మహిళే తొలి మేయర్‌

మహిళే తొలి మేయర్‌

నల్లగొండ కార్పొరేషన్‌ ‘జనరల్‌ మహిళ’కు కేటాయింపు

ఫ 19 మున్సిపాలిటీల్లో 14 స్థానాలు

జనరల్‌.. ఏడు మహిళలకు..

ఫ ఏడు నుంచి మూడుకు

పడిపోయిన బీసీ స్థానాలు

ఫ ఎస్సీలకు 2 స్థానాలు,

ఎస్టీలకు దక్కని రిజర్వేషన్‌

ఫ మున్సిపల్‌ రిజర్వేషన్లు

ప్రకటించిన ప్రభుత్వం

సాక్షి ప్రతినిధి, నల్లగొండ : మున్సిపల్‌ కార్పొరేషన్‌గా ఆవిర్భవించిన నల్లగొండలో తొలి మేయర్‌ పదవి మహిళ దక్కించుకోబోతోంది. మున్సిపల్‌ ఎన్నికల ప్రక్రియలో భాగంగా ప్రభుత్వం శనివారం రిజర్వేషన్లను ఖరారు చేసింది. నల్లగొండ మేయర్‌ స్థానాన్ని జనరల్‌ మహిళకు కేటాయిస్తూ ప్రభుత్వం ఉత్తర్వులు జారీ చేసింది. మరోవైపు ఉమ్మడి జిల్లాలో మిగతా 18 మున్సిపాలిటీలకు చైర్మన్‌/చైర్‌పర్సన్ల రిజర్వేషన్లను ఖరారు చేసింది. అందులో కార్పొరేషన్‌తోపాటు 17 మున్సిపాలిటీల్లో (నకిరేకల్‌ మినహా) ఎన్నికలు జరుగనున్నాయి.

మేయర్‌, చైర్మన్ల ఎంపికలో

పార్టీల నిర్ణయమే ఫైనల్‌

నల్లగొండ కార్పొరేషన్‌ జనరల్‌ మహిళకు రిజర్వు కావడంతో మేయర్‌ ఎవరు అవుతారన్నది ఆసక్తికరంగా మారింది. ఆ స్థానానికి ఎస్సీ, ఎస్టీ, బీసీ, ఓసీ సామాజిక వర్గాల నుంచి కార్పొరేటర్లుగా గెలుపొందిన వారిలో ఏ సామాజి వర్గానికి చెందిన మహిళ అయినా పోటీ పడొచ్చు. అయితే మేయర్‌ స్థానం ప్రత్యక్ష ఎన్నిక కానుందున, పార్టీల నిర్ణయమే కీలకం కానుంది. డివిజన్‌ కార్పొరేటర్‌గా గెలుపొందిన వారిలో ఎవరిని కూర్చోబెట్టాలన్నది పార్టీ నిర్ణయమే. ఈ నేపథ్యంలో కార్పొరేషన్లలోని 48 డివిజన్లలో అత్యధిక డివిజన్లను గెలుచుకున్న పార్టీకి చెందిన వారే మేయర్‌ కానున్నారు.

14 స్థానాలు జనరల్‌కే..

ఉమ్మడి జిల్లాలోని ఒక కార్పొరేషన్‌, 18 మున్సిపాలిటీల్లో 14 మున్సిపాలిటీల చైర్మన్‌ స్థానాలను అన్‌రిజర్వుడ్‌/జనరల్‌ చేసింది. ఇందులో 9 స్థానాలను మహిళలకు కేటాయించింది. ఆ స్థానాల్లో ఏ సామాజిక వర్గం వారైనా మహిళలు మాత్రమే పోటీ చేయాల్సి ఉంటుంది. ఇక బీసీలకు 2020 ఎన్నికల్లో ఏడు స్థానాలు లభించగా, ఈసారి కేవలం మూడు స్థానాలే దక్కాయి. ఎస్సీలకు రెండు స్థానాలు కేటాయించింది. ఎస్టీలకు జిల్లాలో ఒక్కస్థానం కూడా కేటాయించలేదు.

ముఖ్యనేతల చుట్టూ ఆశావహులు

కార్పొరేషన్‌ సహా మున్సిపాలిటీల్లో మేయర్‌, చైర్మన్‌, వార్డులు రిజర్వేషన్లు ఖరారు కావడంతో ఆశావహులు ముఖ్య నేతలను ప్రసన్నం చేసుకునే పనిలో పడ్డారు. ఇప్పటికే పోటీ చేసేందుకు ముఖ్యనేతలను సంప్రదించిన అభ్యర్థులు ఇప్పుడు రిజర్వేషన్లు ఖరారు కావడంతో తమకు అవకాశం కల్పించాలంటూ మంత్రులు ఎమ్మెల్యేల చుట్టూ ప్రదక్షిణలు ప్రారంభించారు. ఈ ఎన్నికల్లో ప్రతిపక్షాల నుంచి ఎదురయ్యే పోటీని అధిగమించి గెలుపే లక్ష్యంగా అధికార కాంగ్రెస్‌ పార్టీ వ్యూహాలు రచిస్తోంది. ఇప్పటికే మంత్రులు, ఎమ్మెల్యే సన్నాహక సమావేశాలు నిర్వహించారు. ప్రతిపక్ష బీఆర్‌ఎస్‌, బీజేపీ, ఇతర పార్టీలు కూడా ఎన్నికల కసరత్తు ప్రారంభించాయి.

ప్రాంతం ప్రస్తుత రిజర్వేషన్‌ 2020లో..

నల్లగొండ కార్పొరేషన్‌ జనరల్‌ (మహిళ) జనరల్‌

చండూరు జనరల్‌ బీసీ (మహిళ)

హాలియా జనరల్‌ జనరల్‌

మిర్యాలగూడ జనరల్‌ (మహిళ) జనరల్‌

చిట్యాల జనరల్‌ (మహిళ)జనరల్‌

నకిరేకల్‌ జనరల్‌ బీసీ

దేవరకొండ బీసీ (మహిళ) జనరల్‌

నందికొండ ఎస్సీ జనరల్‌ (మహిళ)

నకిరేకల్‌ మున్సిపల్‌ చైర్మన్‌ పదవి ఈ సారి జనరల్‌ కేటగిరీకి రిజర్వు చేశారు. రాష్ట్ర యూనిట్‌గా మున్సిపల్‌ రిజర్వేషన్లు కేటాయించడంతో నకిరేకల్‌ జనరల్‌ చేశారు. అయితే 20 వార్డులతో నకిరేకల్‌ మున్సిపాలిటీ 2020 డిసెంబర్‌ 16న ఏర్పాటైంది. 2021 ఏప్రిల్‌ 30న మున్సిపల్‌ ఎన్నికలు జరిగాయి. 2021 మే 7న కొత్త పాలకవర్గం కొలువుదీరింది. చైర్మన్‌ పదవి బీసీ జనరల్‌ అయ్యింది. ప్రస్తుతం నకిరేకల్‌ మున్సిపాలిటీ పాలకవర్గం పదవీకాలం 2026 మే 6 వరకు ఉంది. ఈ నేపథ్యంలో వార్డుల రిజర్వేషన్లు ప్రకటించలేదు.

నల్లగొండ కార్పొరేషన్‌తోపాటు మున్సిపాలిటీల్లోనూ రిజర్వేషన్లు మారిపోయాయి. తాము పోటీచేసిన స్థానంలో అనుకూలమైన రిజర్వేషన్‌ కాకుండా మహిళలకు వచ్చిన స్థానాలు ఉన్నాయి. అలాంటి చోట్ల తమ సతీమణులను బరిలో నిలిపేందుకు సిద్ధం అవుతున్నారు. నల్లగొండ కార్పొరేషన్‌తో పాటు మున్సిపాలిటీల్లోనూ గతంలో పోటీచేసి గెలిచిన స్థానాల్లో ఈసారి రిజర్వేషన్లు మారిపోయాయి. మాజీ మున్సిపల్‌ చైర్మన్‌ బుర్రి శ్రీనివాస్‌రెడ్డితో సహా పలువురు కౌన్సి లర్ల స్థానాలు మారిపోయాయి. ఆయా స్థానాల్లో మహిళలకు రావడంతో అక్కడ తమ సతీమణులను నిలబెట్టే అవకాశం ఉంది. మరోవైపు తమకు అనుకూలమైన డివిజన్లలో పోటీచేసేందుకు సిద్ధమవుతున్నారు.