TV
పుట్టినరోజే తుపాకీతో కాల్చుకున్నాడు
పుట్టినరోజు వేడుకలే అతడి పాలిట మృత్యుపాశంగా మారాయి.
డల్లాస్: పుట్టినరోజు వేడుకలే అతడి పాలిట మృత్యుపాశంగా మారాయి. అమెరికాలోని డల్లాస్ లో జోసెఫ్ పర్వేజ్ అనే వ్యక్తి చేతిలోని తుపాకీ ప్రమాదవశాత్తు పేలడంతో అతడు మృతి చెందాడు. జోసెఫ్ గురువారం తన 21వ పుట్టినరోజు జరుపుకున్నాడు. ఈ సందర్భంగా సరదాగా తుపాకీ చేతబట్టి కాల్పులు జరిపాడు. కుటుంబ సభ్యులు దాన్ని లాక్కుని పక్కనపడేశారు.
అయితే తుపాకీని మళ్లీ వెతికి పట్టుకొచ్చి కాల్పులకు ఉపక్రమించాడు. జోసెఫ్ చేతిలోని తుపాకీ ప్రమాదవశాత్తూ పేలడంతో అతడు తీవ్రంగా గాయపడ్డాడు. హుటాహుటిన అతడిని సమీపంలోని మెథడిస్ట్ ఆస్పత్రికి తరలించారు. చికిత్స పొందుతూ శనివారం అతడు మృతి చెందాడు. మద్యం మత్తులోనే అతడు తుపాకీ పేల్చి ఉంటాడని పోలీసులు భావిస్తున్నారు. జోసెఫ్ మృతితో అతడి కుటుంబ సభ్యులు విషాదంలో మునిగిపోయారు.
