గోదావరి డెల్టాకు డొంకరాయి నుంచి నీటి విడుదల

సీలేరు: గోదావరి డెల్టా పంటల సాగుకు నీటి ఎద్దడి తలెత్తిన నేపథ్యంలో, రాజమహేంద్రవరం ధవళేశ్వరం బ్యారేజీ వద్ద నీటి నిల్వలు పెంచేందుకు సీలేరు విద్యుత్‌ కాంప్లెక్స్‌ నుంచి నీటిని విడుదల చేస్తున్నారు. ఇరిగేషన్‌ అధికారుల అభ్యర్థన మేరకు, ఏపీ జెన్‌కో ఉన్నతాధికారుల ఆదేశాల మేరకు సోమవారం రాత్రి నుంచి ఈ ప్రక్రియ ప్రారంభమైంది. ఈ సందర్భంగా సీలేరు కాంప్లెక్స్‌ సూపరింటెండెంట్‌ ఇంజనీర్‌ భీమవరపు బాలకృష్ణ మాట్లాడుతూ, మొత్తం 7 వేల క్యూసెక్కుల నీటిని గోదావరి డెల్టాకు విడుదల చేస్తున్నట్లు తెలిపారు. ఇందులో పొల్లూరు జలవిద్యుత్‌ కేంద్రంలో విద్యుత్‌ ఉత్పత్తి ద్వారా 4 వేల క్యూసెక్కులు, డొంకరాయి జలాశయం నుంచి విద్యుత్‌ ఉత్పత్తి లేకుండా నేరుగా మరో 3 వేల క్యూసెక్కుల నీటిని విడుదల చేస్తున్నామని వివరించారు. సోమవారం రాత్రి 7 గంటల నుంచి డొంకరాయి జలాశయం యొక్క 6, 7 నంబర్‌ గేట్లను ఎత్తి నీటిని వదులుతున్నారు. ఈ నీటి విడుదల ఈ నెల 27 వరకు కొనసాగుతుందని, ఈ క్రమంలో పొల్లూరు జలవిద్యుత్‌ కేంద్రంలో 4 మిలియన్‌ యూనిట్ల విద్యుత్‌ ఉత్పత్తి జరుగుతుందని ఆయన పేర్కొన్నారు.