సమ్మెలోని ఉద్యోగులకు వేతనంపై రుణం మంజూరుకు ఆంధ్రాబ్యాంక్ నిర్ణయం

చిలకలూరిపేటరూరల్, న్యూస్‌లైన్ : సమైక్యాంధ్ర పరిరక్షణకు కంకణబద్ధులై పోరు బాట వీడని ప్రభుత్వ ఉద్యోగులకు తీపి కబురు. ఇప్పటికే గత నెల జీతం అందక కుటుంబ పోషణ భారమైన పరిస్థితుల్లో ఆంధ్రా బ్యాంకు తీసుకున్న నిర్ణయం ఉద్యోగులకు ఊరట నివ్వబోతోంది. ఉద్యోగి జీవితం ప్రతినెలా ఒకటో తేదీన అందే జీతంపైనే ఆధారపడి ఉంటుంది. అలాంటిది ఒక నెల జీతం రాకపోయినా వారి బడ్జెట్ తలకిందలవుతుంది. ముఖ్యంగా పిల్లల స్కూల్ ఫీజులు, విద్యుత్ బిల్లులు, పాలు, నిత్యావసర వస్తువులు, ఇంటి అద్దె తదితర చెల్లింపులు నిలిచిపోతాయి. సమ్మెతో ఇప్పటికే ఉద్యోగులకు ఒక నెల జీతం రాలేదు. వచ్చే నెల జీతం కూడా అందే పరిస్థితి లేదు.