టైటిల్‌: నీతోనే నేను నటీనటులు: వికాస్ వ‌శిష్ట‌, మోక్ష‌, కుషిత, అకెళ్ల త‌దిత‌రులు నిర్మాణ సంస్థ: శ్రీమామిడి ఎంట‌ర్‌టైన్‌మెంట్స్‌ నిర్మాత: ఎమ్‌. సుధాకర్‌ రెడ్డి దర్శకత్వం: అంజిరామ్‌ సంగీతం: కార్తీక్‌ బి. కడగండ్ల సినిమాటోగ్రఫీ: మురళీ మోహన్‌ విడుదల తేది: అక్టోబర్‌ 13, 2023 కథేంటంటే.. రామ్‌(వికాష్‌ వశిష్ట) ఓ ప్రభుత్వ ఉపాధ్యాయుడు. మెదక్‌ జిల్లా లక్ష్మాపూర్‌ ప్రభుత్వ పాఠశాలకు బదిలీపై వస్తాడు. అదే రోజు స్పోర్ట్స్ టీచర్‌గా ఆయేషా(కుషిత)కూడా అదే స్కూల్‌లో జాయిన్‌ అవుతుంది. వీరిద్దరి ఆలోచనలు ఒకటే. పేద పిల్లలను వృద్ధిలోకి తీసుకు రావాలని కష్టపడుతుంటారు. ఆ స్కూల్లో చదివే పిల్లలకు ఏ ఆపద వచ్చిన తోడుగా నిలుస్తుంటారు. రామ్‌ మంచి తనం చూసి ఆయేషా అతన్ని ఇష్టపడుతుంది. ఒక రోజు తన ప్రేమ విషయాన్ని రామ్‌తో చెప్పగా అతను నిరాకరిస్తాడు. తనకు అల్రేడీ సీత అనే అమ్మాయితో పెళ్లి అయిందని చెబుతాడు. అసలు సీత ఎవరు? రామ్‌, సీతల లవ్‌స్టోరీ ఏంటి? సీతకు ఏమైంది? సీతకు, ఆయేషాకు మధ్య ఉన్న సంబంధం ఏంటి? ప్రేమించిన రామ్‌ కోసం అయేషా తీసుకున్న సాహసోపేతమైన నిర్ణయం ఏంటి? మంచి టీచర్‌గా పేరున్న రామ్‌..తన వృత్తికి ఎందుకు రాజీనామా చేశాడు? చివరకు ఆయేషా ప్రేమ కథ ఎలా ముగిసింది? అనేది తెలియాలంటే ‘నీతోనే నేను’ సినిమా చూడాల్సిందే.  ఎలా ఉందంటే.. ఈ సినిమాలో ఓ సన్నివేశం ఇలా  ఉంటుంది. ప్రార్థన సమయంలో ఓ విద్యార్థిని కళ్లు తిరిగి పడిపోతుంది. ఆస్పత్రికి తీసుకెళ్తే.. వాటర్‌ సరిగా తాగకపోవడంతో కిడ్నీలో రాళ్లు వచ్చాయని చెబుతారు. వాటర్‌ ఎందుకు తాగడం లేదని ఆ విద్యార్థిని అడిగితే.. స్కూల్‌లో వాష్‌ రూమ్‌ సరిగా లేదని, అందులోకి వెళ్లడం ఇష్టంలేకనే నీళ్లు తాగడం లేదని చెబుతుంది. వెంటనే హీరో కలెక్టర్‌కి లెటర్‌ రాయడం.. ఆ సమస్య తీరిపోవడం జరుగుతుంది. ఈ ఒక్క సీన్‌ చాలు ‘నీతోనే నేను’ ఓ మంచి సందేశాత్మక చిత్రమని చెప్పడానికి. కమర్షియల్‌ పంథాలో కొన్ని థ్రిల్లింగ్‌ అంశాలను జోడిస్తూ..ఓ మంచి సందేశాత్మక చిత్రాన్ని తెరకెక్కించాడు దర్శకుడు అంజిరామ్‌. డైరెక్టర్‌ ఎంచుకున్న పాయింట్‌ బాగున్నప్పటికీ..దాని చుట్టు అల్లుకున్న సన్నివేశాలు మాత్రం రొటీన్‌గా ఉంటాయి. ప్రభుత్వం పాఠశాలలో ఉండే సమస్యలు..వాటిని హీరో పరిష్కరించిన తీరు..అన్ని గత సినిమాల్లో మాదిరే ఉంటాయి.  స్కూల్‌ టీచర్‌గా హీరో రావడం..అక్కడి సమస్యలు పరిష్కరించడం..అతని లవ్‌స్టోరీ..ఇలా రొటీన్‌గా ఫస్టాఫ్‌ సాగుతుంది. ఇంటర్వెల్‌ ట్విస్ట్‌ అదిరిపోవడంతో పాటు సెకండాఫ్‌పై ఆసక్తిని పెంచుతుంది. ఇక ద్వితియార్థంలో వచ్చే ట్విస్టులు సినిమాపై ఆసక్తి పెంచుతుంది. మధ్య మధ్యలో కొన్ని సన్నివేశాలు సాగదీతగా అనిపిస్తాయి. పాటలు కూడా కథకు అతికించినట్లుగా అనిపిస్తాయి. క్లైమాక్స్‌లో ఆయేషా పాత్ర ఇచ్చే ట్విస్ట్‌ థ్రిల్లింగ్‌గా ఉంటుంది. కమర్షియల్‌గా ఈ చిత్రం ఏ మేరకు ఆట్టుకుంటుందో తెలియదు కానీ..ఓ మంచి సందేశం మాత్రం ఇస్తుంది.  ఎవరెలా చేశారంటే.. ప్రభుత్వ ఉపాధ్యాయుడు రాము పాత్రలో వికాస్‌ వసిష్ట చక్కగా నటించాడు. ఓ బాధ్యత గల టీచర్‌గా, భార్య కోసం పరితపించే భర్తగా తనదైన నటనతో ఆకట్టుకున్నాడు. ఇక పీటీ టీచర్‌ ఆయేషాగా కుషిత తన పాత్ర పరిధిమేర నటించింది. హీరో భార్య సీతగా నటించిన మోక్ష.. భావోద్వేగాలను చక్కగా పండించింది. కన్నింగ్‌ టీచర్‌గా ఆకెళ్లతో పాటు మిగిలిన నటీనటులు తమ పాత్రల పరిధిమేర నటించారు. సాంకేతికంగా ఈ చిత్ర పర్వాలేదు. సినిమాటోగ్రఫీ బాగుంది. సంగీతం ఓకే. సుద్దాల అశోక్‌ తేజ, గోరేటి వెంకన్న రాసిన పాటలు బాగున్నప్పటికీ.. ‍కథలో ఇరికించినట్లు అనిపిస్తాయి. నిర్మాణ విలువలు సినిమా స్థాయికి తగ్గట్లుగా ఉన్నాయి. 

‘సినిమా బండి’ ఫేమ్ వికాష్ వ‌శిష్ట హీరోగా మోక్ష‌, కుషిత క‌ళ్ల‌పు  హీరోయిన్లుగా  నటించిన తాజా చిత్రం ‘నీతోనే నేను’. శ్రీమామిడి ఎంట‌ర్‌టైన్‌మెంట్స్ బ్యాన‌ర్‌పై అంజిరామ్ ద‌ర్శ‌క‌త్వంలో ఎమ్‌.సుధాక‌ర్ రెడ్డి నిర్మించిన ఈ   చిత్రం అక్టోబ‌ర్ 13న విడుదల కానుంది.ఈ నేపథ్యంలో తాజాగా చిత్ర యూనిట్‌ ఈ సినిమా ప్రీరిలీజ్‌ ఈవెంట్‌ని మెద‌క్‌లో ఘ‌నంగా నిర్వ‌హించారు. ఈ సందర్భంగా చిత్ర నిర్మాత ఎమ్‌.సుధాక‌ర్ రెడ్డి మాట్లాడుతూ..  ‘కేవ‌లం 33 రోజుల్లోనే ఈ  సినిమా షూటింగ్‌ను కంప్లీట్ చేశాం. సింగిల్ షెడ్యూల్‌లో ప్లానింగ్ ప్రకారం మూవీని పూర్తి చేశాం. టీచ‌ర్స్ మీద సినిమా చేస్తున్నారేంటి అని ఈ జ‌ర్నీలో న‌న్ను చాలా మంది అడిగారు. అంటే మంచి క‌మ‌ర్షియ‌ల్ సినిమా చేయ‌వ‌చ్చు క‌దా అనేది వాళ్ల అభిప్రాయం. కానీ నా ఉపాధ్యాయుల మీద‌, నా క‌థ మీద‌, నా టీమ్ మీద‌, నా మీద నాకు ఉన్న న‌మ్మ‌కంతో ముందుకు అడుగులు వేస్తూ వ‌చ్చాను. అక్టోబ‌ర్ 13న ఈ సినిమా రిలీజ్‌కి సిద్ధం చేశాను. నా టీమ్‌తో క‌లిసి సినిమాను చూశాం. సినిమా చాలా బావుంద‌ని నా టీమ్ స‌భ్యులు చెప్పారు. వంద శాతం సినిమా పెద్ద స‌క్సెస్ అవుతుంద‌ని సినిమా చూసిన వారు చెబుతున్నారు. అక్టోబర్‌ 13న ప్రేక్షకులకు కూడా నచ్చుతుందని అనుకుంటాను’.  ద‌ర్శ‌కుడు అంజిరామ్ మాట్లాడుతూ ‘‘మెదక్‌లో ‘నీతోనే నేను’ సినిమా ప్రీ రిలీజ్ ఈవెంట్‌ను నిర్వ‌హించ‌టం చాలా ఆనందంగా ఉంది. నాలుగు నెల‌ల పాటు ఎంటైర్ టీమ్ క‌ష్ట‌ప‌డింది. అందువ‌ల్లే సినిమాను అక్టోబ‌ర్ 13న రిలీజ్ చేయ‌టానికి సిద్ధ‌మ‌య్యాం. మా సినిమాటోగ్రాఫ‌ర్ ముర‌ళీ మోహ‌న్ రెడ్డిగారు, మా మ్యూజిక్ డైరెక్ట‌ర్ కార్తీక్‌గారు ఈ జ‌ర్నీలో అందించిన స‌పోర్ట్ గురించి ఎంత చెప్పినా త‌క్కువే. యాక్ట‌ర్స్‌ హీరో వికాస్ వశిష్ట‌, మోక్ష‌, కుషిత క‌ళ్ల‌పు, ఆకెళ్ల స‌హా  అంద‌రూ చ‌క్క‌గా న‌టించారు. ఇక నిర్మాత సుధాక‌ర్ రెడ్డిగారైతే మా వెనుకుండి ముందుకు న‌డిపించారు. ఇండ‌స్ట్రీలోకి కొత్త‌గా అడుగు పెట్టిన‌ప్ప‌టికీ ఆయ‌న డేడికేష‌న్, క‌మిట్‌మెంట్‌తో సినిమాను కంప్లీట్ చేశారు. ఆయ‌న అందించిన స‌పోర్ట్‌కి ధ‌న్య‌వాదాలు. కిర‌ణ్‌గారికి, తేజ‌గారికి, ఎడిట‌ర్ ప్ర‌తాప్ స‌హా టీమ్‌కి థాంక్స్‌. అక్టోబ‌ర్ 13న థియేట‌ర్స్‌లోకి వ‌స్తున్నాం’ అన్నారు. 

‘సినిమా బండి’ ఫేమ్ వికాష్ వ‌శిష్ట హీరోగా.. మోక్ష‌, కుషిత క‌ళ్ల‌పు  హీరోయిన్లుగా నటిస్తున్న తాజా చిత్రం ‘నీతోనే నేను’. అంజిరామ్‌ దర్శకత్వం వహిస్తున్న ఈ చిత్రాన్ని శ్రీమామిడి ఎంట‌ర్‌టైన్‌మెంట్స్ బ్యాన‌ర్‌పై ఎమ్‌.సుధాక‌ర్ రెడ్డి నిర్మిస్తున్నారు. ఉపాధ్యాయుల దినోత్సవం (టీచ‌ర్స్ డే) సందర్భంగా ఈ మూవీ నుంచి  ‘గురుః బ్ర‌హ్మ గురుః విష్ణు..’ లిరికల్ సాంగ్‌ను చిత్ర యూనిట్ విడుద‌ల చేసింది. గొప్ప స‌మాజం రూప క‌ల్ప‌న‌లో ఉపాధ్యాయుల పాత్ర ఎంతో కీల‌కం. అందుక‌నే వారిని బ్ర‌హ్మ‌, విష్ణు, మ‌హేశ్వ‌రుల‌తో పోలుస్తుంటారు. అలాంటి టీచ‌ర్స్‌కు అంకిత‌మిచ్చేలా ‘గురుః బ్ర‌హ్మ గురుః విష్ణు..’ పాట‌ను రూపొందించారు.ప్రముఖ రచయిత సుద్ధాల అశోక్‌ తేజ ఈ పాటకు లిరిక్స్‌ అందించగా, ప్ర‌ముఖ సింగ‌ర్ మనో అద్బుతంగా ఆలపించారు.  చిత్ర నిర్మాత ఎమ్.సుధాకర్ రెడ్డి మాట్లాడుతూ ‘‘మంచి సమాజం కావాలంటే మనకు గొప్ప ఉపాధ్యాయులు కావాలి. టీచ‌ర్స్ వ‌ల్లే అది సాధ్య‌మ‌వుతుంది. అలాంటి వారి గొప్ప‌తనాన్ని తెలియ‌జేసేలా మా సినిమాలో ‘గురుః బ్ర‌హ్మ గురుః విష్ణు..’ పాట ఉంది. మంచి టీమ్ స‌పోర్ట్‌తో సినిమాను శ‌ర‌వేగంగా పూర్తి చేస్తున్నాం. నేను ఒక ప్రభుత్వ ఉపాధ్యాయుడిగా పని చేశాను. రామ్ అనే పాత్ర కూడా గవర్నమెంట్ టీచర్. అందులోని లోపాలను సరిదిద్దేక్రమంలో జరిగే కథే ఈ సినిమా’అని అన్నారు. ‘టీచర్స్ డే సందర్బంగా మా సినిమా నుంచి ‘గురుః బ్ర‌హ్మ గురుః విష్ణు..’ పాటను విడుదల చేయటం ఆనందంగా ఉంది’అని డైరెక్టర్‌ అంజిరామ్‌ అన్నారు. 

‘సినిమా బండి’ఫేమ్ వికాష్ వ‌శిష్ట హీరోగా నటించిన తాజా చిత్రం ‘నీతోనే నేను’. మోక్ష‌, కుషిత క‌ళ్ల‌పు  హీరోయిన్లు. అంజిరామ్ ద‌ర్శ‌క‌త్వం వహిస్తున్న ఈ చిత్రాన్ని  శ్రీమామిడి ఎంట‌ర్‌టైన్‌మెంట్స్ బ్యాన‌ర్‌పై ఎమ్‌.సుధాక‌ర్ రెడ్డి నిర్మిస్తున్నారు. ఈ సినిమా టైటిల్ పోస్ట‌ర్‌ను హైద‌రాబాద్‌లోని ప్ర‌సాద్ ల్యాబ్స్‌లో ఆవిష్క‌రించారు. ఈ సందర్భంగా చిత్ర నిర్మాత సుధాకర్‌ మాట్లాడుతూ.. ‘సినిమా చాలా బాగా వచ్చింది. త్వరలోనే రిలీజ్ చేస్తాం. కార్తీక్ గారి సంగీతం అద్భుతంగా ఉంటుంది. మా సినిమాను తెలుగు ప్రేక్షకులు ఆదరిస్తారనే నమ్మకం ఉంది’ అని అన్నారు. ‘ఇంత మంచి సినిమాను ఇచ్చిన నిర్మాత సుధాకర్ రెడ్డి గారికి థాంక్స్. ఆయన ఇంకా ఎన్నో మంచి చిత్రాలు తీయాలని, మళ్లీ ఆయనతో కలిసి పని చేయాలని కోరుకుంటున్నాను’అని హీరో వికాస్‌ వశిష్ట అన్నారు. ‘అనుకున్న టైంలోనే సినిమాను కంప్లీట్ చేశాం. అందరూ ప్రాణం పెట్టి పని చేశారు. మా సినిమా ప్రతి ఒక్కరికి నచ్చుతుందని ఆశిస్తున్నాం’అని దర్శకుడు అంజి రామ్‌ అన్నాడు. ఈ కార్యక్రమంలో హీరోయిన్లు మోక్ష, కుషిత,  ప్రభాకర్ రెడ్డి, ఎగ్జిక్యూటివ్ ప్రొడ్యూసర్ నవీన్, సినిమాటోగ్రాఫర్ మురళీ మోహన్, మ్యూజిక్ డైరెక్ట‌ర్ కార్తీక్ బి.క‌డ‌గండ్ల‌, చంద్ర‌శేఖ‌ర్ రెడ్డి, అకెళ్ల త‌దిత‌రులు పాల్గొన్నారు.