డబుల్‌ ధమాకా

కోనేరు సత్యనారాయణ , రమేశ్‌ వర్మ

రమేశ్‌ వర్మ నిర్మాణ సారథ్యంలో ఏ స్టూడియోస్‌ పతాకంపై కె.ఎల్‌. యూనీవర్సిటీ అధినేత కోనేరు సత్యనారాయణ ‘ఏరువాక, 16 ఫ్లస్‌’ చిత్రాలను నిర్మిస్తున్నట్లు తన పుట్టినరోజు (అక్టోబర్‌ 20) సందర్భంగా వెల్లడించారు. ‘‘రామ్‌ దర్శకత్వంలో రూపొందుతున్న క్యూట్‌ లవ్‌స్టోరీ ‘ఏరువాక’. రెండు యువ జంటల నేపథ్యంలో ఈ సినిమా కథనం ఉంటుంది. రమేశ్‌ వర్మ స్టోరీ, స్క్రీన్‌ప్లే అందిస్తున్న ఈ చిత్రానికి శ్యామ్‌ కె. నాయుడు కెమెరామేన్‌.

యుక్తవయసులో ఉన్న ఆరుగురు అబ్బాయిలు, ముగ్గురు అమ్మాయిలు కలిసి చేసే ఓ ప్రయాణ నేపథ్య కథాంశంతో రూపొందుతున్న సినిమా ‘16 ఫ్లస్‌’. రమేశ్‌ వర్మ స్టోరీ, స్క్రీన్‌ప్లే అందిస్తున్న ఈ సినిమాకు సాగర్‌ దర్శకత్వం వహిస్తున్నారు. ఈ రెండు చిత్రాలకూ చేతన్‌ భరద్వాజ్‌ స్వరకర్త. ఇవి కాకుండా ఇద్దరు స్టార్‌ హీరోలతో చేయబోయే సినిమాల వివరాలను త్వరలోనే వెల్లడిస్తాం’’ అన్నారు కోనేరు సత్యనారాయణ.