Airforce day

న్యూఢిల్లీ: భద్రతా సవాళ్లను ఎదుర్కోవడంలో వైమానిక శక్తి అత్యంత కీలకంగా మారుతోందని.. ఇలాంటి తరుణంలో తేజస్‌ యుద్ధ విమానాల రాకలో జరుగుతున్న విపరీతమైన జాప్యం భారత వైమానిక దళం(ఐఏఎఫ్‌)పై ప్రతికూల ప్రభావం చూపుతోందని చీఫ్‌ ఆఫ్‌ ఎయిర్‌ స్టాఫ్‌ ఎయిర్‌ చీఫ్‌ మార్షల్‌ ఏపీ సింగ్‌ పేర్కొన్నారు. ఇప్పటికే ఫైటర్‌ జెట్‌ స్క్వాడ్రన్ల బలం తగ్గుతోందని చెప్పారు. 94వ ‘ఎయిర్‌ఫోర్స్‌ డే’ను పురస్కరించుకొని ఆయన శనివారం మీడియా సమావేశంలో మాట్లాడారు. రాబోయే కొన్నేళ్లపాటు ఏటా కనీసం 36 నుంచి 40 యుద్ధ విమానాలను ఐఏఎఫ్‌లో చేర్చుకోవాల్సిన అవసరం ఉందని తెలిపారు. స్వదేశీ పరిజ్ఞానంతో తయారైన ‘తేజస్‌ మార్క్‌–1ఏ’విమానాలు, మల్టీ–రోల్‌ ఫైటర్‌ ఎయిర్‌క్రాఫ్ట్‌(ఎంఆర్‌ఎఫ్‌ఏ) కార్యక్రమం కింద సమకూరనున్న రఫేల్‌ యుద్ధ విమానాల రాకతో పరిస్థితి కొంతవరకు మెరుగుపడుతుందని ఆశాభావం వ్యక్తం చేశారు. అన్నీ ప్రణాళిక ప్రకారం జరిగితే.. ఈ ఆర్థిక సంవత్సరంలోనే ఎంఆర్‌ఎఫ్‌ఏ ఒప్పందాన్ని ఖరారు చేసుకొని, సంతకాలు చేసే దిశగా ప్రయత్నిస్తున్నట్లు పేర్కొన్నారు. ఈ విషయంలో భారత్, ఫ్రెంచ్‌ మధ్య చర్చలు కొనసాగుతున్నాయని వివరించారు. తేజస్‌ మార్క్‌–1ఏ యుద్ధ విమానాల సరఫరాలో జరుగుతున్న జాప్యం పట్ల కూడా ఏపీ సింగ్‌ ఆందోళన వ్యక్తం చేశారు. హిందుస్తాన్‌ ఏరోనాటిక్స్‌ లిమిటెడ్‌(హెచ్‌ఏఎల్‌) ద్వారా జెట్ల సరఫరాలో జరుగుతున్న భారీ జాప్యంపై అడిగిన ప్రశ్నకు స్పందిస్తూ.. ‘ఈ జాప్యం వైమానిక దళానికి నష్టం కలిగిస్తుంది’అని వ్యాఖ్యానించారు. ఐఏఎఫ్‌ కోసం 83 తేజస్‌ మార్క్‌–1ఏ యుద్ధ విమానాలను కొనుగోలు చేసేందుకు 2021 ఫిబ్రవరిలో రక్షణ శాఖ హెచ్‌ఏఎల్‌తో ఒప్పందం కుదుర్చుకుంది. ఈ డీల్‌ విలువ రూ.48,000 కోట్లు. మొదటి విడత విమానాలను 2024 మార్చిలో అందజేయాల్సి ఉంది. ఇప్పటి వరకు ఒక్క విమానం కూడా వైమానిక దళానికి అందలేదు. స్మిత్‌ మచ్ఛార్‌కు ఏపీ సింగ్‌ ప్రశంసలు ఫ్లై దుబాయ్‌ విమానాన్ని కాపాడటంలో భారతీయ కెప్టెన్‌ స్మిత్‌ మచ్ఛార్‌ అసాధారణ ధైర్యం ప్రదర్శించారని ఏపీ సింగ్‌ ప్రశంసించారు. ఆయనను చూసి ప్రతి భారతీయుడూ గర్వపడుతున్నట్లు చెప్పారు. మచ్ఛార్‌ చేసిన పని అత్యంత సాహసోపేతమైనదని తెలిపారు. విమానంలో దాడి జరిగినప్పటికీ గొప్ప శారీరక, మానసిక దృఢ సంకల్పాన్ని ప్రదర్శించారని పేర్కొన్నారు.

ఘజియాబాద్: ఎయిర్ ఫోర్స్-డేను పురస్కరించుకొని ఇండియన్‌ ఎయిర్‌ ఫోర్స్‌ అక్టోబర్‌ 8( శుక్రవారం)న 89వ వార్షికోత్సవాలను నిర్వహించనుంది. ఈ కార్యక్రమంలో ఎయిర్‌ క్రాఫ్టులతో ఐఏఎఫ్‌ ఎయిర్‌ షో ప్రదర్శించనుంది. అందులో భాగంగా ఐఏఎఫ్‌ ఎయిర్‌ క్రాఫ్టుల ప్రదర్శన రిహార్సల్స్ చేస్తోంది. తాజాగా ఎయిర్‌ షోకు సంబంధించిన రిహార్సల్స్‌ ఫోటోలను ఇండియన్‌ ఎయిర్‌ ఫోర్స్‌ ట్విటర్‌లో పోస్ట్ చేసింది.  ప్రస్తుతం ఈ ఫోటోలు సోషల్‌ మీడియాలో వైరల్‌ అవుతున్నాయి. పలు అత్యాధునిక ఎయిర్‌ క్రాఫ్టులను ఈ వేడుకల్లో ప్రదర్శిస్తామని ఐఏఎఫ్‌ పేర్కొంది.శుక్రవారం ఉదయం 8గంటలకు ఏఎన్‌-32 ఎయిర్‌ క్రాఫ్టు ప్రదర్శనతో ఎయిర్‌​ షో మొదలుకానుందని తెలిపారు. తర్వాత హెరిటేజ్‌ ఎయిర్‌ క్రాఫ్టు, మోడరన్‌ ట్రాన్‌పోర్టు, ఫ్రంట్‌లైన్‌ ఫైటర్‌ ఎయిర్‌ క్రాఫ్టుల ప్రదర్శన ఉంటుందని ఐఏఎఫ్‌ అధికారులు పేర్కొన్నారు. హిందన్‌ ఎయిర్‌ ఫోర్స్ స్టేషన్‌లో ఈ ప్రదర్శనలు జరుగుతాయిని తెలిపారు. అదే విధంగా ఢిల్లీ, ఘజియాబాద్‌ ప్రాంతంలోని ప్రజలు బహిరంగ ప్రదేశాల్లో చెత్త వేయవద్దని ఐఏఎఫ్‌ అధికారులు విజ్ఞప్తి చేశారు. చెత్త బయట వేయటం వల్ల పక్షలు తిరుగుతాయిని దాని వల్ల తక్కువ ఎత్తులో జరిగే ఎయిర్‌ షోకు ఇబ్బందులు కలుగుతాయిని తెలిపారు.

న్యూఢిల్లీ: తూర్పు లద్దాఖ్‌లో చైనాతో ఎలాంటి సంఘర్షణ తలెత్తినా భారత వైమానిక దళాని(ఐఏఎఫ్‌)దే పైచేయిగా ఉంటుందని ఎయిర్‌ చీఫ్‌ మార్షల్‌ ఆర్‌కేఎస్‌ బదౌరియా స్పష్టం చేశారు. ఎలాంటి పరిస్థితులనైనా ఎదుర్కొనేందుకు ఐఏఎఫ్‌ సంసిద్ధంగా ఉందన్నారు. సరిహద్దుల్లో ప్రస్తుతం నెలకొన్న పరిస్థితులకు అనుగుణంగా అవసరమైన అన్ని చోట్లా పటిష్టంగా మోహరించినట్లు తెలిపారు. చైనాతో తూర్పు లద్దాఖ్‌లో ఐదు నెలలుగా కొనసాగుతున్న తీవ్ర ప్రతిష్టంభన నేపథ్యంలో ఆయన ఈ వ్యాఖ్యలు చేశారు. ఈ నెల 8వ తేదీన జరగనున్న వైమానిక దళం దినోత్సవం సందర్భంగా సోమవారం ఆయన మీడియాతో మాట్లాడుతూ... దేశ సార్వభౌమత్వాన్ని, ప్రయోజనాలను పరిరక్షించడానికి సర్వశక్తులూ ఒడ్డుతామన్నారు. లద్దాఖ్‌లో ఐఏఎఫ్‌ సామర్థ్యంలో భారత్‌తో పోలిస్తే చైనా వెనుకబడి ఉందనీ, అయినప్పటికీ శత్రువును తక్కువగా అంచనా వేయజాలమన్నారు. క్షేత్రస్థాయిలో తలెత్తే ఎలాంటి పరిస్థితులకైనా తక్షణం, వేగంగా స్పందించేలా వాస్తవాధీన రేఖ(ఎల్‌ఏసీ) వెంట ఐఏఎఫ్‌ మోహరింపులు చేపట్టిందని చెప్పారు. అవసరమైతే ఉత్తర(చైనా), పశ్చిమ(పాక్‌) సరిహద్దుల వెంట ఏకకాలంలో పోరాటం జరిపే సత్తా ఐఏఎఫ్‌కు ఉందన్నారు. లద్దాఖ్‌ ప్రాంతంలో చైనా నుంచి ముప్పు ఉంది కదా అని అడిగిన ప్రశ్నకు ఆయన..‘అవసరమైన అన్ని చోట్లా మోహరించాం. లద్దాఖ్‌ అందులో చిన్న ప్రాంతం’అని పేర్కొన్నారు. లద్దాఖ్‌లోకి సులువుగా ప్రవేశించేందుకు వీలున్న అన్ని చోట్లా ఈ మోహరింపులు ఉన్నాయని తెలిపారు.  మన ఆర్మీని, ఆయుధ సామగ్రిని శత్రువు కూడా ఊహించలేని ప్రాంతాల్లోకి సైతం వేగంగా తరలించేందుకు ఐఏఎఫ్‌ సిద్ధంగా ఉందని చెప్పారు. రఫేల్‌ యుద్ధ విమానాల చేరికతో ఉత్తర సరిహద్దుల్లో శత్రువు కంటే మెరుగైన సామర్థ్యంతో ఉన్నామన్నారు. భవిష్యత్తు అవసరాలకు అనుగుణంగా మరిన్ని రఫేల్‌లను సమకూర్చుకునే విషయం పరిశీలనలో ఉందని వెల్లడించారు. చైనా బలాలు చైనాకున్నాయి.. చైనా కూడా కొన్ని అంశాల్లో బలంగా ఉందన్న బదౌరియా.. వాటిని దీటుగా తిప్పికొట్టేందుకు అవసరమైన వ్యూహాలు, ప్రణాళికలను ఐఏఎఫ్‌ సిద్ధం చేసిందన్నారు. ‘చైనాకు సుదూర లక్ష్యాలను ఛేదించే, భూమిపై నుంచి గగనతలంలోకి ప్రయోగించే క్షిపణి వ్యవస్థలు, ఐదో తరం జె–20 యుద్ధ విమాన దళం, అత్యాధునిక సెన్సార్లు, ఆయుధాలు ఉన్నాయి. సాంకేతిక, వ్యవస్థల ఏర్పాటు కోసం భారీగా వెచ్చిస్తోంది’అని తెలిపారు.