TV
అనిల్‌ కపూర్‌, హర్షవర్థన్‌ కపూర్‌
అనిల్‌ కపూర్‌కు 2019 చాలా స్పెషల్‌ ఇయర్‌గా మారబోతోంది. ఈ ఏడాది తనయ సోనమ్‌ కపూర్‌తో తొలిసారి కలసి నటించారు. ‘ఏక్‌ లడ్కీకో దేఖాతో ఏసా లగా’లో తండ్రీ–కూతుళ్లలానే కనిపించారు. తాజాగా కుమారుడు హర్షవర్థన్‌ కపూర్‌తో కలసి యాక్ట్‌ చేయడానికి సిద్ధమయ్యారు. షూటర్‌ అభినవ్‌ బింద్రా జీవితం ఆధారంగా ఓ బయోపిక్‌ తెరకెక్కుతోంది. అభినవ్‌గా హర్షవర్థన్‌ కపూర్‌ యాక్ట్‌ చేస్తున్నారు.
ఇందులో అభినవ్‌ తండ్రి అప్జిత్‌ బింద్రా పాత్రలో అనిల్‌ కపూర్‌ కనిపించనున్నారు. ‘‘దేశం గర్వించే వ్యక్తుల కథలో భాగమవ్వడం ఎప్పుడూ సంతోషమే. ఈ ప్రాజెక్ట్‌ ఓకే చేయడానికి అస్సలు సందేహించలేదు. రెండు సినిమాలే చేసినప్పటికీ మా అబ్బాయి నాతో నటించడానికి చాలా కాన్ఫిడెంట్‌గా ఉన్నాడు’’ అన్నారు అనిల్‌ కపూర్‌. ఇలా ఒకే ఏడాది కుమార్తె– కుమారుడితో నిజ జీవిత రిలేషన్‌షిప్‌నే స్క్రీన్‌ మీద చూపించడం విశేషమే.
