సొంత ఇంట్లో...సహజీవనం?!

కొంతమంది వార్తల్లో నిలవకపోతే అది పెద్ద వార్త అవుతుంది. అలాంటివాళ్లల్లో నయనతార ఒకరు. ఎప్పుడూ ఏదో ఒక లవ్‌స్టోరీ ద్వారా వార్తల్లో నిలుస్తుంటారామె. ముందు హీరో శింబు.. తర్వాత కొరియోగ్రాఫర్-దర్శకుడు-నటుడు ప్రభుదేవా... ఇప్పుడు దర్శకుడు విఘ్నేశ్ శివన్. మొదటి ఇద్దరితో ఆమె పెళ్లి వరకూ వెళ్లి, ఆనక విడిపోయారు. తాజాగా విఘ్నేశ్ శివన్‌తో ప్రేమాయణాన్ని మాత్రం పెళ్లి పట్టాలెక్కించా రని చెన్నై టాక్. నయన-విఘ్నేశ్ సీక్రెట్‌గా పెళ్లి  తంతు ముగించారని కోడంబాక్కమ్ భోగట్టా.

చెన్నైలోని ఎగ్మూర్ ప్రాంతంలో ఇటీవల నయనతార ఖరీదైన ఇల్లు కొన్నారట. అందులో విఘ్నేశ్‌తో సహజీవనం చేస్తున్నారని టాక్. ఆ మధ్య ఓనమ్ పండగను ఇద్దరూ జాయింట్‌గా జరుపుకున్నారు. అప్పుడు బయటికొచ్చిన ఫొటోల్లో ఇద్దరి మధ్య లవర్స్ కన్నా మించిన కెమిస్ట్రీ ఏదో కనిపించిందని చూసినవాళ్లు అభిప్రాయపడుతున్నారు. సో.. నయన మూడో లవ్‌స్టోరీకి పెళ్లితో శుభం కార్డు పడినట్లేనా? లేక ఆ తంతు ముగియకుండానే ఇద్దరూ సహజీవనం చేస్తున్నారా? సినిమా రంగంలో ఏ రహస్యమూ చాలాకాలం దాగదు కాబట్టి, త్వరలోనే ఈ గుట్టు బయటపడుతుందని ఊహించవచ్చు.