ప్రయోజనం..
 ఆదిలాబాద్: మీ వివాహం చట్టబద్ధమైందని నిరూపించడానికి వివాహ ధ్రువీకరణ పత్రం తప్పనిసరి. న్యాయపరంగా ఇబ్బందులు వచ్చినప్పుడు ఈ సర్టిఫికెట్ ఒక సాక్ష్యంగా పనిచేస్తుంది. హిందూ వివాహ చట్టం కింద వివాహ నమోదు జరుగుతుంది. వీసా, పాస్‌పోర్ట్, ఇంటి పేరు మార్పు వంటి ప్రయోజనాలను పొందేందుకు కూడా ఇది ఉపయోగపడుతుంది.  
                                               -
 హిందూ వివాహ రిజిస్ట్రేషన్..
 * దంపతులిద్దరీ పుట్టిన తేదీ తెలిపే సర్టిఫికెట్ (జనన ధ్రువీకరణ పత్రం, పదో తరగతి మార్కుల జాబితా) అవసరం. ఇవేవీ అందుబాటులో లేకుంటే స్థానిక తహసీల్దార్ జారీ చేసిన ధ్రువీకరణ పత్రం ఉంటే సరిపోతుంది. అయితే స్వస్థలం నుంచే మాత్రమే ఈ ధ్రువీకరణ పత్రాన్ని పొందాలి.
  
 ఉదా: భార్యాభర్తలలో ఒకరిది ఆదిలాబాద్, మరొకరిది జైనథ్‌మండల పరిధిలో ఉంటే వారు ఎవరి మండలంలో వారు బర్త్ సర్టిఫికెట్ పొందాలి.
 * ఇద్దరి అడ్రస్ ప్రూఫ్ (ఆధార్, కరెంటు బిల్లు, రేషన్ కార్డు, బ్యాంక్ పాస్‌బుక్ వీటిల్లో ఏదైనా ఒక్కటి)ను సమర్పించాలి. దంపతులిద్దరిలో ఒకరు సబ్ రిజిస్ట్రార్ కార్యాలయ పరిధిలో నివాసితులై ఉండాలి.
 * ముగ్గురు సాక్షులుగా సబ్‌రిజిస్ట్రార్ ముందు హాజరై సంతకాలు చేయాల్సి ఉంటుంది. సాక్షిగా వచ్చిన ముగ్గురి ఐడీ ప్రూఫ్ తప్పనిసరి.
 * పెళ్లిపత్రిక, వివాహ ఫొటోలలో తాళికట్టే ఫొటో కాని, జీలకర్ర బెల్లం పెడుతున్న ఫొటో కాని ఇవ్వాలి. ఈ ఫొటోలలో ఇరువురి ముఖాలు స్పష్టంగా కనపడాలి.
 * వివాహ నమోదుకు నిర్ణయించిన నిర్ణీత రుసుంను చెల్లించి, దరఖాస్తుతో పాటు పైన పేర్కొన్న ధ్రువపత్రాల నకలు, పెళ్లి ఫొటోలను సబ్ రిజిస్ట్రార్ కార్యాలయంలో అందజేయాలి. దరఖాస్తు ఫారాన్ని ఆన్‌లైన్‌లో, కార్యాలయంలో ఉచితంగా పొందవచ్చు.
 * అన్ని ధ్రువపత్రాల ఒరిజినల్స్‌ను సంబంధిత అధికారి పరిశీలించాక, సబ్ రిజిస్ట్రార్ ముందు సంతకాలు చేస్తే సరిపోతుంది.
   తర్వాత పని దినం రోజున మ్యారేజ్ సర్టిఫికెట్ పొందవచ్చు.
  
 ఇతర వివాహ నమోదు..  
 * ప్రేమ వివాహాలకు తప్ప మిగిలిన వాటికి పైన పేర్కొన్న విధి విధానాలు పాటించాలి. కాని ప్రేమ వివాహాలకు మాత్రం వివాహ నమోదు వేరుగా ఉంటుంది.
 * ప్రేమ వివాహాన్ని నమోదు చేసుకోవాలంటే సంబంధిత కార్యాలయంలో మూడు దరఖాస్తులను సమర్పించాలి. ఒక దరఖాస్తు అధికారుల వద్ద, మరో దరఖాస్తు అదే కార్యాలయ నోటీసు బోర్డులో ఉంచుతారు. మూడో దరఖాస్తును రెండో వ్యక్తి సొంత ఊరికి సంబంధించిన రిజిస్ట్రార్ కార్యాలయానికి పంపుతారు.
 * నెల రోజుల గడువు అనంతరం ఎలాంటి అభ్యంతరాలు రాకపోతే సాక్షి సంతకాలు, ధ్రువీకరణ పత్రాలు, ఫొటోలు పరిశీలించి వివాహాన్ని రిజిస్ట్రర్ చేస్తారు.
 * ఒక వేళ ప్రేమికులు ఆర్యసమాజ్‌లో పెళ్లి చేసుకుంటే ఆర్యసమాజ్ జారీ చేసిన సర్టిఫికెట్‌తో 24 గంటలలోపు ఆర్యసమాజ్ ప్రాంతంలో ఉన్న సబ్ రిజిస్ట్రార్ కార్యాలయంలో సంప్రదిస్తే వివాహ నమోదు చేస్తారు.
  
 ఎవరు దరఖాస్తు చేసుకోవచ్చు
 * వివాహ నమోదు కోసం అమ్మాయి వయసు 18 ఉండాలి.  అబ్బాయి వయసు 21 సంవత్సరాలుగా నిర్ణయించారు.  
  
 * పెళ్లి అయిన మూడు నెలలలోపు వివాహ నమోదు చేసుకుంటే రిజిస్ట్రేషన్ ఫీజుగా రూ.210 చెల్లించాలి. అలా చేసుకోకుంటే ప్రతి ఏడాదికి నిర్ణీత రుసుంతోపాటు అదనంగా రూ.5 వసూలు చేస్తారు.