Chandragiri Assembly Constituency

సాక్షి, టాస్క్ ఫోర్స్‌ : తిరుపతి జిల్లా చంద్రగిరి నియోజకవర్గంలో ప్రకృతి సంపదకు రక్షణ కరువవుతోంది. రామచంద్రాపురం మండలంలో కొండ గుట్టలు, ప్రభుత్వ భూములు, అటవీ ప్రాంతాలను లక్ష్యంగా చేసుకుని మట్టి మాఫియా రెచ్చిపోతోంది. అక్రమ తవ్వకాలు యథేచ్ఛగా సాగుతున్నాయి. భారీ యంత్రాలతో గుట్టలను తొలిచేస్తూ మట్టి, రాళ్లను తరలిస్తున్నారు. దీంతో సహజ సిద్ధమైన గుట్టలు రోజురోజుకూ కనుమరుగవుతున్నాయి. రామచంద్రాపురం మండలం సి.రామాపురంలోని సర్వే నంబరు 28లో వున్న సిద్ధేశ్వరగుట్టను టీడీపీ నేతలు చెరబట్టారు. ఎక్స్‌కవేటర్లు వినియోగిస్తూ కళ్ల ముందే పిండి చేసేస్తున్నారు. పచ్చని చెట్లను పెకలించి మట్టిని తొలిచేస్తున్నారు. తవ్విన మట్టి, రాళ్లను వాహనాల్లో తరలిస్తున్నారు.సిద్ధేశ్వరగుట్టను చదును చేసి, ఆ ప్రదేశంలో ప్లాట్లు వేసి విక్రయించడానికి స్కెచ్‌ వేసినట్టు సమాచారం. ఇప్పటికే దాదాపు సగం కొండను తొలిచేశారు. చంద్రగిరి టీడీపీ ఎమ్మెల్యే పులివర్తి నాని వెనుక ఉండి ఈ విధ్వంసం చేయిస్తున్నట్లు గ్రామస్తులు ఆరోపిస్తున్నారు. సిద్ధే శ్వర కొండ రోజురోజుకూ తరిగి పోతోందని, నిత్యం భారీ యంత్రాలతో తవ్వకాలు సాగుతుండటంతో స్వరూపమే మారిపోతోందని చెబుతున్నారు. గతంలో పచ్చదనంతో కనిపించిన ఈ ప్రాంతం ఇప్పుడు మట్టి దిబ్బగా మారిందన్నారు. కొండను తొలిచేయడం వల్ల పర్యావరణానికి విఘాతం కలుగుతుందని, ఎలాంటి అనుమతుల్లేకుండా ఇంత భారీగా తవ్వకాలు సాగుతుంటే అటవీ, రెవెన్యూ శాఖల అధికారులు ఏం చేస్తున్నారని స్థానికులు నిలదీస్తున్నారు. ఎన్ని అర్జీలు పెట్టుకున్నా అధికారులు స్పందించడం లేదని, తామేమీ చేయలేమని పోలీసులు చేతులెత్తేశారని స్థానికులు చెబుతున్నారు. ఈ విధ్వంసంపై జనసేన మాజీ నేత, పర్యావరణవేత్త బొలిశెట్టి సత్యనారాయణ ఎక్స్‌ వేదికగా ప్రశి్నంచారు. ఎమ్మెల్యే పులివర్తి నాని తవ్వకాలను నిలుపుదల చేయాలని కోరారు. కూటమి ప్రభుత్వంలో అరాచకాలు పెరిగిపోతున్నాయని, స్థానిక సంస్థల ఎన్నికలు సమీపిస్తున్న తరుణంలో పులివర్తి నాని, ఈ అంశంపై తీసుకున్న చర్యలపై బహిరంగ ప్రకటన చేయాలని ఆయన డిమాండ్‌ చేశారు.

సాక్షి, తిరుపతి: ఏపీలో కూటమి ప్రభుత్వం ఏర్పడిన తర్వాత వైఎస్సార్‌సీపీ నేతలు, కార్యకర్తలపై పచ్చ మూకల దాడులు పెరిగాయి. వైఎస్సార్‌సీపీ కార్యకర్తలను టార్గెట్‌ చేస్తూ టీడీపీ నేతలు దాడులకు తెగబడుతున్నారు. తాజాగా చంద్రగిరి నియోజకవర్గంలో వైఎస్సార్‌సీపీ నాయకుడు కపిలేశ్వర్‌ రెడ్డిపై టీడీపీ నేతలు దాడి చేశారు. ఈ క్రమంలో తీవ్ర గాయాలు కావడంతో రుయా ఆసుపత్రికి తరలించారు.కాగా, చంద్రిగిరి నియోజకవర్గంలో వైఎస్సార్‌సీపీ నాయకులపై టీడీపీ దాడులు కొనసాగుతున్నాయి. తాజాగా పాకాల టౌన్ యూత్ ప్రెసిడెంట్‌ కపిలేశ్వర్ రెడ్డిపై టీడీపీ నేతలు దాడి చేశారు. ఓట్లవారిపల్లి గ్రామానికి చెందిన జగదీశ్వర్ చౌదరి, మరో 20 మంది టీడీపీ కార్యకర్తలు కపిలేశ్వర్ రెడ్డిపై దాడికి తెగబడ్డారు. ఈ క్రమంలో కపిలేశ్వర్‌ రెడ్డి తలకు, చేతికి తీవ్ర గాయాలయ్యాయి. దీంతో, వెంటనే ఆయనను తిరుపతిలోని రూయా ఆసుపత్రికి తరలించారు. ఇక, ఘటనా స్థలానికి పోలీసులు చేరుకుని దర్యాప్తు చేస్తున్నట్టు తెలిపారు.

గుంటూరు, సాక్షి: వైఎస్సార్‌సీపీ నుంచి ఎంఆర్‌సీ రెడ్డి సస్పెండ్‌ అయ్యారు. పార్టీ వ్యతిరేక కార్యకలాపాలకు పాల్పడుతున్నట్లు ఆయనపై ఫిర్యాదులు వచ్చాయి. ఈ నేపథ్యంలో విచారణ జరిపి క్రమశిక్షణ కమిటీ సిఫార్సుల మేరకు పార్టీ వేటు నిర్ణయం ప్రకటించింది. పార్టీ అధినేత, సీఎం జగన్‌ ఆదేశాలతో తిరుపతి జిల్లా చంద్రగిరి నియోజకవర్గానికి చెందిన ఎంఆర్‌సీ రెడ్డి చర్యలు తీసుకున్నట్లు పార్టీ కేంద్ర కార్యాలయం ఒక ప్రకటనలో తెలిపింది.