‘ఉపాధి’ అమలులో ప్రభుత్వం విఫలం

బోట్‌క్లబ్‌ (కాకినాడ సిటీ): ఉపాధి హామీ పథకం అమలులో కేంద్ర, రాష్ట్ర ప్రభుత్వాలు అనుసరిస్తున్న విధానాలు పేద కార్మికుల జీవితాలను దెబ్బ తీస్తున్నాయని వైఎస్సార్‌ సీపీ ట్రేడ్‌ యూనియన్‌ జిల్లా అధ్యక్షుడు చెక్కా చక్రవర్తి బుధవారం ఒక ప్రకటనలో విమర్శించారు. ఈ పథకంలో మార్పులు చేసి కొత్త విధానాలను తీసుకురావడంపై దేశవ్యాప్తంగా నిరసన వ్యక్తమవుతోందన్నారు. 2025–26 ఆర్థిక సంవత్సరంలో పనిదినాలను 57.6 శాతానికి తగ్గించడం కార్మికులకు ఎంతో నష్టమన్నారు. ఈ పథకం కింద 2024–25లో 40.67 లక్షల మందికి ఉపాధి లభించగా, ప్రస్తుత సంవత్సరం అది 23.4 లక్షలకు పడిపోయిందని, దాదాపు 17.37 లక్షల మంది కార్మికులు ఉపాధి లేక ఇబ్బందులు పడుతున్నారని వివరించారు. వైఎస్సార్‌ సీపీ ప్రభుత్వ హయాంలో 25.55 కోట్లు, గత ఏడాది 24.52 కోట్ల పనిదినాలుండగా, ఈసారి 18.59 కోట్లకు తగ్గిపోయన్నారు. ఫలితంగా గతంలో నెలకు రూ.11 వేలకు పైగా సంపాదించే కార్మికులకు ఇప్పుడు కనీస వేతనం అందడం కూడా కష్టమైందని తెలిపారు. లిబ్‌టెక్‌ సంస్థ నివేదిక ప్రకారం, ప్రభుత్వాల నిర్లక్ష్యంతో 12.33 లక్షల మంది శ్రామికులు ఉపాధి కోల్పోయారన్నారు. లేబర్‌ బడ్జెట్‌ పెంచి, హాజరు పట్టికల్లో జరుగుతున్న అవకతవకలను అరికట్టాలని చక్రవర్తి డిమాండ్‌ చేశారు. ఉపాధి హామీ పథకానికి సంబంధించి రాష్ట్ర ప్రభుత్వం సుమారు రూ.1,200 కోట్ల బకాయిలు చెల్లించాల్సి ఉందన్నారు. నిజమైన కార్మికులకు పని కల్పించకుండా అధికార పార్టీ అనుకూలురకు మాత్రమే లబ్ధి చేకూరుస్తున్నారని ఆరోపించారు. గత ప్రభుత్వంలో దివ్యాంగ కార్మికులకు విస్త్తృతంగా లబ్ధి చేకూరగా, ప్రస్తుతం ఆ సంఖ్య తగ్గిపోయిందన్నారు. కార్మిక వర్గం పట్ల రాష్ట్ర ప్రభుత్వం మొండి వైఖరి ప్రదర్శిస్తోందని విమర్శించారు. పెండింగ్‌ బకాయిలు వెంటనే చెల్లించి, చట్ట ప్రకారం ప్రతి కార్మికుడికి 100 రోజుల పని కల్పించాలని, హాజరు పట్టికలో అక్రమాలను అరికట్టి, అవినీతికి పాల్పడుతున్న అధికారులపై చర్యలు తీసుకోవాలని చక్రవర్తి డిమాండ్‌ చేశారు. లేకుంటే ఉద్యమిస్తామని హెచ్చరించారు.