు. బాలల హక్కుల విషయంలో కఠినంగా వ్యవహరిస్తామని అసలు పూర్ణిమ ఎపిసోడ్‌లో ఏం జరిగిందో వాస్తవాలను తెలుసుకుంటామని చెప్పారు.


 హైదరాబాద్‌: నగరంలో అదృశ్యమై ముంబైలో ఆచూకీ లభించిన కూకట్‌పల్లి విద్యార్థిని పూర్ణిమ సాయి బుధవారం ఉదయం హైదరాబాద్‌కు తిరిగి చేరింది. ఆమెను పోలీసులు ముంబై నుంచి హైదరాబాద్‌కు తీసుకొచ్చారు. నింబోలిఅడ్డాలోని బాలికాసదన్‌కు ఆమెను తరలించారు. ఇవాళ మహిళా కమిషన్‌ ఎదుట హాజరుపరిచాక పూర్ణిమను తల్లిదండ్రులకు అప్పగించే విషయంపై అధికారులు నిర్ణయం తీసుకోనున్నారు. తల్లిదండ్రుల దగ్గరకు వెళ్లేందుకు ఆమె విముఖత వ్యక్తం చేసిన నేపథ్యంలో పూర్ణిమకు మరోసారి కౌన్సెలింగ్‌ ఇవ్వనున్నారు. అయితే పూర్ణిమ తమ దగ్గరకు కచ్చితంగా వస్తుందన్న విశ్వాసాన్ని ఆమె తల్లిదండ్రులు వ్యక్తం చేశారు. తమ కుమార్తె ఇష్టప్రకారం నడుచుకుంటామని ‘సాక్షి’ టీవీతో చెప్పారు.
 
 గత నెల 7వ తేదీన పూర్ణిమ సాయి ఆచూకీ లేకుండా పోయిన విషయం తెలిసిందే.  ముంబైలో డోం గ్రీ ప్రాంతంలోని బాలల గృహంలో ఆమె ఉన్నట్టుగా ఆదివారం గుర్తించారు. సోమవారం ఆమె తల్లిదండ్రులు నాగరాజు, విజయకుమారి, సైబరాబాద్‌ పోలీ సులు కలసి ముంబైకి వెళ్లారు. తన తల్లిదండ్రులను కలిసేందుకు, వారితో తిరిగి వచ్చేందుకు పూర్ణిమ నిరాకరించింది. దీంతో వారు అదే రోజున తిరిగి హైదరా బాద్‌కు వచ్చేశారు.


 - అమ్మానాన్నను చూడను.. వారి వద్దకు వెళ్లను
 - వారు బాగుండాలన్నదే నా కోరిక: పూర్ణిమ సాయి
 - తల్లిదండ్రులతో ఉంటే వారికి చెడు జరుగుతుందని ‘కల’వరపాటు
 - కూతురును కలవకుండానే హైదరాబాద్‌కు చేరుకున్న తల్లిదండ్రులు
 - నేడు పూర్ణిమను నగరానికి తీసుకురానున్న సైబరాబాద్‌ మహిళా పోలీసులు
  
 సాక్షి, హైదరాబాద్‌/ముంబై: ‘‘నా తల్లిదండ్రులు బాగుండాలి. వారికి ఏమైనా జరిగితే తట్టుకోలేను. ఏడాది పాటు నా వారికి దూరంగా ఉంటే ఇబ్బందులు తప్పుతాయని కలలో దేవుడు చెప్పిన మాటలు నా చెవుల్లో ఇంకా మారుమోగుతూనే ఉన్నాయి’’నగరంలో అదృశ్యమై ముంబైలో ఆచూకీ లభించిన పూర్ణిమ సాయి చెపుతున్న మాటలివీ. అమ్మానాన్నలను కలవడం కాదు కదా కనీసం చూసేందుకు కూడా ఆమె ఇష్టపడటంలేదు. దీంతో తల్లిదండ్రులు నాగరాజు, విజయకు మారి పూర్ణిమను కలవకుండానే ముంబై నుంచి సోమవారం రాత్రి నగరానికి చేరుకున్నారు.
 
 చైల్డ్‌ వెల్ఫేర్‌ కమిటీ సభ్యులు, మానసిక నిపుణులు పూర్ణిమకు ఎంత చెప్పినా తల్లిదండ్రులతో వచ్చేందుకు ఆమె ఇష్టపడలేదు. దీంతో పూర్ణిమను హైదరాబాద్‌ తీసుకొచ్చేందుకు సైబరాబాద్‌ మహిళా పోలీసు లు ముంబై చేరుకున్నారు. మంగళవారం సాయంత్రానికి ఆమెను హైదరాబాద్‌ తీసుకు రానున్నారు. జూన్‌ 7న నమోదైన మిస్సింగ్‌ కేసును కిడ్నాప్‌ కేసుగా మలచడంతో ఆ కేసు విషయంలో ఆమెను రంగారెడ్డి జిల్లాలోని జువెనైల్‌ కోర్టు ముందు హాజరుపరచను న్నారు. ఆ తర్వాత పూర్ణిమ ఇష్టపకారం తల్లిదండ్రుల వద్దకు వెళతానంటే పంపుతారు. లేదంటే చైల్డ్‌ వెల్ఫేర్‌ కమిటీకి అప్పగించి ఏదైనా హోంలో ఉంచే అవకాశం ఉంది.
  
 ‘కల’ కదిలించింది..
 జూన్‌ 7న అంటే మిస్సింగ్‌కు రెండు రోజుల ముందు వచ్చిన కల పూర్ణిమను ఆగమాగం చేసింది. 5వ తేదీ తెల్లవారుజామున కలలో సాయిబాబా వచ్చి ‘నువ్వు మీ తల్లిదండ్రులతో ఉంటే వారికి ప్రాణహాని ఉంది. చెడు జరుగుతుంది. నా దగ్గరకు వచ్చేయి. లేదంటే నీ కుటుంబానికి ఇబ్బందులు తప్పవు. ఎవరికీ తెలియని ప్రదేశానికి రా’అంటూ వచ్చిన కల ఆమెను ఉక్కిరిబిక్కిరి చేసింది. అదే రోజు పూర్ణిమ అమ్మకు కడుపునొప్పి రావడంతో దానిని చెడుకు తొలి సంకేతంగా భావించింది. మరుసటి రోజు చెల్లెలు తీవ్రమైన దగ్గుబారిన పడటంతో కుటుంబంలో ఇబ్బందులు మొదలయ్యాయని అనుకుంది. దీంతో జూన్‌ 7న ఉదయం ఇంట్లో రూ.వెయ్యి తీసుకుని స్కూల్‌కు వెళుతున్నానని చెప్పి సికింద్రాబాద్‌ రైల్వేస్టేషన్‌కు వచ్చి షిర్డీ వెళ్లే రైలు ఎక్కింది.
 
 జూన్‌ 8న షిర్డీ సాయి దర్శనం చేసుకుని తల్లిదండ్రులకు ఎటువంటి ఇబ్బందులు ఎదురుకావొద్దని ప్రార్థించి.. జూన్‌ 9న ముంబైలోని దాదర్‌ రైల్వేస్టేషన్‌ చేరుకుంది. అక్కడికి కిలోమీటర్‌ దూరంలో ఉన్న బోయివాడ పోలీసుల వద్దకు వెళ్లిన పూర్ణిమ.. తన అసలుపేరు, ఊరు, తల్లిదండ్రుల పేరు చెబితే వారిని పిలిపించి తనను పంపిస్తారన్న భయంతో తాను అనాథనని అబద్ధం చెప్పింది. తన పేరు అనికశ్రీ అని, తల్లిదండ్రులు లేరని సికింద్రాబాద్‌లోని తుకారాంగేట్‌లోని సాయిశ్రీ ఆశ్రమం నుంచి వచ్చానంటూ వివరించింది. పోలీసులు ఆమెను డొంగ్రీలోని బాలసుదర్‌ గృహ్‌కు తరలించారు. సికింద్రాబాద్‌ సమీపంలోని ఠాణాలకు అనికశ్రీ పేరుతో ఎవరైనా తప్పిపోయారన్న కేసు నమోదైందా అని తెలుసుకునే ప్రయత్నం చేశారు. ఆ పేరుతో అదృశ్యమైన కేసు నమోదు కాలేదని తెలియడంతో బోయివాడ పోలీసులు ఊరకుండిపోయారు.
  
 తల్లిదండ్రులను కలిసేందుకు ససేమిరా..
 ఇటీవల పూర్ణిమ తల్లిదండ్రులు నాగరాజు, విజయకుమారి బాలల హక్కుల సంఘం ప్రతినిధులతో కలసి తమ పాప ఆచూకీ ఉంటే చెప్పండి అంటూ మీడియాతో మొరపెట్టుకున్నారు. ఆ వార్త ఫొటోలతో పాటు ప్రచురితం కావడంతో తుకారాం గేట్‌ ఇన్‌స్పెక్టర్‌ ముంబై పోలీసుల నుంచి తనకు వాట్సాప్‌లో వచ్చిన ‘అనికశ్రీ ఫొటో’కు పత్రికలో వచ్చిన ఫొటోకు దగ్గర పోలికలు ఉండటంతో ఆ ఫొటోను బాచుపల్లి ఇన్‌స్పెక్టర్‌ బాలకృష్ణరెడ్డికి పంపారు. ఆదివారం వారు తల్లిదండ్రులను పిలిపించి ఫొటోను చూపగా.. అందులో ఉన్నది తమ అమ్మాయేనని ధ్రువీకరించారు. సోమవారం పోలీసులతో కలసి తల్లిదండ్రులు నాగరాజు, విజయకుమారి ముంబై వెళ్లగా.. వారిని కలిస్తే ఏమవుతుందోనన్న భయంతో పూర్ణిమ తల్లిదండ్రులను చూసేందుకు, కలిచేందుకు ససేమిరా అంది. మానసిక నిపుణులు కూడా ఆమె ఇష్ట్రపకారం మీరు కలవకండి అని చెప్పారని ముంబైకి వెళ్లిన బాచుపల్లి ఎస్సై శంకర్‌ ‘సాక్షి’కి తెలిపారు.
  
 ‘అనికశ్రీ’ పేరు వెనక కథ ఇదే..
 స్టార్‌ప్లస్‌ టీవీ చానల్‌లో ప్రసారమయ్యే ఇష్క్‌బాజ్‌ సీరియల్‌ను పూర్ణిమ చూసేది. ఆ సీరియల్స్‌లో అనికశ్రీ పాత్రను ప్రముఖ సీరియల్‌ నటి సురభి చందన పోషిస్తోంది. ఆ పాత్రకు మంత్రముగ్ధురాలైన పూర్ణిమ ఏకంగా ఆ నటితో ఇన్‌స్ట్రాగామ్‌లో చాట్‌ చేసిన సందర్భాలు ఉన్నాయి. పూర్ణిమ అని చెబితే పోలీసులకు దొరికిపోయే అవకాశం ఉండటంతో తనకు ఇష్టమైన అనికశ్రీ పేరు చెప్పినట్టు తెలుస్తోంది. పూర్ణిమకు నటనపై ఉన్న మక్కువతోనే ముంబైకి వచ్చి ఉంటుందని, చివరకు ఆ సీరియల్‌లో పాత్ర పేరు ‘అనిక శ్రీ’నే తన పేరుగా బోయివాడ పోలీసులకు చెప్పడం దీన్ని స్పష్టం చేస్తోందని పోలీసులు చెపుతున్నారు.
 


 సాక్షి, హైదరాబాద్‌: స్కూలుకని వెళ్లిన కూతురు నలభై రోజులైనా తిరిగి రాలేదు. కనిపించిన వారందరినీ కుమార్తె ఆచూకీ గురించి అడుగుతూ, పోలీసులను వేడుకొంటూ... ఎన్నో నిద్రలేని రాత్రులు గడిపారు. జూన్‌ 7న అదృశ్యమైన పదో తరగతి విద్యార్థిని పూర్ణిమాసాయి తల్లిదండ్రుల పరిస్థితి ఇది. ఆదివారం పూర్ణిమ పుట్టినరోజు కూడా కావడంతో పదే పదే గుర్తుచేసుకుంటూ కన్నీటి పర్యంతమయ్యారు. అదే సమయంలో ముంబైలోని బోయివాడ పోలీసుల నుంచి వారికో ఫోన్‌ కాల్‌... ‘మీ అమ్మాయి పూర్ణిమ మా వద్ద ఉంది’ అని. ఆ తీపి కబురుతో ఒక్కసారిగా వారి మోములు పట్టరాని ఆనందంతో వికసించాయి.
 
 బాలిక ఆచూకీ లభించిందిలా...
 కూకట్‌పల్లి నిజాంపేటకు చెందిన నాగరాజు, విజయకుమారిల కుమార్తె పూర్ణిమాసాయి నిజాంపేటలోని భాష్యం స్కూల్‌లో పదో తరగతి చదువుతోంది. గత నెల 7న ఇంట్లో రూ.వెయ్యి  తీసుకుని స్కూల్‌కు వెళుతున్నానని చెప్పి, సికింద్రాబా ద్‌ రైల్వే స్టేషన్‌కు వెళ్లింది. అక్కడ ముంబై ఎక్స్‌ప్రెస్‌లో ముంబైకి బయలుదేరింది. మరుసటి రోజు ముంబై లోని దాదర్‌ రైల్వే స్టేషన్‌లో దిగింది.
 
 ఎక్కడకు వెళ్లాలో తెలియక, చివరకు సమీపంలోని బోయివాడ పోలీసు స్టేషన్‌కు వచ్చింది. వారికి తన పేరు అనికశ్రీ అని, తల్లిదండ్రులు లేని అనాథనని, సికింద్రాబాద్‌లోని తుకారంగేట్‌ సాయిశ్రీ ఆశ్రమం నుంచి వచ్చానంటూ తెలిపింది. దీంతో బాలికను వారు బాలసుధార్‌ గృహ్‌కు తరలించారు. అప్పటికే సైబరాబాద్‌ పోలీసులు పంపిన ఫొటోలు బోయివాడ పోలీసుల వద్ద ఉన్నాయి. దీంతో వారు ఈ అమ్మాయిపై సందేహం వచ్చి, తుకారాం గేట్‌ పోలీసులకు తెలిపారు. వారు బాచుపల్లి పోలీసులకు సమాచారం ఇవ్వగా, పూర్ణిమ తల్లిదండ్రులను స్టేషన్‌కు పిలిపించి వాకబు చేశారు. బోయివాడ పోలీసులు పంపిన ఫొటో తమ కుమార్తెదేనని వారు గుర్తించారు.
 
 ముంబైకి ప్రత్యేక బృందం...
 పూర్ణిమను తెచ్చేందుకు పోలీసుల బృందం, ఆమె తల్లిదండ్రులు ముంబై బయలుదేరారు. సోమవా రం బాలిక నగరానికి వస్తుందని పోలీసులు తెలిపారు. అయితే సినీ రంగంలో రాణించాలనే ఆసక్తి ఉన్న పూర్ణిమ... ఓ ప్రముఖ చానల్‌లో ప్రసారమయ్యే ఓ సీరియల్‌కు చెందిన వారితో ఇన్‌స్ట్రాగామ్‌ ద్వారా రాత్రివేళల్లో సంభాషిస్తుండేది. ఇదే క్రమంలోనే ఆమె ఇంట్లో నుంచి వెళ్లి ఉంటుందని పోలీసులు అనుమానిస్తున్నారు.