ముంబై: ప్రభుత్వ ఆర్థిక లావాదేవీలు నిర్వహించే బ్యాంకుల బ్రాంచీలు అన్నీ ఈ నెల 30, 31 తేదీల్లో పూర్తిస్థాయిలో కార్యకలాపాలు నిర్వహిస్తాయి. ఈ మేరకు రిజర్వ్ బ్యాంక్ ఆఫ్ ఇండియా (ఆర్‌బీఐ) అన్ని బ్యాంకులకూ ఆదేశాలు జారీ చేసింది. దీని ప్రకారం మార్చి 30న బ్యాంకులు పూర్తి రోజు పనిచేస్తాయి. 31వ తేదీన రాత్రి 8 గంటల వరకూ ప్రభుత్వ ఆర్థిక లావాదేవీల నిర్వహణకు కౌంటర్లు తెరిచి ఉంటాయి.
 
 ఆర్థిక సంవత్సరం పూర్తి అయిన రోజే, ఆ ఏడాదికి సంబంధించిన ప్రభుత్వ ఆర్థిక లావాదేవీలన్నీ పూర్తికావడానికి వీలుగా తాజా నిర్ణయం తీసుకున్నట్లు ఆర్‌బీఐ నోటిఫికేషన్ పేర్కొంది. మార్చి 31వ తేదీ అర్ధరాత్రి వరకూ ఎలక్ట్రానిక్ లావాదేవీలు కొనసాగుతాయని తెలిపింది. ఈ సౌలభ్యం విషయాన్ని ప్రజలందరికీ తెలియజేయడానికి తగిన చర్యలు తీసుకోవాలని సైతం బ్యాంకులకు ఆర్‌బీఐ సూచించింది.