‘‘మేడంటే మేడా కాదు... గూడంటే గూడు కాదు.. పదిలంగా అల్లుకున్న పొదరిల్లు మాది..’’ అని అరవై ఆరేళ్ల వేన్‌ ఆడమ్స్, యాభై తొమ్మిదేళ్ల కేథరీన్‌ కింగ్‌ దంపతులు పాడుకుంటున్నారు. కెనడాలోని వాంకోవర్‌ ద్వీపం వద్ద రణ గొణధ్వనులకు దూరంగా.. ప్రకృతికి దగ్గరగా ఈ దంపతులు కట్టుకున్న ఇల్లే మీకు ఫొటోల్లో కనిపిస్తున్నది. ఆశ్చర్యంగా ఉందా? ‘వావ్‌ ...’ అనే అంశాలు ఇంకా అనేకమున్నాయి ఇందులో. వాటిలోకి వెళ్లేముందు ఆడమ్స్, కేథరీన్‌ల గురించి కొంచెం తెలుసుకోవాలి. ఇద్దరూ మంచి కళాకారులు. ఆడమ్స్‌ కార్వర్‌ (వడ్రంగి), కేథరీన్‌ బ్యాలే నర్తకి. 1992 నుంచి వీళ్లు ఈ ఇంట్లోనే ఉంటున్నారుగానీ... అప్పటికీ ఇప్పటికీ అస్సలు పోలికే లేదు.
 
 అప్పట్లో సరస్సుపై తేలియాడుతున్న చిన్న ఇల్లు ఉంటే.. ఇప్పుడది 12 ప్లాట్‌ఫార్మ్‌తో ఏ చిన్న విషయానికీ ఇతరులపై ఆధారపడని రీతిలో అభివృద్ధి చెందింది. క్రెడిట్‌ మొత్తం ఆ జంటదే సుమీ! ఏమేమున్నాయి వీళ్లింట్లో అనుకుంటున్నారా? ఓ లైట్‌ హౌస్, డ్యాన్స్‌ ఫ్లోర్, ఆర్ట్‌ గ్యాలరీ, గ్రీన్‌హౌస్‌. అంతేకాదు.. కరెంటు కోసం 14 సోలార్‌ ప్యానెళ్లు కూడా ఉన్నాయి. ఆకలైనప్పుడు సరస్సులో చేపలు పట్టుకోవడం.. పక్కనే ఉన్న అర ఎకరం తేలియాడే పొలంలో పండే కాయగూరలు, ఆకు కూరలతో వండుకోవడం. అంతే!  కోళ్లు కూడా పెంచుకునేవారుగానీ... ఆ మధ్య జంతువుల బెడద ఎక్కువైందని మానేశారు. వేసవిలో సరస్సు పక్కనే ఉన్న జలపాతం నుంచి, చలికాలంలో కురిసే మంచు నుంచి నీళ్లు సేకరించి వాడుకుంటారట! తమ ఇంటిని ప్రత్యక్షంగా చూడాలనుకునే వారిని ప్రతి ఏడాది వేసవి సమయంలో అతిథులుగా ఆహ్వానిస్తారు కూడా!  ఇంతకీ వీళ్ల ఇంటిపేరు ఏమిటో చెప్పలేదు కదూ.. ‘ఫ్రీడమ్‌ కోవ్‌’! బాగుంది కదూ! నిజంగానే ఇది స్వేచ్ఛా గుడారం!
  – సాక్షి నాలెడ్జ్‌ సెంటర్‌


 విహంగం
 పట్టణ జీవితం ఎలా ఉంటుంది? ‘ఒకరితో ఒకరికి ముఖ పరిచయములు దొరకని క్షణముల... బిజీ బిజీ బ్రతుకుల.. గజిబిజి ఉరుకుల పరుగులతో...’లాగే ఉంటుంది. అందుకే ఆ జీవితం అంటే మొహం మొత్తింది ఆడమ్స్, క్యాథరీన్ దంపతులకి. ఇద్దరూ కళాకారులు. వారు తయారుచేసే కళాకృతులకు కెనడాలో మంచి మార్కెట్ ఉంది. కానీ రణగొణ ద్వనులు, ఉరుకులు పరుగులు వారి కళాహృదయానికి సరిపడలేదు. వాటికి దూరంగా, ఎక్కడైనా ప్రశాంతమైన ప్రదేశానికి పారిపోవాలని అనుకున్నారు. వెంటనే కెనడాలోని వాంకోవర్ ఐల్యాండ్ గుర్తొచ్చింది. అక్కడికి వెళ్లి నదీ జలాల మధ్య ఓ అందమైన ఇల్లు కట్టుకోవడం మొదలు పెట్టారు.
  
 ‘నేలంతా వదిలేసి నీటిలో ఇల్లు కట్టుకుంటున్నారేంటి’ అంటూ చాలా మంది ఆ దంపతుల్ని చూసి నవ్వారు. కానీ ఆ నవ్వినవాళ్లే అవాక్కయ్యేలా ఓ అందమైన ప్రపంచాన్ని సృష్టించారు క్యాథరీన్, ఆడమ్స్. పన్నెండు ఇంటర్ కనెక్ట్ ప్లాట్‌ఫామ్‌లను ఏర్పాటుచేసి వాటిపై లివింగ్ హౌజ్, గ్రీన్‌హౌజ్, లైబ్రరీ, లైట్‌హౌజ్, డ్యాన్స్ స్టూడియో మొదలైనవి నిర్మించారు. కూరగాయలు, పండ్లు, పూల తోటలను నాటారు.
 
 కోళ్లఫామ్‌తో పాటు మరికొన్ని జంతువులతో చిన్నపాటి జూను ఏర్పాటు చేశారు. గులాబి, ఆకుపచ్చ కలర్ థీమ్‌తో అత్యంత సుందరంగా నిర్మించిన ఈ నిర్మాణానికి ‘ఫ్రీడమ్ కోవ్’ అని పేరు పెట్టారు. అంటే ‘స్వేచ్ఛా నివాసం’ అని అర్థం.
  
 ఫ్రీడమ్ కోవ్ నీటిపై తేలుతుంది. కానీ నీటితో పాటు సాగిపోదు. అలా ఉండేలా బల మైన బేస్‌తో పక్కాగా నిర్మించారు దాన్ని. అన్నిటికంటే ముఖ్యంగా చెప్పుకోవాల్సింది ఏంటంటే... ఇక్కడ అంతా ఎకో ఫ్రెండ్లీ. పర్యావరణానికి హాని చేసే ఏ వస్తువునూ వాడరు ఆడమ్స్ దంపతులు. ‘ఫ్రీడం కోవ్’కు సోలార్ ప్యానల్స్ ద్వారా విద్యుత్ అందుతుంది. చలికాలంలో వర్షపు నీటిని భద్రపరచి తాగు నీటిగా వాడుకుంటారు. పట్టణ జీవితంలో ఉండే కాలుష్యాన్ని ఎట్టి పరిస్థితుల్లోనూ దగ్గరకు రానివ్వరు. ఫ్రీడమ్ కోవ్‌కు మీడియా ద్వారా బోలెడు  ప్రచారం లభించడంతో ఎక్కడెక్కడి నుంచో పర్యాటకులు రావడం మొదలైంది.  కెనడాలోని ప్రముఖ టూరిస్ట్ స్పాట్స్‌లో ఒకటిగా నిలిచింది.