Christmas Cake Recipes: కెవ్వు కేకు.. రుచికరమైన జోవార్‌ క్యారట్‌ కేక్‌ తయారీ ఇలా!

క్రిస్మస్‌ వస్తోంది. కేక్‌ చేద్దామంటే అమ్మో మైదాతోనా... అని భయం. హెల్త్‌ కోసం అందరూ మిల్లెట్‌లు తింటున్నారు. మిల్లెట్‌లతో అన్నాలు, బిరియానీలు, బ్రేక్‌ఫాస్ట్‌లు, స్నాక్‌లు...ఎన్నో చేస్తున్నారు. మరి... కేక్‌లు చేయలేమా? ఎందుకు చేయలేం! ఇదిలో ఇలా చేయండి.

కావలసినవి: జొన్న పిండి– కప్పు; బాదం పొడి– కప్పు; బనానా ప్యూరీ– కప్పు; క్యారట్‌ తురుము– కప్పు; బెల్లం పొడి– కప్పు; పాలు లేదా నీరు – అర కప్పు; వెన్న – 3 టేబుల్‌ స్పూన్‌లు; అవిసె గింజల పొడి – 3 టేబుల్‌ స్పూన్‌లు (రెండింతల నీరు వేసి కలపాలి); ఉప్పు, బేకింగ్‌ పౌడర్, బేకింగ్‌ సోడా, దాల్చిన చెక్క పొడి – ఒక్కొక్కటి అర స్పూన్‌; బాదం పలుకులు– 10 (సన్నగా తరగాలి) 

తయారీ విధానం:

⇒ మందపాటి పెనంలో జొన్నపిండి వేసి సన్న మంట మీద దోరగా వేయించాలి.

⇒ మరొక పాత్రలో అవిసె గింజల పొడిని నీటితో కలిపి ఐదు నిమిషాల సేపు పక్కన ఉంచాలి.

⇒ ఆ తర్వాత జొన్నపిండిలో వెన్న, బనానా ప్యూరీ, అవిసె గింజల పేస్ట్‌ వేసి బాగా కలపాలి.

⇒ ఇందులో ఉప్పు, బేకింగ్‌ సోడా, బేకింగ్‌ పౌడర్, దాల్చిన చెక్క పొడి వేసి మళ్లీ కలపాలి.

⇒ ఇప్పుడు మిగిలిన పొడులు, క్యారట్‌ తురుము వేసి తగినంత నీరు లేదా పాలు వేస్తూ బాగా కలపాలి. 

⇒ కేక్‌ మౌల్డ్‌కు వెన్న రాసి పైన కొద్దిగా జొన్న పిండిని చల్లాలి. ఇప్పుడు పై మిశ్రమాన్ని సమంగా సర్దాలి. పైన బాదం పలుకులు చల్లాలి.  

⇒ ఇప్పుడు ఒవెన్‌ను 180 డిగ్రీలు వేడి చేసి మౌల్డ్‌ను లోపల పెట్టి 50 లేదా 60 నిమిషాల పాటు బేక్‌ చేయాలి. చల్లారిన తర్వాత కేక్‌ను ముక్కలుగా కట్‌ చేయాలి.