న్యూఢిల్లీ: రిజర్వ్‌ బ్యాంక్‌(ఆర్‌బీఐ) తాజా 35 బేసిస్‌ పాయింట్ల రెపో కోత (బ్యాంకులకు తానిచ్చే రుణాలపై ఆర్‌బీఐ వసూలు చేసే వడ్డీరేటు– ప్రస్తుతం 5.40) నేపథ్యంలో తమ రుణాలపై వడ్డీరేటు తగ్గిస్తున్న బ్యాంకుల వరుసలో తాజాగా ఆంధ్రాబ్యాంక్, కెనరా బ్యాంక్‌లు చేరాయి. పావుశాతం వరకూ ఆంధ్రా బ్యాంక్‌:  ఓవర్‌నైట్, నెల, మూడు నెలలు, ఆరు నెలలు, ఏడాది రేట్లను ఆంధ్రాబ్యాంక్‌ 25 బేసిస్‌ పాయింట్ల వరకూ తగ్గించింది. దీనితో బెంచ్‌మార్క్‌ ఎంసీఎల్‌ఆర్‌ 8.20 శాతం నుంచి 7.95 శాతానికి దిగింది. కెనరా బ్యాంక్‌ 10 బేసిస్‌ పాయింట్లు కట్‌: అన్ని కాలపరిమితుల రుణ రేటు 10 బేసిస్‌ పాయింట్ల వరకూ తగ్గింది. ఆగస్టు 7వ తేదీ నుంచీ తగ్గిన రుణ రేటు (ఎంసీఎల్‌ఆర్‌– నిధుల సమీకరణ వ్యయ ఆధారిత–ఎంసీఎల్‌ఆర్‌) అమల్లోకి వస్తుందని తెలిపింది. గడచిన ఆరు నెలల కాలంలో బ్యాంక్‌ ఎంసీఎల్‌ఆర్‌ 20 బేసిస్‌ పాయింట్లు తగ్గింది.  ఈ కాల వ్యవధిలో ఏడాది ఎంసీఎల్‌ఆర్‌ 8.70 నుంచి 8.50 శాతానికి తగ్గింది. 


 ముంబై: కొత్త నెల ఆరంభం అయిన నేపథ్యంలో– తమ నిధుల లభ్యత వ్యయం ప్రాతిపదికన పలు బ్యాంకులు మార్జినల్‌ కాస్ట్‌ లెండింగ్‌ రేటు (ఎంసీఎల్‌ఆర్‌) తగ్గిస్తున్నాయి. యూనియన్‌ బ్యాంక్, దేనాబ్యాంక్‌ ఎంసీఎల్‌ఆర్‌ను తగ్గించాయి. వేర్వేరుగా చూస్తే...
 
 యూనియన్‌ బ్యాంక్‌: యూనియన్‌ బ్యాంక్‌ అన్ని కాలపరిమితులపై ఎంసీఎల్‌ఆర్‌ను 20 బేసిస్‌ పాయింట్లు తగ్గించింది. గురువారం నుంచే తాజా రేట్లు అమల్లోకి వస్తాయని ప్రకటించింది. ఏడాది కాలానికి ఎంసీఎల్‌ఆర్‌ 8.40 నుంచి 8.20%కి చేరింది. ఆరు నెలల రేటు 8.05%కి తగ్గింది. రెండు, మూడేళ్ల కాలపరిమితి విషయంలో ఈ రేటు వరుసగా 8.25 %, 8.30%కి చేరింది.  
 
 దేనాబ్యాంక్‌: ఏడాది, ఆరు నెలలు, మూడు నెలలు, నెల కాలానికి ఎంసీఎల్‌ఆర్‌ 15 బేసిస్‌ పాయింట్లు తగ్గింది. ఏడాది కాలానికి రేటు 8.55% నుంచి 8.40%కి చేరింది. ఓవర్‌నైట్, నెల కాలపరిమితులకు రేటు 8.20%కి తగ్గించింది. మూడు నెలల కాలానికి రేటు 8.30%గా ఉంది.  
 
 ఇండియన్‌ బ్యాంక్‌ నాన్‌–రెసిడెంట్‌ డిపాజిట్‌ రేటు కోత...
 ఫారిన్‌ కరెన్సీ నాన్‌–రెసిడెంట్‌ బ్యాంకింగ్‌ డిపాజిట్లపై రేటును తక్షణం అమల్లోకి వచ్చేట్లు ఇండియన్‌ బ్యాంక్‌ తగ్గించింది. ఎఫ్‌సీఎన్‌ఆర్‌ (బీ) డిపాజిట్లకు సంబంధించి ఏడాది నుంచి రెండేళ్ల కాలానికి వడ్డీరేటును డాలర్‌ టర్మ్స్‌లో  2.44%గా నిర్ణయించింది. ఏడాది–మూడేళ్ల మధ్య రేటును 2.60% నుంచి 2.56%కి తగ్గించింది. మూడేళ్లు–నాలుగేళ్ల మధ్య రేటు 2.75% నుంచి 2.67%కి తగ్గింది. నాలుగు–ఐదేళ్ల మధ్య రేటు 2.86% నుంచి 2.75%కి చేరింది. ఐదేళ్లపైన రేటు 2.96% నుంచి 2.84%కి తగ్గింది.  
 
 పొదుపు ఖాతా రేటు తగ్గించిన కెనరా బ్యాంక్‌  
 కెనరాబ్యాంక్‌ రూ.50 లక్షల వరకూ డిపాజిట్‌కు సంబంధించి పొదుపు ఖాతాలపై వడ్డీరేటును 50 బేసిస్‌ పాయింట్లు తగ్గించింది. దీనితోరేటు 3.5 శాతానికి తగ్గుతుంది. రూ.50 లక్షల పైబడిన మొత్తం విషయంతో ఈ రేటు 4%గానే కొనసాగుతుంది.