company fraud

సాక్షి, హైదరాబాద్‌: సైబర్‌ నేరాల్లో కొట్టేసిన సొమ్ముతో కన్‌­స్ట్రక్షన్‌ ప్రాజెక్టులు..హైదరాబాద్‌లో విల్లాలు నిర్మిస్తున్న ఓ రి­య­ల్‌ ఎస్టేట్, కన్‌స్ట్రక్షన్‌ కంపెనీ గుట్టురట్టు చేశారు ఈడీ అధి­కా­రులు. తక్కువ సమయంలో ఎక్కువ లాభాలు ఇస్తామంటూ ఆశచూపి రూ.కోట్లు వసూలు చేసిన ఆరోపణలపై ఆశ్రిత మెగా సొల్యూషన్స్, ఆశ్రిత ఇన్‌ఫ్రా ప్రాజెక్ట్స్‌ ప్రైవేట్‌ లిమిటెడ్‌­కు చెందిన అల్లంరాజు సత్యనారాయణమూర్తిపై ఎన్‌ఫోర్స్‌­మెంట్‌ డైరెక్టరేట్‌ (ఈడీ) కొచ్చి జోనల్‌ కార్యాలయం కేసు నమోదు చేసింది.దర్యాప్తులో భాగంగా అక్టోబర్‌ 28న హైద­రా­బాద్‌లోని సత్యనారాయణమూర్తి ఇంటితో పాటు కుత్బుల్లా­పూర్, శంషాబాద్‌లోని శాతంరాయి సహా మూడు ప్రాంతాల­లో ఈడీ అధికారులు సోదాలు నిర్వహించారు. డిజిటల్‌ ఆధా­రాలతో పాటు రూ.6.40 లక్షల నగదును స్వాధీనం చేసు­కు­న్నారు. రూ.14 లక్షలు నిల్వలు ఉన్న 11 బ్యాంకు ఖాతాలను ఈడీ ఫ్రీజ్‌ చేసింది. ప్లాట్లు, విల్లాలతో కలిపి సుమారు రూ.5 కోట్ల విలువైన స్థిరాస్తులను గుర్తించింది. ఈడీ కొచ్చి జోనల్‌ కార్యాలయం ఇందుకు సంబంధించిన వివరాలను శనివారం ఒక ప్రకటనలో తెలిపింది. అందులో పేర్కొన్న ప్రకారం వివరాలు ఇలా.. కేరళ ఎర్నాకుళానికి చెందిన ఫార్మా కంపెనీ నిర్వాహకుడు నిమేష్‌ (49)కి 2023 మార్చి నెలలో టెలిగ్రామ్, సోషల్‌మీడియాలో స్టాక్‌ మార్కెట్‌ ట్రేడింగ్‌తో కూడిన సమా­చారం వచ్చింది. ఫోన్‌ కాల్స్, టెలిగ్రామ్‌ యాప్‌ ద్వారా చాట్‌ సందేశాలు పంపుతూ అధిక లాభాలు వస్తాయని నమ్మించా­రు. ఈ క్రమంలోనే www.capitalix.com వెబ్‌సైట్‌ ద్వారా ట్రేడింగ్‌ చేస్తే భారీ రాబడులు పొందవచ్చని ఆశ చూపారు. దీంతో నిమేష్‌ 2023 మే 23– 2025 ఆగస్ట్‌ 29 వరకు రూ.26.02 కోట్లకు పైగా పెట్టుబడి పెట్టాడు. ఇలా వసూలు చేసిన డబ్బుకు హామీ ఇచ్చిన ప్రకారం లాభాలు, అసలు మొత్తాన్ని తిరిగి చెల్లించకపోవడంతో బాధితుడు నిమేష్‌ గతేడాది సెప్టెంబర్‌లో ఎర్నాకుళం సైబర్‌ క్రైమ్‌లో పోలీసులకు ఫిర్యాదు చేశాడు. ఎర్నాకుళం సైబర్‌ క్రైమ్‌ పోలీసులు నమోదు చేసిన ఎఫ్‌ఐఆర్‌ ఆధారంగా ఈడీ కొచ్చి జోనల్‌ కార్యాలయం ఈసీఐఆర్‌ రిజిస్టర్‌ చేసి దర్యాప్తు ప్రారంభించింది. సొమ్ము మళ్లింపులపై ఆరా..బాధితుడి నుంచి కొల్లగొట్టిన డబ్బు ఏయే ఖాతాల్లోకి మళ్లించారన్న అంశాలపై ఈడీ అధికారులు ఫోకస్‌ పెట్టారు. అల్లంరాజు సత్యనారాయణమూర్తి ఈ సొమ్మును తన కుటుంబ సభ్యులు, ఇతర ఉద్యోగుల పేరిట కంపెనీలు సృష్టించి వాటిని అందులోకి మళ్లించినట్టు గుర్తించారు. ఇలా ఆ సొమ్మును హైదరాబాద్‌ కేంద్రంగా కార్యకలాపాలు నిర్వహిస్తున్న బీటీఆర్‌ ఇండస్ట్రీస్, మెలుగు ట్రేడింగ్‌ కంపెనీ, ఆశ్రిత మెగా సొల్యూషన్స్‌ ప్రైవేట్‌ లిమిటెడ్, ఆశ్రిత ఇన్‌ఫ్రా ప్రాజెక్ట్స్, ఆశ్రిత ఇన్‌ఫ్రా ప్రాజెక్ట్స్‌ ప్రైవేట్‌ లిమిటెడ్‌ అకౌంట్ల పేరిట మనీలాండరింగ్‌ జరిగినట్లు గుర్తించింది.సైబర్‌ నేరాలతో కొట్టేసిన సొమ్ముతో హైదరాబాద్‌లో ఆశ్రిత ఇన్‌ఫ్రా ప్రాజెక్ట్స్, ఆశ్రిత ఇన్‌ఫ్రా ప్రాజెక్ట్స్‌ ప్రై.లిమిటెడ్‌ పేరిట ఒక విల్లా ప్రాజెక్టును కూడా ప్రారంభించినట్లు ఈడీ దర్యాప్తులో వెల్లడైంది. నేరపూరిత ఆదాయంతో పలు స్థిరాస్తులను కొనుగోలు చేసినట్లు గుర్తించింది. 11 అకౌంట్లలోని రూ.14 లక్షలు ఫ్రీజ్‌ చేసింది. సైబర్‌ నేరాల ద్వారా వచ్చిన డబ్బును రియల్‌ ఎస్టేట్, కన్‌స్ట్రక్షన్స్‌ కంపెనీల్లో పెట్టుబడులుగా పెట్టినట్లు గుర్తించింది. కేసు దర్యాప్తు కొనసాగుతున్నట్లు ఈడీ అధికారులు తెలిపారు.

సాక్షి, హైదరాబాద్‌: క్రిప్టో కరెన్సీ పేరుతో నగరంలో కూకట్‌పల్లిలో కేటుగాళ్లు రెచ్చిపోయారు. XCSPL కంపెనీ క్రిప్టో కరెన్సీ పేరుతో భారీ మోసానికి పాల్పడింది. దీంతో బాధితులు కంపెనీ ఎదుట ధర్నాకు దిగారు. రంగంలోకి దిగిన పోలీసులు.. కేసు నమోదు చేసి దర్యాప్తు చేపట్టినట్టు తెలిపారు. వివరాల ప్రకారం.. కూకట్‌పల్లిలోకని XCSPL కంపెనీ క్రిప్టో కరెన్సీ పేరుతో కోట్ల రూపాయలు దండుకుంది. రూ. లక్షకు నాలుగు లక్షలు రూపాయలు ఇస్తామని బాధితులకు ఆశ చూపించి వారిని మోసం చేసింది. ఏకంగా 90 రోజుల్లోనే వారు పెట్టిన పెట్టుబడికి నాలుగు రేట్లు ఎక్కువగా ఇస్తామని డబ్బులు వసూలు చేసింది. దీంతో, బాధితులు.. అప్పుచేసి, లోన్‌ తీసుకుని, క్రెడిట్‌ కార్డు ద్వారా డబ్బులు ఇన్వెస్ట్‌ చేశారు.  తీరా.. కంపెనీ వారికి డబ్బు చెల్లించకపోవడంతో అసలు మోసం బయట పడింది. దీంతో, బాధితులు పోలీసులను ఆశ్రయించారు. అనంతరం, మంజీరా మాల్‌లోని ఆఫీసు ఎదుట బాధితులు ఆందోళనకు దిగారు. ఇక, ఈ ఘటనపై పోలీసులు కేసు నమోదు చేసుకుని దర్యాప్తు చేపట్టినట్టు తెలిపారు.   


 నారాయణఖేడ్‌: ఆఫర్‌లో తక్కువ ధరకే మొబైల్‌ ఫోన్‌ ఇస్తామంటూ పనికి రాని వస్తువులు పంపించి తనను మోసం చేశారని మండలంలోని నమ్లిమేట్‌ గ్రామానికి చెందిన రాజు ఆవేదన వ్యక్తం చేశారు. తన మొబైల్‌ ఫోన్‌కు ఇటీవల ఓ ఫోన్‌ వచ్చిందని, రూ. 18వేల విలువ చేసే టచ్‌ స్క్రీన్‌ ఫోన్‌ను రూ.3,500లకే అందజేస్తామంటూ వివరించారని అన్నారు.
 దీంతో తాను నమ్మి ఫోన్‌లోనే ఆర్డర్‌ ఇచ్చి తన ఇంటి అడ్రస్‌ ఇచ్చినట్లు తెలిపారు. కాగా తన పేర హన్మంత్‌రావుపేట పోస్టాఫీస్‌కు పార్శిల్‌ వచ్చిందని, వారు కోరిన విధంగా రూ.3,500లు చెల్లించి పార్శిల్‌ను తీసుకున్నట్లు చెప్పారు. దాన్ని విప్పిచూడగా కుభేర యంత్రం, దేవుళ్ల ఫొటోలు ఉన్నాయన్నారు. ఇవన్నీ రూ.500ల విలువ కూడా చేయవని తెలిపారు. దీంతో తాను మోసపోయానని బాధితుడు రాజు ఆవేదన వ్యక్తంచేశారు.
  


 కొరుటూరు (ఇందుకూరుపేట) : తక్కువ ధరకే విలువైన సెల్‌ఫోన్ ఇస్తామని ఓ సంస్ధ ఒక యువకుడిని మోసం చేసింది. మండలంలోని కొరుటూరుకు చెందిన షేక్ దావూద్‌కు ఓ మహిళ ఫోన్ చేసి తాము ఎస్‌ఎస్ లైఫ్ కేర్ నుంచి మాట్లాడుతున్నామని, కంపెనీ ఆఫర్ మీద రూ.3,500 చెల్లిస్తే రూ.15 వేల విలువ చేసే సెల్‌ఫోన్ మీ ఇంటికే పోస్టుద్వారా పంపుతామని నమ్మబలికింది.
 
 దీంతో నమ్మిన దావూద్ అందుకు అంగీకరించి సెల్‌ఫోన్ పంపాలని తన చిరునామా ఇచ్చి కోరారు. శుక్రవారం పోస్ట్‌లో ఇంటికి వచ్చిన పార్శిల్‌కు రూ.3,500 చెల్లించి తీసుకున్నాడు. తీరా పార్శిల్ బాక్సును విప్పి చూడగా అందులో సేవింగ్ రీజర్, లైట్ ఇండికేటర్, బాడీ క్రీం మాత్రమే ఉన్నాయి. కనీసం మూడు వందల రూపాయలు కూడా విలువ చేయని ఈ సామాన్లు చూసి నివ్వెర పోయాడు. ఇదేమిటని తనకు ఫోన్ వచ్చిన 88850 41759 నంబరు కాల్ చేయగా హేళనగా మాట్లాడంతో పాటు తమిళం, హిందీ భాషల్లో ఆట పట్టించారని వాపోయాడు. తనకు వచ్చిన పార్శిల్ అడ్రస్ చూడగా ఎస్‌ఎస్ లైఫ్‌కేర్, నం 300 కాంజేయ్నల్లూరు రోడ్, గాంధీనగర్, వెల్లూరు-632006, కాట్పాడి, తమిళనాడు అని ఉందని, తాము మోసపోయినట్లు గ్రహించి పోలీసులను ఆశ్రయించనున్నట్లు తెలిపారు.