jds chief kumaraswamy

సాక్షి,బెంగళూరు: కర్ణాటక రాజకీయాల్లో తీవ్ర కలకలం సృష్టిస్తున్న ‘స్టింగ్ ఆపరేషన్’ వివాదం కీలక మలుపు తిరిగింది. తాజాగా కేంద్ర మంత్రి, జేడీఎస్ అధినేత హెచ్‌డీ కుమారస్వామి రాష్ట్ర ప్రభుత్వంపై, ముఖ్యంగా సీఎం డీకే శివకుమార్‌పై సంచలన ఆరోపణలు చేశారు. మాజీ ప్రధాని హెచ్‌డీ దేవెగౌడ కుటుంబాన్ని రాజకీయంగా అంతం చేయడమే లక్ష్యంగా రూ. 600 కోట్ల కుట్రకు తెరలేపారని ఆయన ఆరోపించారు.హాసన్ జిల్లాలోని శ్రీ రంగనాథస్వామి ఆలయంలో ప్రత్యేక ప్రార్థనలు నిర్వహించిన అనంతరం కుమారస్వామి విలేకరులతో మాట్లాడారు. ‘‘మా కుటుంబాన్ని నాశనం చేయడానికి, రాజకీయ ఉనికిని దెబ్బతీయడానికి అనేక కుట్రలు పన్నారు. అందులో భాగంగానే రూ. 600 కోట్ల 'సుపారీ' ప్లాన్‌ చేశారు. మా కుటుంబాన్ని అంతం చేయాలని ఆదేశించింది మరెవరో కాదు, ప్రస్తుత కాంగ్రెస్ ప్రభుత్వంలోని ముఖ్య నేతలే. ఈ విషయంలో ఎలాంటి సందేహం లేదు. స్టింగ్ ఆపరేషన్ వెనుక ఉన్నదెవరు?ఈ వివాదాస్పద స్టింగ్ ఆపరేషన్‌ వెనుక జర్నలిస్ట్ రాకేష్ శెట్టి, కాంగ్రెస్ నాయకురాలు కృపా అల్వా, వారి అనుచరులు కలిసి నిర్వహించారు. 2023లో కాంగ్రెస్ కార్యకర్తల సహకారంతో రూపొందించిన ఈ స్టింగ్ ఆపరేషన్‌ను, అప్పట్లో ముఖ్యమంత్రి సిద్ధరామయ్యను పదవి నుంచి తొలగించేందుకు ఉపయోగించారు. ఇప్పుడు సిద్ధరామయ్యని ఒత్తిడికి గురి చేసి నాపై ఉసిగొలిపారు. ఈ కుట్రలో హోంమంత్రి ప్రియాంక ఖర్గే, మాజీ సీఎం సిద్ధరామయ్య ప్రమేయం కూడా ఉంది. ఈ పరిణామాల గురించి డీకే శివకుమార్‌తో పాటు మరికొందరు కాంగ్రెస్ నాయకులకు ముందే తెలుసు. డైవర్షన్‌ పాలిటిక్స్‌ రాష్ట్రంలో ప్రస్తుతం సంచలనం సృష్టిస్తున్న కర్ణాటక పబ్లిక్ సర్వీస్ కమిషన్ నియామక కుంభకోణం నుంచి ప్రజల దృష్టిని మళ్లించడానికే ప్రభుత్వం ఈ స్టింగ్ ఆపరేషన్ డ్రామాను తెరపైకి తెచ్చింది. విచారణపై అనుమానాలు స్టింగ్ ఆపరేషన్ విచారణలో 80 శాతం పూర్తయిందని హోం మంత్రి చెబుతున్నారు. అదే సమయంలో కేపీఎస్సీ కుంభకోణానికి సంబంధించిన విచారణను మాత్రం 90 శాతం వరకు కప్పిపుచ్చారు. ఆరోపణలు ఎదుర్కొంటున్న పలువురు స్టింగ్‌ ఆపరేషన్‌లో తమకు ఎలాంటి సంబంధం లేదని స్పష్టమైన ఆధారాలు చూపించారు. అయినప్పటికీ రాష్ట్ర ప్రభుత్వం కావాలనే ఈ కేసు విచారణను జేడీఎస్ వైపునకు మళ్లిస్తోందని’’ మండిపడ్డారు.పోలీసుల వేధింపులు ఈ సందర్భంగా స్టింగ్‌ ఆపరేషన్‌లో కేంద్ర మంత్రులకు, జేడీఎస్‌తో సన్నిహితంగా ఉండేవారు భయపడి పారిపోయారంటూ రాష్ట్ర హోం మంత్రి చేస్తున్న తప్పుడు ప్రచారాన్ని కుమారస్వామి తీవ్రంగా ఖండించారు. ‘‘ ఎవరు పారిపోయారు? పారిపోయేంత తప్పు వారేం చేశారు?" అని ప్రశ్నించారు. ఈ కుట్రలను ఎదుర్కొనే సత్తా మా పార్టీకి ఉంది. ఒకవేళ ప్రభుత్వం ఈ విషయాన్ని కప్పిపుచ్చే ప్రయత్నం కొనసాగిస్తే రాష్ట్ర వ్యాప్తంగా ఆందోళనలను మరింత ఉధృతం చేస్తాం’అని ఆయన హెచ్చరించారు.మొత్తానికి, కాంగ్రెస్ పార్టీ అంతర్గత రాజకీయాలు, సీఎం కుర్చీ పోరుతో ప్రారంభమైన ఈ 'స్టింగ్ ఆపరేషన్' వ్యవహారం ఇప్పుడు కాంగ్రెస్ వర్సెస్ జేడీఎస్ మధ్య తీవ్ర రాజకీయ రణరంగంగా మారింది. ఈ పరిణామాలు కర్ణాటక రాజకీయాల్లో ఎలాంటి పరిణామాలకు దారితీస్తాయనేది వేచి చూడాలి.ఇదీ చదవండి : సీఎం డీకే రూ.50 హెయిర్‌కట్‌ స్టోరీ.. బీజేపీ రూ.1,400 కోట్ల ట్విస్ట్‌!

సాక్షి, బెంగళూరు: కర్ణాటకలో ఇటీవల జరిగిన ఏడు ఎమ్మెల్సీ స్థానాల ఎన్నికలు రాష్ట్ర రాజకీయాల్లో కొత్త చర్చకు తెరలేపాయి. ముఖ్యంగా బీజేపీ–జేడీఎస్ కూటమిలో క్రాస్ ఓటింగ్ ఆరోపణలు రెండు పార్టీల మధ్య ఉన్న అంతర్గత విభేదాలను బయటపెట్టినట్లు రాజకీయ వర్గాలు విశ్లేషిస్తున్నాయి. దీంతో, కర్ణాటక రాజకీయం మరోసారి చర్చనీయాంశంగా మారింది.కాగా, 2023 సెప్టెంబర్‌లో అధికారికంగా ఎన్డీయేలో చేరిన జేడీఎస్, బీజేపీతో కలిసి కాంగ్రెస్‌ను ఎదుర్కోవడమే లక్ష్యంగా ముందుకు సాగుతోంది. ఈ క్రమంలో జేడీఎస్ అధినేత హెచ్‌డీ కుమారస్వామికి కేంద్రంలో మంత్రి పదవి కూడా లభించింది. అసెంబ్లీ, లోక్‌సభ ఎన్నికల్లో కలిసి పోటీ చేసిన రెండు పార్టీలు, ఇప్పుడు ఎమ్మెల్సీ ఎన్నికల ఫలితాల తర్వాత అనుమానాల మేఘాల్లో చిక్కుకున్నాయి. ఎమ్మెల్సీ ఎన్నికల్లో ఓట్ల బదిలీ ఆశించిన స్థాయిలో జరగలేదని, కూటమి ఎమ్మెల్యేలలో కొందరు క్రాస్ ఓటింగ్‌కు పాల్పడ్డారనే ప్రచారం జోరుగా సాగుతోంది.దీంతో బీజేపీ–జేడీఎస్ మధ్య ఉన్న సత్సంబంధాలపై ప్రశ్నలు తలెత్తుతున్నాయి. పైకి ఐక్యత కనిపిస్తున్నప్పటికీ, లోలోపల అసంతృప్తి ఉందనే చర్చ రాజకీయ వర్గాల్లో వినిపిస్తోంది. అయితే ఈ ప్రచారాన్ని కేంద్ర మంత్రి హెచ్‌డీ కుమారస్వామి కొట్టిపారేశారు. బెంగళూరులోని జేడీఎస్ కేంద్ర కార్యాలయంలో ఆయన మాట్లాడుతూ, బీజేపీతో తమ పొత్తులో ఎలాంటి సమస్య లేదన్నారు. త్వరలో ఢిల్లీ వెళ్లి బీజేపీ జాతీయ అధ్యక్షుడిని కలిసి ఎమ్మెల్సీ ఎన్నికల అంశంపై పూర్తి వివరాలు తెలియజేస్తానని చెప్పారు.ఈ సందర్భంగా ఎన్నికల్లో కోట్ల రూపాయల అక్రమ లావాదేవీలు జరిగాయని కుమారస్వామి ఆరోపించారు. ఈ విషయంపై దర్యాప్తు ఎవరు చేస్తారు? ఎవరికి ఫిర్యాదు చేయాలి? అని ముఖ్యమంత్రి డీకే శివకుమార్‌ను ప్రశ్నించారు. ఎమ్మెల్సీ ఎన్నికల తర్వాత వెలుగులోకి వచ్చిన క్రాస్ ఓటింగ్ వివాదం కూటమి భవిష్యత్తుపై ఎలాంటి ప్రభావం చూపుతుందన్నది ఇప్పుడు కర్ణాటక రాజకీయాల్లో హాట్ టాపిక్‌గా మారింది.

కర్ణాటక: జేడీఎస్‌ శాసనసభా పక్ష నేతగా మాజీ సీఎం హెచ్‌.డీ.కుమారస్వామి ఏకగ్రీవంగా ఎన్నికయ్యారు. బుధవారం తాత్కాలిక స్పీకర్‌ ఆర్‌.వీ.దేశపాండే ఆఫీసులో జేడీఎస్‌ ఎమ్మెల్యేలతో సమావేశం నిర్వహించారు. మాజీ మంత్రి హెచ్‌.డీ.రేవణ్ణ, పార్టీలోని 19 మంది కొత్త ఎమ్మెల్యేలు, అలాగే ఎమ్మెల్సీలు హాజరయ్యారు. ఈ సందర్భంగా జేడీఎస్‌ ఎల్పీ నేతగా కుమారస్వామిని ఎన్నుకున్నారు. అనంతరం కుమార మాట్లాడుతూ ఓడిపోయినంత మాత్రాన నిరాశ చెందాల్సిన అవసరం లేదు. ప్రజల కోసం పోరాటం కొనసాగిస్తామని అన్నారు.

న్యూఢిల్లీ/చెన్నై/కోల్‌కతా/బెంగళూరు: కేంద్ర హోంమంత్రి, బీజేపీ జాతీయ అధ్యక్షుడు అమిత్‌ షా ‘హిందీ’ తేనెతుట్టెను కదిపారు. భారతదేశం మొత్తానికి ఒకే జాతీయభాష ఉండాల్సిన అవసరముందన్నారు. ఈ లోటును హిందీ తీర్చగలదని అభిప్రాయపడ్డారు. భారత్‌ను ఏకం చేయగల సత్తా హిందీకే ఉందన్నారు. ఢిల్లీలో శనివారం ‘హిందీ దినోత్సవం’ సందర్భంగా జరిగిన ఓ కార్యక్రమంలో అమిత్‌ ఈ వ్యాఖ్యలు చేశారు. దీంతో హిందీ భాషను తమపై బలవంతంగా రుద్దేందుకు ప్రయత్నాలు జరుగుతున్నాయని తమిళనాడు, కర్ణాటక, బెంగాల్‌కు చెందిన రాజకీయ పార్టీలు, ప్రజాసంఘాలు భగ్గుమన్నాయి. హిందీని బలవంతంగా అమలుచేసేందుకు ప్రయత్నిస్తే దేశ సమగ్రతకే ప్రమాదమనీ, ఇండియా ముక్కలైపోతుందని హెచ్చరించాయి. అమిత్‌ షా వెంటనే తన వ్యాఖ్యల్ని వెనక్కి తీసుకోవాలని తమిళ రాజకీయ పార్టీలు డిమాండ్‌ చేశాయి. అధికార భాషల చట్టం–1963 ప్రకారం భారత పార్లమెంటు, ప్రభుత్వ వ్యవహారాల్లో హిందీ, ఇంగ్లిష్‌లను అధికార భాషలుగా గుర్తించారు. 1953 నుంచి ఏటా సెప్టెంబర్‌ 14న హిందీ దినోత్సవాన్ని జరుపుకుంటున్నారు.  దేశంలో 44 శాతం మంది మాతృభాష హిందీయే. గాంధీ, పటేల్‌ల స్వప్నం అదే.. ప్రజలంతా తమ ప్రాంతీయ భాషలను వీలైనంత ఎక్కువగా వాడాలని కేంద్ర హోంమంత్రి అమిత్‌ షా పిలుపునిచ్చారు. ‘భారత్‌ అనేక భాషలకు నెలవు. ప్రతీభాషకు తనదైన ప్రాధాన్యత ఉంటుంది. కానీ దేశం మొత్తంమీద ఒకే జాతీయభాష ఉండాల్సిన అవసరం చాలాఉంది. ఇది అంతర్జాతీయ వేదికలపై భారత్‌ను ప్రతిబింబిస్తుంది. ప్రస్తుతం దేశాన్ని ఏకం చేయగల సత్తా ఏ భాషకైనా ఉందంటే అది హిందీ మాత్రమే. ఎందుకంటే దేశంలో మెజారిటీ ప్రజలు హిందీ మాట్లాడుతారు. హిందీ భాష దేశాన్ని ఏకం చేయగలదు. దీనివల్ల విదేశీ భాషలు(ఇంగ్లిష్‌), సంస్కృతులు మనపై పెత్తనం చేయలేవు. కాబట్టి ప్రతిఒక్కరూ తమ ప్రాంతీయ భాషలను విరివిగా వాడండి. అదే సమయంలో హిందీని జాతీయభాషగా చేయాలన్న మహాత్మాగాంధీ, సర్దార్‌ పటేల్‌ల స్వప్నాన్ని సాకారం చేయండి’ అని అమిత్‌ షా చెప్పారు. గాంధీ, పటేల్‌లు కూడా హిందీని జాతీయభాషగా చేయాలని దేశప్రజల్ని కోరారని షా గుర్తుచేశారు. భారత్‌లో 122 భాషలు, 19,500కుపైగా మాండలికాలు ఉన్నాయని షా గుర్తుచేశారు. కాగా, హిందీ దినోత్సవం సందర్భంగా ప్రధాని మోదీ దేశ ప్రజలకు శుభాకాంక్షలు చెప్పారు. తాను హిందీని మాతృభాష స్థాయిలో ప్రేమిస్తానని  హోంశాఖ సహాయ మంత్రి కిషన్‌రెడ్డి తెలిపారు. తమిళనాడులో.. ఒకవేళ కేంద్రం మాపై హిందీని ఏకపక్షంగా రుద్దితే పరిణామాలు చాలా తీవ్రంగా ఉంటాయని తమిళనాడు సాంస్కృతిక శాఖ మంత్రి, అన్నాడీఎంకే నేత కె.పాండియరాజన్‌ హెచ్చరించారు. అమిత్‌ షా వ్యాఖ్యలు దేశ సమగ్రతకు భగం కలిగిస్తాయని డీఎంకే అధినేత స్టాలిన్‌ ఆందోళన వ్యక్తంచేశారు. అమిత్‌ షా వ్యాఖ్యలను సీపీఐ, పీఎంకే, ఏఎంఎంకేతో పాటు పలు ద్రవిడ పార్టీలు వ్యతిరేకించాయి. పశ్చిమ బెంగాల్‌లో.. ప్రజలు అన్ని సంస్కృతులను గౌరవించాల్సిందేనని టీఎంసీ అధినేత్రి, పశ్చిమబెంగాల్‌ ముఖ్యమంత్రి మమతా బెనర్జీ తెలిపారు. అయితే అందుకోసం మాతృభాషను పణంగా పెట్టాల్సిన అవసరంలేదని అభిప్రాయపడ్డారు. మరోవైపు, హిందీ, హిందూ, హిందూత్వ కంటే భారత్‌ చాలా పెద్దదని ఏఐఎంఐఎం అధినేత అసదుద్దీన్‌ ఒవైసీ తెలిపారు. భారతీయులందరి మాతృభాష హిందీ కాదని స్పష్టం చేశారు. కర్ణాటకలో.. ‘మేం హిందీని వ్యతిరేకించట్లేదు. బలవంతంగా రుద్దడాన్నే తప్పుపడుతున్నాం’ అని కర్ణాటక కాంగ్రెస్‌ నేత సిద్దరామయ్య ట్వీట్‌చేశారు. జేడీఎస్‌ నేత కుమారస్వామి మాట్లాడుతూ..‘కేంద్రం హిందీ దినోత్సవాన్ని జరుపుతోంది. మిస్టర్‌ మోదీ.. మీరు కన్నడ దినోత్సవం ఎప్పుడు జరపబోతున్నారు? హిందీలాగే కన్నడ కూడా అధికార భాషే’ అని వ్యాఖ్యానించారు. అక్టోబర్‌ 1 నుంచి ఉద్యమిస్తామని కన్నడ సంఘాలు కేంద్రాన్ని హెచ్చరించాయి.

సాక్షి, బెంగళూరు: ఎన్నికలకు కేవలం ఒక్క రోజు మాత్రమే సమయం మిగిలి ఉండడంతో ఓటర్లను ఆకట్టుకునేందుకు జేడీఎస్‌ రాష్ట్ర అధ్యక్షుడు కుమారస్వామి సెంటిమెంట్‌ అస్త్రం ప్రయోగించారు. గురువారం ఆయన బెంగళూరు నగరంలోని ఆర్‌.ఆర్‌.నగర్‌ నియోజకవర్గంలో ఎన్నికల ప్రచార కార్యక్రమాల్లో మాట్లాడారు. ‘నన్ను గెలిపిస్తే మిమ్మల్ని కాపాడతా, లేదంటే నేను ఎక్కువ రోజులు బతకను..జేడీఎస్‌ పార్టీ, మా భవిష్యత్‌ మీ తీర్పుపైనే ఆధారపడి ఉంది. జేడీఎస్‌కు అధికారమిస్తే కుటుంబ సభ్యుడిలా సేవలు చేస్తా.. కుమార స్వామి మరికొంత కాలం బతకాలని కోరుకుంటే జేడీఎస్‌కు అధికారం అప్పగించండి..’అంటూ ఉద్వేగంతో ప్రసంగించారు.

సాక్షి, బెంగళూరు : అసెంబ్లీ ఎన్నికలు దగ్గర పడుతున్న కొద్దీ కర్ణాటకలో రాజకీయ సమీకరణాలు శరవేగంగా మారిపోతున్నాయి. ఓ వైపు ఎన్నికల ప్రచారాన్ని హోరెత్తిస్తూనే మరోవైపు కీలక నేతలతో పాటు, సినిమా నటులను తమ పార్టీలో చేర్చుకునేందుకు ప్రధాన పార్టీలు పావులు కదుపుతున్నాయి. తాజాగా  కన్నడ సూపర్‌ స్టార్‌ సుదీప్‌ కూడా రాజకీయ అరంగేట్రం చేయబోతున్నాడని వార్తలు వినిపిస్తున్నాయి. సోమవారం ఆయన జేడీఎస్‌ రాష్ట్ర అధ్యకుడు హెచ్‌.డి ​​కుమార స్వామితో సమావేశమయ్యారు. దీంతో సుదీప్‌ రాజకీయాల్లోకి వస్తున్నారనే వార్త తెరపైకి వచ్చింది.  అయితే ఈ విషయాన్ని సుదీప్‌ ఖండించారు. కుమారస్వామిని తాను  మర్యాదపూర్వకంగానే కలిశానని పేర్కొన్నారు. కాగా రాజకీయ విషయాల పైనే రెండు గంటలపాటు సుదీప్‌తో చర్చించామని జేడిఎస్‌ సీనియర్‌ నాయకుడు ఒకరు తెలిపారు. గతంలో జేడీఎస్‌ అధి నేత దేవగౌడ సుదీప్‌ని పార్టీలోకి ఆహ్వానించిన విషయం తెలిసిందే.   మరో వైపు బీజేపీకి చెందిన మాజీ మంత్రి హరతాళ్‌ హాలప్ప కాంగ్రెస్‌లో చేరతారనే ప్రచారం జరుగుతోంది. నాలుగు సార్లు ఎమ్మెల్యేగా గెలిచిన మరో బీజేపీ మాజీ మంత్రి కూడా హస్తం అందుకునేందుకు సిద్ధంగా ఉన్నట్లు తెలుస్తోంది. రెండు రోజుల క్రితం మాజీ బీజేపీ మంత్రి బీఎస్‌ అనంద్‌ సింగ్‌ కాంగ్రెస్‌లో చేరిన విషయం తెలిసిందే. ఇలా అన్ని పార్టీల నుంచి వలసలు, కొత్త వాళ్లు రాజకీయాల్లోకి రావడంతో కర్ణాటక అసెంబ్లీ ఎన్నికలు దేశ వ్యాప్తంగా ఆసక్తి రేకెతిస్తున్నాయి.


 కర్ణాటకలో కేన్సర్‌తో బాధపడుతున్న ఓ తల్లి.. తన కొడుకును ఓ చిత్రమైన కోరిక కోరింది. అతడు కూడా దాన్ని తీర్చడానికి కాస్త కష్టపడినా.. చివరకు తీర్చాడు. బళ్లారి జిల్లా కూడ్లిగి తాలూకా మాకనడకు గ్రామ నివాసి లలితమ్మ కేన్సర్ బాధితురాలు. ఆ తల్లి వెల్లడించిన తన చివరి కోరికను ఆమె కుమారుడు కిరణ్‌కుమార్ నెరవేర్చాడు. జేడీఎస్ పార్టీలో కొనసాగుతున్న కిరణ్‌కుమార్ తల్లి లలితమ్మకు తాను చనిపోయేలోగా జేడీఎస్ పార్టీ రాష్ట్ర అధ్యక్షుడు హెచ్‌డీ.కుమారస్వామిని ఒకసారైనా చూడాలన్న కోరిక కలిగింది.
 
 ఆ కోరిక గురించి కిరణ్‌కుమార్ తమ పార్టీ అధ్యక్షునికి ఫోన్‌లో వివరించగా, చెళ్లకెరె పర్యటనకు వచ్చిన ఆయన అందుకు సమ్మతించి, వెంటనే తల్లితో కలిసి చెళ్లకెరె బయలుదేరి రావాలని సూచించారు. దీంతో ఆయన చెళ్లకెరెలో జరిగిన జేడీఎస్ పార్టీ కార్యకర్తల సమావేశంలో పాల్గొన్న తర్వాత అక్కడకు వచ్చిన లలితమ్మను పరామర్శించి యోగక్షేమాలను అడిగి తెలుసుకున్నారు. కుమారస్వామితో మాట్లాడినందుకు తనకు ఎంతో సంతోషం కలిగిందని లలితమ్మ ఆనందం వ్యక్తం చేసింది.